Les Pages Jèrriaises

Sonnons la Pêle èt les Bachins

 

Faithe braithe les peîles

Clyiquez sus l'portrait pouor ouï la sonn'nie

Patchons en chins balots
Les quat' k'mins's, mes èsfans ;
Dêguerpons ès tchériots
Et vite engambons d'dans.
Vont-i ! nou dirait, vèr',
Qu'i-l-éraient l'feu drièr' ! . . . .
Sonnons, sonnons la pêle èt les bachins,
Car j'alons 'rvès notre île èt nos anmins !

Asa, i faut d'valé
Pour alé s'embertchi.
Avanchons ! V'là l'baté
Qui fume, - i va s'patchi . . . .
- Ah ! nos v'là don à-bord
Et tchitons bieau-frès l'port.
Sonnons, sonnons la pêle èt les bachins,
Car j'apréchons d'notre île èt d'nos anmins !

Bon ! bon ! V'là l'îl' d' Aur'gny !
Chêqu' yain d'ête eun' patraqu',
Not' stème est, sans menti,
L'Télégriphe - êlectraqu' ! . . .
- Ch'est vrai, - dans un clin-d'yi
Nos v'chin à Guernézi.
Sonnons, sonnons la pêle èt les bachins,
J'viyons dêja l'îl' yoù qu'sont nos anmins !

Houras ! garçons, chauffèz,
Là-bas, vot' grôs' chaudgièr' ;
Nos v'chin pâsès Grosnèz,
A tchiqu's pas d'la Corbièr'.
- Nos v'là v'nus ! Dghieu merci !
V'chin l'Châté, - j'somm's au pid !
Sonnons, sonnons la pêle èt les bachins,
Car j'touchons notre île èt viyons d'z-anmins !

Nos v'là à tèrre, enfin, -
Sus not' bieau p'tit Jerri . . . .
Nou nos embrache ichin
Et d'là, nou nos souosri ;
Oui, châqu' phisionomie,
D'nos 'rvès, est tout' rêjouie ! . . .
Sonnons, sonnons la pêle èt les bachins,
Car jé somm's dans notre île ov' nos anmins.

Un aute Rèmeux.
St.-Héyé, chu 29 Oct. 1864.

 

un bachîn

un bachîn

 

Viyiz étout:

 

Les Pages Jèrriaises