|
Ah! Mont-Auprêtriers ou n'estes pas fort malins, D'avé r'fuzait des sou pour racqmodé vos qmins; Les Etats de Jerri vos offre librement, Comme est zaoutres Pâraisses de vos bailly d'l'argent; Mais zou voulaits, (respé de l'honneu que j'vos dé) Comme des bêtes à saie resté dans votte puté, Comme chez animaouts là, y vos faout varvoté Dans vos saloperis, et la vos y vouotré: Consideraits umtit, l'état de vos vaizins, Chez pouore diables d'Trin'tez qui sont à faire lus qmins Voudriouts sus les vôtres qui vaindrez s'estrav'lé? Et dans vos salles Querières lus hernez renversé? Of huche des pouquis d'grain, y pouourez y'estrueullé, Ou p'testre un tonné d'cidre quinne serez r'ramassé, Mais maougret tout chonnechin chenne serait ocouore rain Que d'estrueullé lus cidre, et perdre de lus grain, Chez quissçont en dangi de se rompre le co, Ou désstropié lus bêtes, oquo p'teste pus aco; Car si vennes à chopé in lus faout pus davainne, Isse rompronts les guerets, ou s'crevront la bedaine; Sh'nessa, mafé, pas là erquilly chen qui semme, Ou savaits, pargui ben, po cassait n'est pas crème, Chez que ch'nez pas nitout une affaire à truncé, D' accepté de bioaux qmins ou ben de les r'fusé. Dans l'assembliets d'pâraisse ou vos estes demontraits Avé l'esprit pointu comme des brioches quarraits; Quets cou gangnis bouannes gens d'este de même enguiantraits En faveu d'chez Querières, quinne peuve este racqmodaits? En allant par les veaouts, savous ben oprez tout Qou n'alouannaits jenmais pus d'la faichon d'un tou: Sonne voulaits pas pour vous, en mains pour vos sembliables, Tâchis d'avé piqui, n'seyis pon comme des diables, Et que chu viert ditton (q'nou vos oit ramassé, Kel bouan Gui est pour tous, et chacun est pour sé), Ne vos entrinés pon, à r'nonchi charitait A chez pouores animaouts, qui d'meure à la Trintait. Et pis qui pus oquo, votte quemin sça pus bé Par ichin, q'par illo, acaouze de chu ruissé, Qui coeur daus les Querières, depis l'pi jusq'au haout, Sou creyis l'assiqui, ou s'estes de fiers begaouts, Qui persistant tréjous à resté dans l'bourbi Meritaits, qu'les Trintets vennes vos en escliaqui, Jusqu'à ce qua la fin y vos faiche endesvé, D'avé manqui (lourdaines) à vos d'zembourbellé. **********
|
Viyiz étout: