à Portinfé, Saint Ou.
Vendrédi au sé.
Moussieu l'Editeu.
I' s'en pâsse de pùs d'une sorte en Jérri chais jours, mais rein d'si drôle comme la nouvelle qu'à Saint Louothains une femme s'en va contestée l'élection pour Députés.
J'n'ai pas l'pliaisi d'la connaitre, ni la Merrienne ni-n'tout, mais, comme ou l'savez, Saint Louothains a tréjous 'té sa favorite pâraisse, et ou voudrait pôser tchiques tchestchions à chutte femme tch'a yeu l'couothage de s'mettre sûs les rangs. Hier au sé, ou m'en donnit une liste.
"J'sais 'bein que j'n'ai pas d'vouaix là,” où qu'menchi, "mais j'voudrais saver s'oulle est en faveur d'aboli la litcheu et s'oulle est en faveur d'grandes fanmille - ch'est-à-dithe de djix ou douze mousses au mains." Et ichîn Moussieu, i' faut que j'vos diche que la méd'cine tchi s'n'allait nos donner une nouvelle fanmille et de tchi j'vos avais pâslé la s'maine pâssée, est arrivée et qu'la Merrienne en a dêjà avalé une demié boutelle, mais comme je r'fûse d'y touchi, je n'peux pas vaie qu'oulle étha grand êffet.
Continuant avec les tchestchions qu'ou voudrait pôser à chutte femme, ou voudrait li d'mander s'oulle est en faveur du mathiage comme il est célébré agniet, ou s'ou criyait qu'un couplye dév'thaient être permînt des vacances, ch'est-à-dithe que l'homme pouôrrait, une fais par an, s'en aller en Djernézi avec une hardelle, tandis qu'sa femme se trouv'thait avec un autre homme en Sercq. Mé, Moussieu, j'ai 'té pour tchique arrangement d'la sorte pouor bein d's années. Mais jamais j'n'ai ôsé en pâsler à la Merrienne, car j'ai tréjous yeu peux de chein tchi m'arriv'thait.
A ch'teu', Moussieu, pour les élections tchi sont ocquo à v'nîn. En Ville y'a des candidats dans touos les trais districts, et y'a tant d'électeurs tchi n'sont pas intérêssis qu'autchune chose pouôrrait s'arriver. A Saint Pierre, le Sieur Egré est ocquo le favori des deux candidats, mais nou m'dit que l'Sieur Thomas est à faithe des vouaix partout la pâraisse. La Missis Green ne pathait pas s'gêner en changeant d'pâraisse et pathait craithe qu'oulle étha l'support d'assez d'électeurs pour li donner une siège.
Tchi tragédie ès Etats-Unis! Le fait est qu'i' n'sont pas une nâtion, mais un mélange de touos les peuples du monde, et tout ch'qu'i' faut pour assâssiner un Président ch'est un homme tchi n'est pas bein dans sa tête, une arme ou un pistolet et ch'est tout. Quant à mé, j'aime bein mûs être Ph'lip de Portinfé, tchi n'a à ch'teu' autchune ambition sinon de d'meuther un mio pûs près d'l'auberge et d'aver d'bouons amins à m'transporter ichîn et là quand j'voudrais sorti.
À bétôt.
PH'LIP
Viyiz étout: