L'Assembliée d'Jèrriais
Un dêbat à la rêunion mensuelle
La rêunion mensuelle du mais d'mars eut lieu dans la Salle Pârouaîssiale dé St. Louothains et eune nénantaine dé membres lus y rêunitent.
D'vant c'menchi l's affaithes, lé Président, lé Sénateu P. J. Romeril, d'mandit ès membres dé lus l'ver et observer eune minute dé silence en mémouaithe dé Mde. Malzard.
Lé Président fit la beinv'nue au Docteu A. L. Carré et sa danme et dit qu'il 'tait bein content dé les r'vaie auve L'Assembliée et les trais Présidents d'Honneu étout.
Lé rapport du jeu d'cartes fut liu et accepté et quatre nouvieaux membres fûtent êlus.
Les affaithes finies, lé Sieur G. J. Perchard prînt la tchaîse pour lé dêbat. Lé Sieur Perchard dit qué bieau qué tous qui s'en allaient prendre part dans l'dêbat étaient membres dé L'Assembliée d'Jèrriais, nou pouvait étout dithe qu'i r'présentaient la pâraisse dé la Trinneté car il' avaient tout 'té nés dans chutte pâraisse-là!
Ches quatre bouannes gens étaient d'Député A. C. Quérée, Mde. R. Le Masurier, l'Sieur E. B. de Gruchy et Mde. F. de la Mare, et auprès l's aver întroduits à l'audience, l'Sieur Perchard explyitchit lé sujet, “Ch'est pas les sou tchi font l'bonheu”.
L'proposeux
Ch'tait lé Sieur E. B. de Gruchy qu'ouvrit l'dêbat en proposant la motion et il 'tait êvident du c'mench'ment qu'il avait bein êtudié l'sujet, car il 'tait bein à s'n'aise dans san discours. I' c'menchit par souosl'ver trais points qu'i' comptait les pus importants, ch'est à dithe les sou, lé bonheu, et la personne. Les sou, qui n'sont qué d'l'argent et du cappeur - empliyés pour l'êchange, sont nécessaithes, mais n'font pas l'bonheu qui veint rein qu' quand nou mène eune vie coumme i' faut. Ch'est la disposition et l'caractéthe dé la personne qu'asseûthe lé bonheu.
Lé Sieur de Gruchy continuit par explyitchi coumment qu'i' l'y avait trais sortes dé gens dans l'monde et comment qu'les sou influençaient chaque groupe. I' racontit eune histouaithe pour montrer san point et maintenant qué nou trouve lé bonheu dans l's affaithes qui nos intérêssent et qué ch'n'est pas chein qu'nou possêde mais chein qu'nou s-est et chein qu'nou fait qu'amène lé bonheu. Quand lé Sieur de Gruchy finit san discours auprès aver pâlé pour vîngt minutes, il 'tait êvident qu'chein qu'il avait dit 'té bein apprêcié, car i' r'chut des grands appliaudissements.
L'opposeux
Lé Député A. C. Quérée, proposant l'amendement, avait bein êtudié san sujet étout et comme lé Sieur de Gruchy, il avait trais points qu'i' comptait contribués au bonheu - la santé, lé succès et la r'ligion (la fouai). I' fît vaie coumment qu'les sou 'taient associsé d'bein près auvec ches trais choses-là, car dans s'n idée les sou ôtaient la gêne et 'taient un moyen pour aîdgi ès siens au besoin. I' racontit eune pétite scène pour montrer coumment qu'lé bonheu v'nait quand nou-s-avait assez d'sou pour aîdgi à d'autres; i' pâlit des grands changements dans la vie d'un tas d'gens, surtout les anciens et les malades dépis l'arrivée des pensions et bénifices qué nou r'chait à cause du système d'asseûthance couothu par les Êtats. Toutes les choses dé la vie moderne qu'amène du pliaisi, la télévision, les motos et toutes autres choses qu'aide à faithe la vie mains duthe, amènent lé bonheu et ch'est les sou qui font chu bonheu-ichîn possibl'ye, si les gens ont l'bouan sens dé réaliser qué les sou nos sont donnés pour nous à les posséder et pas les sou à nos posséder!
Lé s'gondant d'la motion
Ensuite Mde. de la Mare s'gondit la proposition au Sieur de Gruchy, prennant pour exampl'ye des millionaithes et d'autres gens conmus pour lus richesse, racontant coumment qué l'fardé dé touos lus sou les rendait malheutheux. Auprès eune scène ou deux pour explyitchi mus san point, ou' finit par ramémouaither dé bein des înstances, où'est qu'des gens avaient perdu tout bonheu auprès aver gangni des fortunnes à gagi, etc.
Lé s'gondant dé l'opposition
Mde. Le Masurier, en s'gendant l'amendement, dit, coumment qu'dans s'n idée les gens trouvaient l'bonheu en aîdgant ès charités qu'existent pour toutes choses. D'aver tout pliein d'sou et pouver posséder toutes les bieautés dé chutte vie et janmais n'sé gêner du couôtage, né pouvait pon sinon amener lé bonheu, mais, coumme lé Député Quérée, oulle 'tait prête à admettre qué les sou sont à la rachinne dé bein du ma s'nou les laîsse vos posséder.
Lé Sieur de Gruchy, en r'pâlans pour tchiques minutes, souosl'vit tchiqu'uns des poînts fait par l'opposition auve tchi qu'i' n'tait pas d'accord, et l'Député Quérée en fit autant étout.
Lé vote
Lé Sieur G. J. Perchard explyitchit à l'audience qu'il' 'taient d'mandés dé voter pour les siens qué dans lus idées avaient mîns lus points lé mus. Lé rêsultant du vote étant quarante-six pour l'amendement et dgiex-huit pour la proposition.
Ermèrciêments
Lé Président èrmèrcyit tous qu'avaient prîns part dans l'dêbat pour l'întérêssante séthée.
Les raffraîchissements, sèrvis par lé Conmit, Exêtchutif, fûtent apprêciés par tout l'monde. Lé Président finit par èrmèrcier tout l'monde pour être v'nus et l'Connétabl'ye pour l'usage dé la salle acouo eune fais.
1969
Viyiz étout: