 eune pie |
I'n'y'avait pon soin si'nou les compter d'bouonne heurthe lé matîn ou d'vant la niet, ou même sus l'haut du jour sus l'coup d'méjeu, mais i'fallait l'faithe envithons la même heurthe chaque jour, et bein seux à la même pliaiche - autrement si'nou les compter ichîn et là, deuse-trais fais par jour, naturellement nou'pouôrrez vaie et compter les mêmes s'ouaîsieaux au mains quat' ou chînq fais. V'la tchi f'thait ni rînme, ni raison parmi les chiffres.
Nou'criyez d'vant, que pus au mains lé p'tit mouosson 'tait presque sus l'pus, mais nou'fait d'gia, ch'est-li, lé p'tit peûle, tchi s'trouvi d'veu lé pus d'fais ! Yen à acouo'the deuze-trais par ichîn tchi font lus nids dans les creux laissiz par les machons dans l'pîgnon des batîsses d'êtabl'ye - où'est qu'lus chaûfaud en bouais dépassée la neuve muthâle.
D'habitude ch'est un nid fait un mio à la vitesse. Y'a d'l'êtrain, des buts d'fain, d'la vieil'ye laine, d'la mousse, des toutes les sortes i'faut l'dithe, et y'en à presqu'autant tchi pend pardessus l'bord avau l'pîngnon. Ch'est la même boutique parmi les nids qu'nou trouve dans les bouais - un nid fait à la grosse ieau!
J'né pensez pon danme qué l'étourniau ésait v'nu deuxième. J'sais bein qué quand un fliotchet d'etourniaux pâsse ch'est pon un seul s'ouaîsé à la fais, et comme tchi c'menchi à les compter? Epis quand même, eune fais sus tèrre i'n'restent pon en pliaiche bein longtemps, v'la tchi pilvâque et bouoge partout.
Lé rossîngno est haut monter et traisième, v'la n'mé ravi pon - un bieau p'tit ouaîse chennechîn, doux et aimabl'ye.
Lé p'tit moussieu ou bliûtins, i'viennent quatrième en nombre, des vérthitabl'yes critchets, i' sont si leste et bouoge si vite. I' peuvent êpinnotchi des graines tandis'tch'i'sont d'pendu chein d'ssus d'ssous, sus l'travèrs ou sus l'longs, n'împorte sus tchi manniéthe - lé sang n'dait pon lus monter à la tête.
 un mêle |
La pie lyi 'tait septième, êgal en nombre auve lé vert mîngnon ou linnot. J'pensez p't'être qu'y'avait bein pus d'pie par les c'mîns - i'm'sembl'ye qu'nou les vais partout, que's'ait l'tou du gardîn, en pliein clios ou alentou bouais'sie. J'pensez d'liéthe qu'y'en'avait des milles, mais ch'est p't'être lus couleu d'nier et blianc tchi frappe 'yi et tchi nos fait penser qu'y'en'a p't'être pus'qué'l'vrai neunmétho.
Les deux préchain d'vant touos l'restant 'taient la p'tite rouoge-gorge et la grive. Deux bieaux s'ouaîsieaux chennechîn valet. Si hein couleu'thée et mèrtchi. J'aime hardi ouï la grive quand ou's'trouve en pliein chant - p't'être dé bouonne heurthe lé matin quand lé jour sé fait et qu'la tourtérelle à p't'être ma à la gorge et est acouo'the au lièt. Etout quand ou's'trouve jutchie sus l'but d'eune branque, fieil'yes acouo'the en bouton, et qu'ou chante sa chanson en plieine vouaix juste comme eune p'tit'achie d'plyie s'met à tchaie.
N'faut pas qué j'manque lé p'tit raîtlin-li, tchi s'trouve lé trezième. N'pas un bouon neunmétho souos-disant, mais un p'tit ouaîsé qu'j'aime hardi étout. I'l'est promt valet, i'n'reste pon à la même pliaiche pouor bein des s'condes n'i'tout. L'aute'jour j'en vis ieux d'actuellement d'arrêter, à prendre eune gorgie d'ieau d'eune p'tite source tchi couôrre dans l'pré, souos nous ichîn dans l'mont.
Naturellement quand chut'exercise'chîn eu lieu, l'hithondelle n'tait pon acouo'the èr'venue pour l'érnouvé. I' devent èrvénîn aut'chun jour a'ch't'heuthe - ch'est souvent l'tou d'la St Georges, lé 23 d'avri qué'nou'r'c'menche à les vaie, si pas d'vant.
Tchi pliaisi d'les r'vaie acouo'the eune fais! Ch'est singne que l'èrnouvé est'chîn, et d'un'aut'été à suivre, et qu'tout est bein.
Ted Syvret
Viyiz étout: