|
Durant les douze derniers mais N'ou n'a pâlè que de banqueroute, De gens qui respectès aut-fais N'en ont pas mains fait fausse route: Nou d'vise à ch-t-heu d'un comiti Qui veurt faire la même chose, Qui du r'venu de tout Jerri Sans gêne follement dispose; De pus il est hardi encllin A siere la nouvelle mode; Quand i' n'y a pus de butin Nou n'a découvert rein d'pus c'mode Que de vivre sus des emprunt Aussi longtemps que l'crédit dure; Quand nouz a rejoint les défunts, Nouz est à l'abri de l'injure, Mais pour le mains, en attendant, De la situation nouz est maître, Et nou peut vivre en gal-bouan-temps, Et toutes les gronneurs envyer paitre. Quand nouz est mort ch'est pour longtemps Parait être un diton fort sage: Qu'les gens saient marris ou contents De tout l'argent nouz a l'usage. La chose dont il est besoin N'est qu'un simplle débarcadère, Mais nou s'en va prendre bouan soin Qu'ous ne l'ayiz que la dernière, Car si nou vouos donnait demain De qui si simplle et si facile, Ous verriez que le reste à rein Ne peut servir ou être utile. Ous viyiz donc que les tripots Ne sont pas ocouo hors de mode, Que de faire payir les sots Nou connait fort bein la méthode: I' faut à la fin d'chaque mais, Pour payir cht'oeuvre de génie, Quinze chents louis ou à peu près, Je n'exagère pas un' mie, Et je n'inclus pas les fricots Que chu bouan comiti se donne; S'i' li pliait d'mangir des picots Qu'est que v'la qui fait à personne; Car ous d'vez saver oprès tout Que ch'est li qui garde la bourse, Et fairious pon de même étou S'ous aviez une itelle ersource. Un vier Jerriais 1874
|
Viyiz étout: