'Noum dé p'tit buoan'houmme,' s'fit i' Ph'lip Desclios, qui r'venait d'arrachi ses raves dévant qu'la g'lée les prînse, 'mais, i' s'en va y'aver du révillioun dans la pâraisse! Y'a eune volée dépis qu'j'eûmes eune éléctioun pour Député, et nos v'là chutte fais avec quatre candidats! V'la tchi m' r'appele lé buoan vièr temps.'
'Mon Ph'lip, j'lis dis,' i' vaudrait p'têt' mus né pas trop s'rapp'ler le vièr temps, surtout dé chein qui s'passait quand i' v'nînt ès êléctiouns, car dans l'vièr temps nous arrangait les êléctiouns de sorte qué nou' gâgnisse. Té rappeles tu d'la bordée qu' Pierre San Crouaix prînt pur Chent'nyi?'
'Ma fé, 's'fit l'Ph'lip, 'j'en ai entendu pâler. I' parait qu'ieu bein des v'régies d'terre dé touânées, bein de g'niches qui s'n'allaient faithe lus deux lettres et je n'sai pas coumbein d'chèrges éd raves ou d'navêts tchi changitent dé main. Mais, à chein qu'nou'm'dit i' parait étout qué n'y'avait pas mal d'êlécteurs tchi vendaient lus vouaix ès deux partis.'
'En effet,' j'lis dis, mais ché n'tait pas souvent qu'ils en r'parîssent. Car, coume tu sais, la liste êléctorale 'tait bein pus courte qu'ou' n'est achteu, car cheun 'tait seulement les Principaux et Officiers d'la pâraisse qu'avaient drouait d'vouaix, et s'nou' tait Principa' ou pas dêpendait dé coumbein d'rât qu' nou' payait. Et bein seux les femmes n'avaient pas drouait d'vouaix, n'importe coumbein d'rât qu'i' payîssent. Et d'même, nou' counnaissait touas l's' electeurs, et nou' v'nînt à saver bein vite sus tchi qu'nou' pouvait fier.'
'Et ch'tait d'même qué l'Nicolas d'la Lande vînt à faithe sa bêtise. Coumme tu sais bein, j'avaimes dans chu temps-là deux partis a la Trin'té, les Rouoges et les Blius et les Rouages 'taient bein pus counservateurs qué les Blius Le Nicolas d'la Lande 'tait Rouoge, mais, à raisoun d'êune faillie vieillotte dé fain il avait promînt sa vouaix ès Blius. Les Rouoges vîntent à l'saver et, la niet d'vant l'êléctioun, quand l'Nicolas 'tait au liet, les v'là, trais ou quatre de ieux, s'en aller siez li et li voler touas ses habits, n'li laissant qu'sa c'mînsole. Mais, vai-tu mon Phlip, nous'n'peut pas trop bein aller voter dans sa c'mînsole, et les Rouoges, qui n'éthaient jamais voulu faithe autcheune chose dé malhounnête ou d'empêchi les êlécteurs d'aller voter, li dounnîtent eune pouque à guano pourqué sa femme li fîsse eune pathe de braies. Mais lé v'là, je n'sais pas pourtchi, mais Nicolas trouvit qué d'aller voter habillyi d'rein qu'eune pouque à guano né s'rait pas counv'nablye et i'n'dêhallit pas, tchi fît qu'les Blius pérditent sa vouaix et l'êléctioun.'
'Ah, bonsens', s'fit l'Ph'lip,' dans l'vièr temps, les êléctiouns, nou' savait coumment l's'arrangi! Mais, bah, au jour d'aniet s'nous êprouvait à faithe d'ité nous' trouv'rait salement prînt et nou' finithait probablyément en boête.
N'ya pas, dans l'vièr temps nou savait autrément mus s'y prendre qu' nou'n'fait achteu. Mais nou'm'dit étout qué y'ieu eune bordée quand tu 'tais mousse qué tu gâgnis l'êléctioun pour les Rouoges. Coumment dén dgiablye qué t'en r'paris?'
'Mon Ph'lip,' j'lis dis,' ch'là chest eune autre histouaithe et je n'envais pas t'la racounter aniet, mais j'en r'pâl'rouns ieun d'chez jours.'
Le Vier Trin'tais
JEP 17 November 1992
Viyiz étout: