Lé bouonhomme Âmice d'la Perrelle entrit dans l'Marchi la Sèrvelle dé Noué trîmbalant san p'tit tcheriot drièthe li, et là, sus l'pavé, il apèrchut un maigre nièr et blianc tchian, à doux bruns ièrs - "exactément comme lé vièr Fido", pensit Âmice. I' s'mînt à fliatter la tête au vièr tchian et i' vit qué la pouôrre bête trembliait. “Bouôn vyi, reste là," s'fit Âmice et i' s'en fut dans l'Marchi pour faithe tchiques acats.
"Pouortchi qué jé m'sis embêté d'Noué ch't année?", s'fit l'bouonhomme.
Tch'est qu' ch'tait qué chu pèrrot-la li'avait dit jeudi pâssé? Sa p'tite caûmiéthe v'nait d'être vendue à un homme d'Angliétèrre et ch'tait mus dé l'dgerni qué, sans doute, i' s'en allait èrchéver un papi l'avèrtissant dé tchitter sa vielle démeuthe. Éyou qui s'en allait démeuther? Pas dans ieune dé ches modernes maîsons-la! Ah danme nan! I' s'rait mus mort!
Les gens lé r'gardaient quand i' dêhalit san mouoché, êssuyit ses ièrs et s'mouochit l'nez. I' s'en fut un p'tit but jusqu'a siez l'bouochi, éyou qu'il acatit un p'tit picot et un mio d'lard, et pis i' lî fallait du fruit et des nouaix et une boutelle d'ieau-d'vie. Dépis la mort dé sa femme, i' y'avait chînq ans, il avait tréjous célébré Noué comme sa Laura avait fait, mais après ch't année? I' n'voulait pas y penser.
I' sortit du Marchi et, lé tchoeu lourd, i' c'menchit lé trajet jusqu'à sa p'tite cauminne au Mont au Prêtre, mais i' sentit tchique chose driéthe li et i' vit qué l'vièr maigre tchian lé suivait.
"Va t-en siez té!", lî fit Âmice, mais l'tchian châtchit la coue et lé suivit tout l'temps. Lé bouonhomme sé sentait content et à s'n aise auvec chutte vielle bête-la - i' r'sembliait tant à lus vièr Fido.
"Eh bein, vielle maigrache, t'en vas-tu v'nîn m'aîdgi à mangi toutes ches affaithes ichîn pour Noué?", s'fit Âmice, et i' pensait qué l'tchian et li-même prannaient couorage iun
d'l'autre.
Quand il' arrivîtent à ieune des boutiques dé charité, Âmice dit au tchian dé s'assiéthe déhors et il entrit pour li'acater un colyi. Après tout ch'tait Noué!
"Man Doue", s'fit la femme dé la boutique, "ch'est qué vot' tchian est bein obéissant, valet! Tch'est qu'est san nom?"
"St. Nicolas!", rêponnit Âmice et i' dit à li-même "Jé crai qué j'sis fo! Pouortchi qué j'ai dit d'ité'?".
La danme lî souhaitit un bouôn Noué tout en patchant lé présent et Âmice lî dit qu'il espéthait qu'oulle éthait eune bouonne nouvelle année. Pis les deux vièrs, homme et tchian, lus en fûtent pour lé Mont au Prêtre. I' v'naient d'arriver et Âmice avait justément ieu l'temps dé souongni l'tchian quand i' vit un grand moto dans l'bel. Lé tchian sé mînt à ouasser et Âmice sortit en temps pour vaie un haut moussieu qui s'en v'nait envèrs li.
"Mais ch'est lé janne 'Douard Lé Boutilyi! Entre, man garçon, entre!"
L'homme suivit Âmice et i' s'en fut s'assiéthe dans la grand' tchaise tandis qué lé vyi sé mînt à ravigoter l'feu.
"Un p'tit verre d'ieau-d'vie, man garçon? Et tch'est qui t'amène ichîn, j't'en prie? J'pensais qué tu 'tait hors pays depis assez d'années."
“Vîngt ans", s'fit 'Douard. "Ou savez bein qué man p'pèe fut oblyigi dé vendre la grand' maîson, la fèrme et chutte pétite caûmiéthe ichîn quand i' n'pouvait pas affaûrder dé les garder. Mais, mé, j'ai travailli dû en Angliétèrre et i' y'a un mais, quand j'ai ouï qué tout 'tait à vendre, j'sis v'nu acater l'mênage. Ch'est à cause dé chenna qué j'sis ichîn pour vos dithe qu'ou pouvez rester ichîn pour tréjous. Mais, j'vai bein qu'i' s'en va fallait des frais!"
Lé 'Douard promînt qu'i' veindrait auvec sa femme et ses deux êfants dans deux'trais jours et tout en sortant il apèrchut lé vier tchian.
"Ch'n'est pas Fido, ch'est-i'?"
"Ah, malheureusement nan, mais ch'est man St. Nicolas. J'vos attendrai la s'maine tchi veint. Un bouôn Noué à toute la fanmil'ye".
Âmice sé mînt à chèrfouoilli dans eune bouête dans la p'tite armouaithe souos la montée, et i' dênichit des vielles chaînes en papi pour décorer la grand' tchuîsinne. Après tout, malgré qu'i' 'tait vyi, i' voulait montrer ès êfants à Moussieu 'Douard que l'esprit dé Noué vivait acouo dans la vielle caûmiéthe.
Lé tchian montit sus la grand' tchaise et s'assiévit à r'garder san maître, et Âmice pensit à sa femme et i' savait qu'oulle éthait 'té bein contente qué St. Nicolas 'tait arrivé dé si bouonne heuthe siez ieux ch't année-là!
Joan Tapley
Viyiz étout: