Lé tigre dévthait faithe peux - un térribl'ye annima!
Mais il est doux et rîlyi - coumme man pyjama!

Man doue! La crocodile est connue pouor ses lèrmes.
Pourtchi? Pa'ce qu'ou tchultive des ouognons sus sa fèrme.

Lé crapaud întelligent sait êcrithe et liéthe
Mais l'âne est pus stupide et n'peut rein faithe - sauf braithe!

Tchil avantage d'aver eune mémouaithe d'êléphant!
(Mais pouor êt' seu, il êcrit tout en nièr et blianc.)

Oh, ouaithe qué nou sait caûd coumme des mouôssons, quand même,
Nou-s-est mains caûd qué d'dans un fou à micro-louêmes!

Un cat r'garde bein un êvêque, dit l'bouan vièr diton.
Mais l'cat préféthe èrgarder la télévision!

Lé tchilieuvre n'a ni pids, ni tchuisses, ni gvil'yes, ni g'nouors.
I n'fait pon d'marathons pa'ce qu'i' n'peut janmais couôrre!

Lé tchian n'peut pon chanter; i' né peut faithe qu'ouasser.
Il aime la musique, mais n'l'a pon apprîns assez.

Lé loup, ous savez, a un bein grand appétit.
I mange'geait touos les Connêtabl'yes et pis l'Bailli!

Tout êvilyi, lé cahouain pâsse la nièt entchiéthe
Dans les discos auve des fil'yes, des drogues et d'la biéthe!

Lé cyngne c'menche à chanter douoch'ment avant d'mouothi.
Auve guitare et tambour, ché s'sait dans lé Top Dgix!

La vaque soulait, châque jour, nouos donner des pîntes d'lait.
Ach't'eu ou l'donne en litres: oulle a 'té métriquée!

Lé lapîn est alcoolique, et ses ouothelles
Sont longues pouor êcouter l'ouvèrtuthe dé boutelles!

Si nou s'tait, nou-s-entend un êtchutheu dans l'bouais
Tchi sus eune branque nouos heurle d's înjuthes en Jèrriais!

Les lièvres au mais dé Mars d'veinnent bantchièrs dans les clios,
Auve téléphones mobiles et meetings. Sont-i's fos?

Lé rat d'êglyise est pauvre, trop pauvre pouor boutitchi.
Sa bouonnefemme acate tout auve sa carte dé crédit!


Geraint Jennings