L's êpieurs dé trains en Jèrri n'ont pon ieu hardi d'opporteunité d'êpier des trains et d'noter lus neunméthos d'pis l's années 1930s quand l'drein c'mîn d'fé Jèrriais freunmit (et j'ai des doutanches qu'les Allemands éthaient atchilyi d'l'êpiêthie d'lus trains duthant l'Otchupâtion). Bein seu qu'nou peut êpier d's avions et noter lus r'gistrâtions; nou peut êpier les vaituthes tch'ont les pus bas neunméthos sus lus "pliaques à J"; y'a des gens tchi font des collections d'tîmbres et toutes les manniéthes dé choses qué nou peut ramâsser, et v'là tch'est tout înnocent sans faithe du ma à autcheune pèrsonne.
Mais achteu en Jèrri, j'éthons un nouvieau pâssetemps - la phôn'nie d'beusses. Véthe, dépis qu'les neunméthos entchéthaûdés ont appathu par les c'mîns ès arrêts d'beusse, j'avons eune nouvelle opporteunité pouor d'l'anoraqu'sie. Ch'est en tchi l's anoraques sont utiles pouor les pâssagièrs et l's êpieurs dé beusse. Espéther la beusse duthant eune dêtchèrque n'ess'sont janmais d'aut' dé même! Bein seu, nou-s'éthait aimé mus d's abris ès arrêts, mais tout veint à tchi sait attendre, et attendre, et attendre...
Tchi qui s'sa l'preunmyi à faithe la touônnée dé touos l's arrêts? Tchi qui s'sa rêjoui l'preunmyi en notant la rêponse à sa d'mande par téléphone dé pouchette d'la dreine beusse pouor compliéter sa collection? Tout ch'qu'i' faudra pouor ajouôter au fanne ch'est d'organnîser eune lot'tie atout les neunméthos magiques, ou ofûche eune gamme dé bîngo.
À ches drein, les compangnies d'télévision ont 'té crititchies pouor aver cabochi des quiz et téléphon'nies dans lus progranmes, pouor aver înventé des gângnants, pouor aver gaffé des sou en encouothageant des cos d'téléphone quand ch'n'est d'aut' pôssibl'ye dé gângni. Nou dait s'fier qu'la téléphon'nie d'beusses né vèrra pon d'itelles scandales.
Mais en s'înspithant des téléphon'nies d'télévision, la technologie pouôrrait sans doute allouer dé voter hors les beusses èrtèrgies dé d'dans la Stâtion d'la Libéthâtion.
Viyiz étout: