A M. l'Editeu de la “Nouvelle Chronique.”
V'la quest bein d'avé mins ma lettre sus vot gazette Mercredi, si ch'tila qui l'a r'chue a dé z'yers, y pouora vés qué jé savons aussi bein pâlai à dêcouvert que li au vote secret.
J'avons ocquo quiques môts à vouos coumuniqui pour chu navire l'Athletea, qu'mandai par le cap'taine Gill.
Mest'avis qué nouo n'sé trouv'rai pas mâ d'avai eun batai de saouv'tage à St.-Ouen.
J'allinmes vais eun anmin qui reste de chu couôté de la baie; j'lis dis, qui grand piqui d'vais chu pouore navire m'nichi à touos moment dé péri sans s'cours! sans pouvai aître aperchu d'aoucune âme! Yeun' de sès zancres fut rompue et si le vent qu'étai fort neuche pon molli, touos chés hoummes, lus fammes et l'zaviers qu'étais à bord éraient touos péri.
D'mandais, par vot' gazette, qué cheux qu'ont l'pouvai de faire chonna, que nou plliaiche un batai dé saouv'tage permanent à la baie de St.-Ouen, pour tranquilisai chès pouore matelots et lus fammille.
Nou za quasiment honte de pansai qui l'yia touo c'qui faout à la caouchie et dans l'port, et qué chès pouores hoummes de Dieu et d'la mé, eusche 'tai naoufragis si par mirâclle yeune de lus zancres n'euche durai pus qué l'vent qui s'abatti chu jouor de tempaîte le 4 de chu mais de S'tembre.
Je somme satisfais de pensai qué vouos allaiz lus dithe chonna et qué p'têtre bein qu'nou zerra, en permanenche, eun batai de saouv'tage.
Chest bein l'mains qu'nou pièsse fèthe pour nouos prêservai de malheurs s'nou peut les empêchi.
Ou zarrangerais touo chonna acheulfin qué cheux qui pouorront avé les maîmes idais comprainne les nouotres, pour d'mandai, coumme j'vouos l'disais, à qui de drouet, eun batai de saouv'tage pour la baie de St.-Ouen.
Je vouos salue bein, et vouos r'mersie, M. l'Edteu,
Eun St.-Louoranchais
Nouvelle Chronique de Jersey 13/9/1884
Viyiz étout: