àPortinfé, Saint Ou
Jeudi au sé.
Moussieu l'Editeu
Le grand sujet chutte semaine, accordant à la Merrienne, est la tchestchion du tunnel souos l'Fort Régent. Ou n'peut pas comprendre l'action d's Etats en sanctionnant chu projet-là.
“Et” ou s'fit, hier au sé, “I'n'y avait qu'une majorité de deux vouaix pour une djobbe tchi s'en va couôter pas mains d'un d'mié-million. A qu'menchi, tchèsqu'i'peut dithe tchèsqu'i' s'en vont trouver en faisant chu gros creux-là? Craient-i' d'y trouver une mine d'or, ou des diamants, des rubis et d'autres joyaux tch'i'pouôrraient vendre pour lus rêcompenser?”
J'me mins à rithe. “Je n'craithais pas ma vielle,” j'li dis,”tch'ils ont la tête si cratchie comme tout chenna. Oublie patheil gniolin, bouonnefemme, et pense à tchique moyen d'nos garder caud de niet. Sus ses vièrs jours le Rouai David fut forchi d'eprouver un r'miède contre la fraid, mais, par chein qu'nou-s-a liut, i' n'réussit pas, et j'crains hardi que dans ma cas étout, le r'miède ne s'sait pas éfficace.”
“Tu dév'thais aver honte de pasler d'méme,” ou dit. “Tu ès comme le Rouai David, tchi n'amendait pas en vieillissant.”
“Ch'tait pas d'sa faute, lé pouôrre vièr balloque,” j'li dis. “Comme mé, il avait de bouonnes intentions.”
“L'enfé en est pavé de bouonnes intentions” ou dit. “As-tu idée d'aller là pour vaie si ch'est vrai?”
“Oh, grand doux, nennin, Merrienne,” j'li dis. “Je n'si pas si tchuthieux comme chenna.”
A ch'teu, Moussieu, i'faut que j'vos diche que lundi matin, j'eus une bein agréablye visite. Ch'tait man vièr amin, Jack Rondé, des P'tits Canons aut'fais, mais à ch'teu' du Haut d'l'Orme, tch'est tout près. Ch'est san fils tch'est ès P'tits Canons à ch'teu.' Ch'est un garçon bein intelligent, un vrai fermyi et le Jack est bein chanceux d'aver un patheil héthitchi. Lé Sieur Spann, tchi n'a pas amaigri dépis la dernié fais que j'l'avais veu, a accaté une quarantaine ou d'même de bêtes, et tout tchiquechose du miyeu.
Mais i'craint hardi qu'i'n'pouôrra pas r'vénin si Jérri n'accepte pas lé systéme de vacciner les vieaux. En Améthique, i'dit, y'a des milles et des milles jêrriaises, mais chein tchi faudrait à ch'teu pûs qu'jamais ch'est des bêtes nées en Jêrri, et i' sont prêts à en prendre un grand nombre, pourvu que Jêrri aie introduit la vaccination des vieaux. Au moment, et nou n'sait pas trop pourtchi, les vétérinaithes ichîn sont contre, et s'i' continuent à oppôser, dans p'tit temps le commerce entre l'Améthique et Jêrri n'existétha pas. Moussieu Spann vint en Jêrri avec san pèthe à l'âge de seize ans, et comme il est r'vénu bein des fais d'pis, i'dév'thait saver chein tch'i'dit. Nou voudrait saver tchèsque la mâjorité d'nos fermiers en pensent.
Ch't'année y'étha une élection générale pour quatre Sénateurs et j'ai ouï dithe que l'Fred Dorey, qu'a déjà d'l'âge, ne s'sa pas yun des candidats et que l'Tom Le Mathiné n'est pas ocqou décidé. Le seul tchi pathait certain ch'est l'Bill Perchard, mais y'a ocquo l'temps pour d'autres candidats a s'presenter, et j'ai dêja ouï des rumeurs concernant deux Connétabyles d'la Campagne, tchi pouôrraient aver hardi d'support dans lûs pâraisses et ailleurs.
J'n'ai rein d'autre a vos dithe agniet, Moussieu, sinon qu'la Merrienne m'a asseûthé que quand i' y'éthait un pid d'né ou n's'en va r'déshaller avec sa pelle et sa bringe pour cliergi un passage du héchot jusqu'à la porte.
A bétot, Moussieu, et tâchis d'nos donner d'miyeu temps.
Ph'lip
Viyiz étout: