Les Pages Jèrriaises

L'GROUNEUX.

PAR DÉMOUÊSELLE CHÉRUBINE VASSE,
Cousine ermuèe de Wace, le rhymeux.

Jamais content, grounant trejous,
Du Dimanche à la fin d'la s'maine
I fait des ruoaux et crie sur tous;
Ch'est chance qu'i n'en perde haleine:
Vraiment, je crei, si n'pouvait mus,
I groun'nait, crierait, accuo pus.

Jamais content! ah, ch'est bein triste;
Trejous cherchant, trouvant des d'fauts
A grifuoillir sus sa black list,
Pus qu'les gens n'en ont sus leus dos:
S'i n'en connait, il en invente,
Tant que sa malice est méchante.

Jamais content! le malheureux
A le r'gard su coume est l'vinaigre;
Devrai! dans des temps, j'en ai peux:
Ergardèz, coument j'en d'veins maigre;
Pas une goutte de buon sang.
Je n'fais, hélâs, dans aucun temps.

Jamais content! quand des allouettes
Li cheirraient rôtis dans son bé;
I n'li faudrait pas pus d'attouettes
S'il 'tait corpora, prince, ou roué:
Le cat qui ronne au coin de l'âtre
N'est pas un pus fière cadâtre.

Jamais content! si notre avé,
Coume tout autre êfant qui s'amuse,
Fait l'moindre brit, l'moindre tiné,
V'la tout-à-co qu'i vuos l'abuse:
I crie en haut coume un bragi,
Et heurle coume un enragi.

Jamais content! ah! i nuos doune
Du fil à r'teurtre, mes amins;
(Ne v'lo-t-i pon, ma fei, qui groune,
Parceque j'ai mes shabots mins
Au pid d'l'us de la cherquerie:
Ch'la seul peut le mettre en furie).

Jamais content! quand i fut nè,
Nou dit qu'i c'menchit sa groun'nie;
I fut de l'êcole renviè,
I n'faisait que de la boud'die:
Tout ch'qu'i savait d'arithmetique,
Ch'était de rouâbller en pratique.

Jamais content! quand je l'marii,
I grounnait même dans l'égllise;
De l'tanchir là, j'fus oblligi:
J'lî dit: "ne vei-tu pon qu'nou d'vise
De chein qu'tu fais un' tè camas;
S'tu veurs grouner, eh! groune en bas."

Jamais content! ch'est inutile,
Nou gard'rait mus la mer d'monter,
Que de l'garder jamais tranquille;
Rein n'peut dutout le dêmonter;
Tout, n'importe la chose, il affronte,
I n'connait pon la moindre honte.

Jamais content! si sen travas
Ne fait pon de suite à s'n-idèe,
Ch'est bein mei qu'en ait l'embarras
Jusqu'a-c'que la tête ébédèe,
Je cueurs afin d'lî v'nin au s'cours,
I crie et brait coume un grand ours.

Jamais content! Ah! puores filles,
S'ous voulèz êcouter m'n-avis,
Et n'aller pas dans des péguilles,
Coume ous viyiz que mei je l'sis,
(Car lî d'mander des hardes j'nose,)
Restèz sans marier pour un' pause.

Jamais content! ah! s'ous marièz,
Ergardèz bein au sorte d'houme,
Mes puores èfants qu'ous prenez:
Ne restèz-pas filles, tout coume,
S'ous pouvèz mus; mais ayiz peux
De marier jamais un grouneux.

 

A. A. L. G.

Vèrsion modèrnîsée et raccourchie:

Janmais content, gronnant tréjous,
Du Dînmanche à la fîn d'la s'maine
I' fait des rouaux et crie sus tous;
Ch'est chance qu'i' n'en pèrde haleine:
Vraîment, jé crai, s'i' n'pouvait mus,
I gronn'nait, criethait, acouo pus.

Janmais content! lé malheutheux
A lé r'gard sû coumme est l'vinnaigre;
Dévrai! dans des temps, j'en ai peux:
Ergardez, coumment j'en d'veins maigre;
Pas eune goutte de bouôn sang
Jé n'fais, hélâs, dans autchun temps.

Janmais content! quand des alouettes
Li tchèrraient rôtis dans san bé;
I' n'li faudrait pas pus d'atouettes
S'i' 'tait corpotha, prînce, ou rouai:
Lé cat tchi ronne au couain dé l'âtre
N'est pas un pus fièr cat d'âtre.

Janmais content! si not' avé,
Coumme tout autre êfant tchi s'amuse,
Fait l'maindre brit, l'maindre tinné,
V'la tout-à-co tch'i' vos l'abuse:
I' crie en haut coumme un bragi,
Et hueûle coumme un enragi.

Janmais content! quand i' fut né,
Nou dit qu'i c'menchit sa gronn'nie;
I' fut dé l'êcole renv'yé,
I' n'faisait qué dé la boud'die:
Tout ch'qu'i' savait d'arithmétique,
Ch'était de rouâblier en pratique.

Janmais content! ch'est innutile,
Nou gard'rait mus la mé d'monter,
Qué dé l'garder janmais trantchil'ye;
Rein n'peut dutout lé dêmonter;
Tout, n'împorte la chose, li affronte,
I' n'connait pon la maindre honte.

Janmais content! si san travas
Né fait pon dé siette à s'n idée,
Ch'est bein mé tch'en ait l'embarras
Jusqu'à ch'qué la tête êbédée,
Je tcheurs afîn d'lî v'nîn au s'cours,
I' crie et brait coumme un grand ours.

Janmais content! ah! s'ou mathiez,
Ergardez bein au sort-é d'houmme,
Mes pouôrres êfants qu'ou prannez:
Ne restez pas fil'yes, tout coumme,
S'ou pouvez mus; mais ayiz peux
Dé mathier janmais un gronneux.

 

Viyiz étout:

 

Les Pages Jèrriaises