Les Pages Jèrriaises

Lé Sèrmon d'Pâques dé Saint Jean Chrysostome

 

Si autchun est pieux et aime lé Bouan Dgieu,
Qu'i châre chutte belle fête leunmineuse!
Si autchun est un louoyal sèrveux,
Qu'i veinge sé rêjouissant dans la jouaie du Seigneur!
Si autchun est lâssé d'ses jeunées,
Qu'il èrchéve achteu sa r'compense!
Si autchun travâle d'pis la preunmiéthe heuthe,
Qu'il èrchéve chein qu'il a méthité!
Si autchun vînt à la traisième heuthe,
Qu'i' fête auve jouaie!
Si autchun arrivit à la siêxième heuthe,
Qu'i' n'ait pon d'doute, i' n'pèrdra rein du tout!
Si autchun s'èrtèrgit jusqu'à la neuvième heuthe,
Qu'i' s'appraîche, qu'i' n'hésite pon!
Si autchun n'arrivit qu'à la onzième heuthe,
Qu'i' n'ait pon d'peux, viyant qu'il est tardi!
Car lé Maît' est génétheux et èrchait lé dèrnyi d'la même manniéthe qu'lé preunmyi:
I donne du r'pos au chein tchi veint à la onzième heuthe, et au chein tchi travâle d'pis la preunmiéthe heuthe étout.
Au dèrnyi, I mouontre Sa mèrci, et I souongne lé preunmyi;
À chennechîn, I donne, et à chenna, I mouontre Sa gentillesse;
Il accepte lé travas et atchieille l'întention;
Il honore l'action et I louange l'offre.
Ainchîn, entrez, tout l'monde, dans la jouaie du Seigneur, lé preunmyi et l'dèrnyi ensembl'ye,
Èrchévez vot' prix!
Vous, les riches, et vous, les pauvres, dansez l's iuns auve l's aut's!
Vous, les sobres, et vous, les gâzouoilleurs, louangiz chu jour!
Vous tchi jeûnez et vous tchi n'jeûnez pon, séyiz heutheurs aniet!
La tabl'ye est chèrgie; faîtes un bouan fricot!
Lé vieau est gras; qu'pèrsonne né s'en âge affanmé!
Qu'tous chârent lé bantchet d'la fouai;
Qu'tous lus rêjouîssent d'la richesse d'la bouônte dé Dgieu;
Qu'pèrsonne né lamente sa pouôrreté, car lé Rouoyaume s'est mouontré pouor tous;
Qu'pèrsonne né plieuthe pouor ses péchés, car la leunmiéthe du pardon s'est êl'vée d'la tombe;
Qu'pèrsonne n'ait d'peux d'la Mort, car la mort du Seigneur nos a libéthés;
Lé chein tchi fut happé par la Mort, contchéthit la Mort;
Lé chein tchi d'cendit dans la Mort, dêtruisit l'Enfé.
L'Enfé fut mârri quand i' gouôtait Sa chai.
Esaie vit chennechîn et i' s'êcriyit:
L'Enfé fut mârri quand i' T'rencontrit fache à fache là-bas
I fut mârri car i fut achouêmi,
I fut mârri car i fut motchi,
I fut mârri car i fut tué,
I fut mârri car i fut env'yé bas,
I fut mârri car i fut enchaîné;
I r'chut un corps et rencontrit l'Bouan Dgieu;
I r'chut la tèrre et rencontrit lé ciel fache à fache;
I r'chut chein tch'i' viyait et tchit dé chein tch'i' n'viyait pon.
Oh Mort, où'est qu'est ta pitcheuse?
Oh Enfé, où'est qu'est ta victouaithe?
Christ est êl'vé, et tu'es env'yé bas!
Christ est êl'vé, et les dgiâbl'yes ont tchée!
Christ est êl'vé, et l's anges lus rêjouissent!
Christ est êl'vé, et la vie est libéthée!
Christ est êl'vé, et pèrsonne n'est morte dans la tombe!
Car Christ est êl'vé d'la mort et est dév'nu les preunmièrs frits des cheins tchi lus sont endormis.
Qu'la glouaithe et l'pouvé saient à Li jusqu'ès âges des âges.

Amen

 

 

 

Les Pages Jèrriaises