Est-che té... est-che mé... tchi happ'tha l'unnicône?
J'siéthons les mèrques d'ses chabots sus l'sablion,
J'viyons la lueu d'la leune lé long d'sa crîngne.
Ch'est l'rouai des bêtes. La néthe grève est san trône
Pèrlé et argenté. Chu rêvillon
Rouoya duthe la blianche niet, et quand i' hîngne,
J'ouais la clyîncaill'lie cliaithe dé tes jouéyaux.
Jé sens lus fraid méta sus mes paûpiéthes,
Fraid coumme l'argent d'sa cône, fraid coumme pouaîson.
Happons d's êtailes! Lavons-les auve dé l'ieau!
Auve du sablion j'féthons des brides ligiéthes
Pouor m'ner chu j'va d'tchéthaûd. En pamouaîson
I' s'èrpose, contchéthi, dans chu gardîn
Dé vrai, dé vlicots et dé cons d'rotchi.
J'l'éthons happé... ché s'sa li tch'est en chèrge.
Sa cône d'argent dgéthitha not' hèrtchîn,
Nos r'fétha purs, transformétha not' vie:
Clièrgis d'pouaîson et d'ma, j'èrséthons vièrges.
Geraint Jennings
Juîn 2000
|
