Quand j'lius dans la gâzette qu'la chant'rêsse Améthitchaine Britney Spears s'tait mathiée et dêmathiée à Las Végas en eune journée, j'pensis à eune anmie Angliaîche tchi s'y mathyit y'a tchique années dans ieune d'ches souô-disantes “chapelles ès neuches” où'est qu'la cérémonie fut présidée par un dêdgîthé en Elvis. Jé r'chus la preuve qu'un mathiage d'même peut duther quand, auve sa carte dé Noué dé ch't' année, ou m'envyit un photo d'sa fil'ye nouvelle-née.
Même auve not' nouvelle louai j'n'éthons pon d'neuches à l'Elvis ichîn en Jèrri, mais i' sembl'ye qué l' mathiage, et l'èrmathiage, sont pus populaithes aujourd'aniet qu'janmais - et y'a des pays dans tchi qu'la louai a 'té changie à seule fîn d'allouer l'mathiage (ou la “parchonn'nie enr'gistrée”) d'pèrsonnes d'un même sexe.
Tout comme, lé divorce est pus aîsi qu'au temps pâssé, et bein des gens aiment mus vivre ensembl'ye pustôt qué d'lus mathier. Mais y'a des coupl'yes tchi restent mathiés pouor bein d's années et tch'arrivent à mèrtchi lus neuches d'or auprès chînquante ans, ou lus neuches dé dgiamant auprès souaixante ans.
Nou sait étout qu'les neuches d'argent sont célébrées auprès vîngt-chînq ans, mais avaû l's années nou-s'a înventé d'aut's manniéthes dé célébrâtions. Lé preunmié annivèrsaithe des neuches est s'lon la couôteunme les neuches dé papi, et pis lé coton pouor l'deuxième, lé tchui pouor l'traîsième, et ainchîn d'siette. L'iviéthe mèrque lé quatorzième et l'crista l'tchînzième, mais nou-s'éthait creu qu'un mathiage tch'a duthé vîngt ans es'sait pus fort qu'la porcélaine!
Jé n'sais pon tch'est qu'nou dév'thait offri coumme présent pouor un mathiage à Las Végas tchi n'duthe qué vîngt-quat' heuthes, mais s'lon lé vièr diton, y'en a pus d'mathiés qué d'contents!
Geraint Jennings
Viyiz étout: