'Quand j'voulais m'bangner,' s'fit l'Ph'lip Desclios qui ragagnyit le Jour de l'An, 'j' y'scendais au Bouoâlé ou à Bouoanne Niet et je m'bangnais dans la mé.
Mais au jour d'aniet i' parait qui nos faut des pisceines - des 'swimming pools' coumme nou' dit en angliais - et i'm'semblye que la majorité des membres éd d's Etats s'en vount voter pour la sienne qu'i veullent bâti à Saint Brélade. Et ou s'en va couoâter eun patchet à bâti et à maint'ner. Mais absolument, i' sount fôs, ches pèrrots de l's Etats!'
'J'sis tout à fait de t'n avis', j'lis rêpounnis. 'Nos v'chein dans chutte petite île avec la mé tout l'tout d'nous et des baies et des sablyouns superbes, et v'là l's Etats, qui disent que j'n avouns pas l'moyen d'dêpenser d' sou sus des projets qui sount vraiement nécessaires, à fliantchi eune forteune sus chutte pisceine de tchi j'n avouns autcheun bésoin.
'Mas, dit Ph'lip, 'chein qui m'embête chest qu'si l's Etats dounnent eune subventioun ès fèrmiers, coumme me, pourtchi qu'i n'en dounn'raient pas ieune étout es aut'es industries, coumme par exemplye au tourisme'?
'I' lus en dounnent déjà tout plyein,' j'lis dis. 'Mais y'a eune difference. L'agritchultuthe est nécessaithe à Jèrri. Si i' fallait, j'pouorrâimes nos graie sans touristes et sans toutes les banques êtrangiéthes et l'coummerce éd finance que j'avouns achteu. Mais je n'pouorraîmes jamais nos graie sans l'fèrmage. Mais, grâce au Marchi Commeun et tout chu niolîn de Brouxelles countre tchi que j'n'pouvouns rein faithe, la fèrmerie en Jérri ne pays pas, et v'la tchi m'mounte au tchoeu de vaie tant d'jannes fèrmiers abandounner l'fèrmage pour prendre des job dans l'coummerce et l'industrie, I's coumptent mus, les pouoarres baloques, car i' n'ount pas à travaillyi si dû et i' craient lus gages guarantis. Mais achteu l'coummerce et l'industrie sount en rabat, et i' mettent pus d'gens à la porte qu'i' n'en engagent. J'sis bein seux qu'té, mon Ph'lip, s'tu r'tais janne gamin, ne laiss'rais pas la fèrme pour aller travailli en ville.
Le Ph'lip s'êbouffit d'rithé. 'M'érvais tu', i's'fit,' à grivouâilli dans eune office en ville? Mais si j'n'avais pas herité ma ferme de mon bouoan'houmme de pèthe, je s'rais p'têt' dév'nu navidgeant et aller à la Côte pêtchi et r'am'ner la mouothue. Mais, coumme tu sais, la Côte et la Terre Neuve, chest tout fini pour Jèrri. Ch'n'est pus coumme dans l'temps, quand tant jannes Jèrriais passaient d's années là-bas.'
'Mais', j'lis dis, 'pour érvener au fèrmage, y'a bein des gens, les 'Verts' surtout, qui prétendent que puisqu'i'n'paye pas à labouother la terre j'dév'raimes en faithe eun parc, et qu'à la pièche de fèrmer les fèrmiers d'vînssent surveillants d'parc. T'érvaies tu, té à faithe d'ite!
'J'sais bein,' s'fit l' Ph'lip, 'que v'la tchi t'amus'rait hardi, mais n'y a pas grand'chance que j'm'en vais t'dounner chu pliaisi là. Mais si i' veullent faithe Jèrri pustôt eun parc, pourtchi n' garder pas pus d'vaques et mett' pus d'clios à l'herbe? Eun clios en herbe parait autrement mus qu'ieun en brécolis.'
'Mais, Ph'lip,' j'lis dis, én te rappelles-tu pas le fracâs qu'y'a ieu à Maufant, ouesqu'les gens qui d'meuthent là, la pûspart des êtrangiérs ou des villais, s'plyiainent de l'odeu tchi lus veint, souo-disant, d'eune fèrme au vaisinné, iou qu'y'a hardi d'vaques. Ne savent-i' pas si nou'vit dans la campangne nou' sent l'oder d'la campangne? Je n'sais pas coumbein d'fèrmes à vaque que y'a dans chutte partie d'St Brelade iou qu'ches happes-la-leune veullent bâti lus pisceine, mais j'sais bein qu'si y'a même eune seule vaque dans l'vaisinneé, les gérants et les membres d'la pisceine s'en vount heurler coumme le dgiablye. Nânnin, mon Ph'lip, y'a pus d'chance que Jèrri d'veinne eun parc que d'dév'ner eune grande ferme à bêtes'.
'J'crai bein', s'fit l'Ph'lip tristément 'que t'as raisoun. Mais i s'en va faller que j'm'en aille traithe mes tchiques vaques. Je n'voudrais pas t'laissi avec de soumbres pensées, surtout aniet, le Jour de l'An. Pourtchi qu'tu n'dêhalles pas la bouteille; eune goutte te f'rait du bein, et j'en prendrais bein ieunne étout'.
Le Vier Trin'tais
JEP 16 February 1994
Viyiz étout: