CHANSON

AIR: - Ye banks and braes of bonnie Doon.

Fossés, côtils de nos vallons,
Comment pouvous flleurir si biaux?
Comment pouvous de vos chansons,
Vnin m'afflligi, petits ouaisiaux?
Tu m'fendras l'coeu, petit chanteux,
En me faisant souvnin de la jouaie
De jours qu'étaient pour me heureux,
De jours qui ne rveindront jamais.

Combein de fais en me promnant,
J'ai veu flleurir chuchet et rose;
Des ouaisiaux l'amour était l'chant,
Et me je chantais la même chose:
Le coeu rêjoui, j'cuillis une rose,
Toute fraiche parmi ses piquets;
Et men galant volit la rose,
Mais i m'en laissit les piquets.

UN ST. LOUORENCHAIS.
Vèrsion d'la poésie d'Robert Burns

Vèrsion modèrnîsée:

Fôssés, côtis dé nos vallons,
comment pouv'-ous flieuthi si bieaux?
Comment pouv'-ous dé vos chansons,
v'nîn m'afflyigi, pétits ouaîsieaux?
Tu m'fendras l'tchoeu, pétit chanteux,
en mé faîsant souv'nîn d'la jouaie
dé jours tch'étaient pouor mé heutheux,
dé jours tchi n'èrveindront janmais.

Combein dé fais en mé pronm'nant,
j'ai veu flieuthi chuchet et rose:
des ouaîsieaux l'amour était l'chant,
et mé, jé chantais la même chose:
lé tchoeu rêjoui, j'tchilyis eune rose,
toute fraîche parmi ses pitchets;
et man galant volit la rose,
mais i' m'en laîssit les pitchets.

Eune variâtion d'un mannuscrit:

Fossés, côtils de nos vallons,
Comment pouvous flleurir si biaux?
Comment pouvous de vos chansons,
Vnin m'afflligi, petits ouaisiaux?
Tu m'fendras l'coeu, petit chanteux,
En me faisant souvnin de la jouaie
De jours que je trouvais heureux,
De jours qui ne rveindront jamais.