Les Pages Jèrriaises

Alléluia! Seigneur Jésû


Alleluia! Sing to Jesus

Alléluia! Seigneur Jésû,
Couronné dans l'Saint Sanctuaithe!
Alléluia! à Li l'triomphe,
Ayant gângni la victouaithe;
Êcoutez lé Chant dé Sion
Et lé son dé sa trompette;
Jésû-Chri par Sa rédemption
Nouos a sauvés d'l'oubliette.

Alléluia! Il est auve nous
Et nouos peines ont dispathu;
Alléluia! Jé sommes sauvés
Par Nouotr-é Seigneur Jésû,
Et ouaithe tch'I' siège driéthe les nues,
D'où'est tch'I' gard-é s'n yi sus nous,
J'n'oublions janmais Sa promêsse:
"Jé s'sai auve vous pour tréjous!

Alléluia! Lé Pain des Anges
Est la Sainte Eucharistie;
Alléluia! J'en profitons,
Car pour nous ch'est l'Pain d'la Vie;
Ô Seigneur, Sauveur des pécheurs,
Et nouot' Avocat au Ciel
Où'est qu' les cantiques triomphants
Sont nouot' priéthe pèrpétuelle!

Alléluia! Ô Rouai des Rouais,
J'sommes vassas et sèrviteurs!
Alléluia! Fis d'la Sainte Vièrge
Et du Bouân Dgieu, l'Créateur;
Tout l'Unnivèrs est Tan Rouoyaume,
Et Tan siège est l'Trône au Ciel;
Tu'es l'Grand Prêtre dé l'Eucharistie,
Et nouot' Salut Êtèrnel.

Alléluia! Seigneur Jésû,
Couronné dans l'Saint Sanctuaithe!
Alléluia! à Li l'triomphe,
Ayant gângni la victouaithe;
Êcoutez lé Chant dé Sion
Et lé son dé sa trompette;
Jésû-Chri par Sa rédemption
Nouos a sauvés d'l'oubliette.


George F. Le Feuvre

 

Viyiz étout:

 

Les Pages Jèrriaises