Moussieu l'Minnistre du Transport et des Sèrvices Techniques a justément lanchi l'drein brouoillon d'san plian d'action pouor lé transport. I' veurt amender l'sèrvice dé beusse, encouothagi la pédal'lie et la marchéthie et rêduithe les blios d'trafi à l'entou d'la Ville dans l's heuthes embarrâssées.
Y'en a tchi sont d'sappouaintés qu'un nouvieau tramouais a 'té excliu. Les supporteurs d'un tramouais înmaginnent eune longue lîngnie d'ouadgîns lithant dans l'solé tchi driss'sait d'eune ièrre à St. Aubîn et ofûche ès Tchennevais et à l'aéroport. Les cheins tchi lus y opposent dithent qué tout chenna n'vaudrait dgéthe les millions d'louis qu'nou-s'éthait à dêpenser.
Au mains l'tramouais fut mentionné dans l'rapport; d'aut's idées n'y fidguthaient même pon. Lé Seigneu d'Sanmathès soulait v'nîn en Ville en baté par l'canné tch'existait l'travèrs des prés au dgiêx-huitchième siècl'ye. La mathe ornémentale (tchi soulait êt' eune bangnérêsse) dans les gardîns du Mangni est eune partie dé chein tch'en reste. Si j'pouôrrêmes pèrsuader l'Sieur Obbard, lé Seigneu d'achteu, d'rallouongni sa mathe un mio, v'là tchi s'sait acouo eune route en Ville et chenna aussi bein praticabl'ye qu'un tramouais. Assa, si j'chantons "Ma Normandie", auve ses gondolièrs, j'pouvons aver des gondoles, dgia.
En pâlant d'batchieaux, où'est qu'est l'idée d'un taxi-baté l'travèrs d'la Baie d'la Ville? Ou eune beusse à l'ieau tchi f'thait l'tou d'l'Île? Ah, tchi pliaîsi d'attraper chutte beusse dé mé à Rôzé ou à Ste Cat'linne à seule fîn d'aller en travas - ofûche en donnant à mangi ès paîssons sus lé c'mîn.
Pouor les cheins tch'aim'thaient mus fliotter par d'ssus les louêmes qué d'enfachi l'rouôlais, nou pouôrrait considéther un sèrvice dé ballons. Les pâssagièrs suspendus souos un grand ballon et soûffliés douochement par des brîsettes ligiéthes arriv'thaient d'eune bouonne heunmeu. Bein seu qu'chenna dépendrait du vent, où'est qu'il' arriv'thaient, mais ché s'sait ofûche mus qu'd'êt' bliotchi dans un boulant dans l'trafi d'la Ville. Moussieu l'Minnistre a, sans doute, un tas d'idées d'même - mais un tramouais est excliu.
Geraint Jennings
Viyiz étout: