à Portinfé, Saint Ou.
Vendredi au sé.
Moussieu l'Editeu,
J'ai r'gret d'vos dithe que ma pouôre Merrienne est au liet avec une mauvaise suée d'fraid. Ch'est d'sa faute, sûs un sens, car ou s'en fut d'hors l'autre matin quand i' faisait une fraid d'tchan, et ou salit trais or quatre mouochets d'vant que j'pus la persuader de ramonter à haut. Pouv-ous m'dithe, Moussieu, pourtchi une fraid d'tchan? J'n'ai jamais peut saver qu'un tchan est pièthe quand il a attrapé une suée d'fraid qu'un cat, un lapin ou autchun autre anima, mais comme bein d'autres ditons, nou s'en fait servi sans y penser. Enfin, i' suffit d'dithe que la Merrienne ne sort pas d'san liet sinon quand la natuthe la forche de s'mettre sûs ses pids pour tchiques instants.
Oulle éthait bein voulu v'nîn au grand show d'bêtes mêrcredi, mais j'tais aussi content d'être tout-seu, car quand ou n'accorde pas auve les juges, oulle a la couôtume d'lûs dithe en pliat jèrriais qu'ou considèthe qu'i' sont des achocres.
Eh bein, Moussieu, ayant 'té transporté à Springfield, j'eus la chance d'trouver une tchaise, et l'pliaisi d'vaie un grand nombre d'mes amins. Parmi yeux y'avait le bouonhomme Walter Gruchy, le grand Cap'taine Bolitho, Fred Dorey, Ph'lip Le Vesconte, Edgar Mouothant, le Chantgni tch'avait 'té mordu par un tchan et tch'en porte ocquo les mèrques, et l'Jack Rondé, tchi gâgnit l'championnat du show avec sa Belmont Greta, une vaque qu'a treize ans pâssant. La belle vaque, Graceful Lady, au Sieur Richardson, avait douze ans quand ou fit l'championnat, et j'n'éthais jamais pensé qu'une vaque pûs vielle éthait peut l'faithe, mais si-fait, et les juges ne s'trompîtent pas en li donnant l'honneur.
J'vos ai dit que l'Sieur Rondé eut un grand jour. Nou-s-avait ouï tch'il avait 'té friponné par un êtrangi, et avait accaté plûsieurs bêtes pour li mais heutheusement i' n'avaient pas sorti de l'Île, et Jack Rondé n'est pas responsablye.
Eugène Perrédès avait une bouonne vaque au show étout, mais quand oulle 'tait arrêtée ou donnait un mio dans san dos; autrement nou n'peut pas dithe tchèsqu'i' se s'sait arrivé. À l'prendre tout travers, ch'tait un bouon show pour le mais d'août, mais nou-s-est seux d'vaie miyeu au mais d'octobre.
J'n'ai pas l'honneu d'connaître la nouvieau Juge, le Sieur John Herbert Pallot, car y'a tant d'Pallots dans l'Île que nou n'peut pas les connaître tous. Le sien que j'ai connu l'mûs dans l'couothant d'ma vie ch'tait le bouan corps que nou-s-app'lait le P'tit Bouondieu, tchi d'meuthait dans chu temps-là à la Trin'té ou Saint Martin. Dans l'mitan de la saison d'patates i' faisait entrer touos ses Bretons et lûs prêchait un p'tit sermon. I' n'a pas laissi d'successeurs souos chu point-là. Il est à espéther que l'nouvieau Juge vivra longtemps pour jouï de s'n honneur. La Merrienne et mé j'li souhaitons tout succès.
J'eûmes grand r'gret d'entendre d'la mort du Ned Syvret, un bouon homme, et un bouon citoyen. I' s'en fut dans un moment, et quand nou veint à y pensé, ch'est là la miyeu manièthe de s'en aller, car nou n'souffre pas et dans un instant nou sait chein que j'voudraimes tous saver, ch'est à dithe tchèsqu'i' y'a d'l'autre bord.
Le lettre de l'Avocat Giffard, condamnant le Comité des Louogements, dév'thait faithe les Etats réaliser qu'un changement est absolûment nécessaithe car, comme dit le Sieur Giffard, le présent système est injuste, et si chonna continue i' n'y'étha bétôt autchune liberté.
Une bein drôle de situâtion au sujet des nouvelles patates a 'té expôsée par le Sieur Edouard Le Gresley, tchi s'trouve en dette de douze ch'lins et d'mi après aver exporté des tonnieaux au mais d'juillet. I' n'dit que la véthité en r'mértchant que dans chutte transaction i' n'y a pas d'profit pour le fermyi, même quand y'en éthait pour la compagnie connue souos l'nom de la J.N.P.M.O. Comme les choses ont changi! Dans man temps nou cachait sûs l'Bridge, et nou vendait, au marchand tchi vos offrait l'miyeu prix. Même si l'prix 'tait bas, nou pouvait aller à la store et r'chever ses sous, pourvu que nou ne d'vait pas trop au marchand. Je n'dis pas que le fermyi faisait une fortune, mais au mains i' r'venait siez-li avec tchiques coppeurs dans sa pouchette, pourvu qu'i' n'avait pas arrêté à trop d'auberges sûs la route!
Assez pour à ces sé, Moussieu, et n'allez pas d'hors quand l'temps est fraid!
Ph'lip.
1963
Viyiz étout: