Les Pages Jèrriaises

Marchons, Soudards Chrêtchiens!

"Onward, Christian Soldiers"

Marchons, Soudards Chrêtchiens!
Qué rein n'vouos arrête,
Avanchiz auve la Crouaix
Dé Jésus en tête!
Séyiz âpres à l'assaut
Contre l'enn'mîn des cieux;
Combattez auve couothage
Et n'ayiz pon d'peux !
Marchons, Soudards Chrêtchiens!
Qué rein n'vouos arrête,
Avanchiz auve la Crouaix
Dé Jésus en tête!

La rencontre victorieuse
Fait r'tchuler l'Malîn:
Cachiz-lé, donnez li'en
Sans r'lâche, - jusqu'à fîn!
S'ou' pouvez lé combattre
A cor et à crîn,
Ch't Esprit-là Înfèrnal
S'en va r'brousser c'mîn!
Marchons, Soudards Chrêtchiens!
Qué rein n'vouos arrête,
Avanchiz auve la Crouaix
Dé Jésus en tête!

Les soudards du Sauveur,
Forts comme des capestes,
Ont l'souôtchien et l'renfort
Des légions célestes!
I' n'craingnent pon lé Satan
Ni s'n enfé âffreux.
Car i' savent qué l'Bouan Dgieu
Prendra bouan souain d'ieux!
Marchons, Soudards Chrêtchiens!
Qué rein n'vouos arrête,
Avanchiz auve la Crouaix
Dé Jésus en tête!

Les trônes et les rouoyaumes
Sont seux d'pâsser l'pas,
Mais l'Églyise du Seigneur
Restétha 'chîn-bas!
Lé Dgiâtre n'a pon d'pouver
Contre s'n întégrité,
Car Jésus la prêsèrve
Pouor l'êtèrnité!
Marchons, Soudards Chrêtchiens!
Qué rein n'vouos arrête,
Avanchiz auve la Crouaix
Dé Jésus en tête!

Continnuez la batâle
Contre la mauvaîtchi,
Combattez lé Démon,
M'ttez-lé au défi:
Adorez l'Rédempteur
En chantant Ses louanges,
Ajouôtez vouos cantiques
Ès antiennes des Anges!
Marchons, Soudards Chrêtchiens!
Qué rein n'vouos arrête,
Avanchiz auve la Crouaix
Dé Jésus en tête!

Âmen.

George F. Le Feuvre

 

Viyiz étout:

 

Les Pages Jèrriaises