A Moussieu l'Editeu d'la “Nouvel' Chronic de Jêrri.”
Moussieu, - Ez-iez-t'ous la bontè de mettre ma proum'nâde sux vô'tre gâzette. J'tême pour aller, mè et l'couôzin Joe à Pontac le Lundi d'Pâque, mais j'en i'allîmes pon. Le Vendredi le derni d'Avri, n'ou noues dîts que l'r'égiment du Nord-voie s'en allait ès Blianche-Banques, pour la premièze fais, et que l'Coronel Mouezant s'en allait c'mandé pour la premièze fais? l'Couôzin Joe m'dits si tu veurs, g'y-zont; m'en est drein j'ly dits. Sus l'coup, j'mîmes la frême dans l'chezjiot et noues v'là en roûte pour le viage. Arrivés-là sus la plièche, je noues mîme bas sus l'herbe, pour un miot (d'rest). – Dans un moment, n'ev-là l'coup d'appel, et n'ev-là les Soudars rangies, l'Couozin Joe m'dits apprêche pus près, et j'apprechimes; j'lis dits, c'hest chut miot d'fé la que c'h'tina traine? Le créziez-t'ous? l'achocre s'mîns à m'rize au nèz, et eut l'affront d'mappelé “baveux.” Ah j'lis dits, affronté qu'tais, n'ev-là coumme tu m'sert. Tait té, i'm dits, c'hest un Offici, et c'hest san sabre c'hit traine. Ah j'lis dits, c'hnest qu'un mousse, i' n'a pon un brin d'barbe, et il à les crînes copais au raz-d'là tête. S'em fit-i, c'hest la mode Anglaîches. – Oh vez-ia j'lis dits. J'passîmes la prumièze compagnie, qu'attrapi une belle ronde d'exercisse. – La prechaine fut bain c'mandais par un Captaine qu'avait d'la voix; j'dis au couozin Joe, n'ev-là-ti du monde qu'a la mine frais. C'hest seux man Jan, s'em-fit-i. J'allîmes pus i'en à la prechaine, No. 3, et j'lis dits, coumment qu'tapelle chet-chin, i'm dits, c'hest Saint-Jean, oh, j'lis dits, le Mont-Mado? Vaize-yia i'm dits, du monde mauvais et robuste, c'hest sus l'Nord. Enfin, l'est v'la tous à stand at ease, et pis attention; j'dis à Joe c'hest bain fait man vieux. N'evla l'Captaine qui crie port arm – Oh, ma-fé, j'dits à Joe qui sorte d'rill qui l'ont ach-teu dont. Un Moussieu qui tait auprès d'nous, noues dits c'hest qui s'est trompé. J'lis dits si c'htait un soudar, i' l'enreviezaient pour quarante drill avec l'savèrres à l'Arsenal.
Enfin j'ergardîmes bain et j'entendi l'Offici pâlai de cravet et d'cravatte, et i' châchait la tête, dans un clin-d'yi et n'ev-là t'it pon un soudar allé pâlai au Coronel. Well done, j'dits, pus tard n'ou noues dit que l'Offici voulait l'is faize allè sa cravatte.N'en v'la d'la Milice Anglaiche, i'lus donne des brès et des bottes, une casaûque et deux castôs, et une ernèss pour les liet, c'hest bain un bel attelage, mais l'us baille t'i des qu'minzes et des drâzes pour qu'in mettres pon d'cravatte. – Eh-bain, Moussieu l'Editeu, j'voues dizai qui l'is faisait grand fré? Oui du vent pour y venté sept d'giables. I'n l'a allait pon sa cravatte, et y fit ma-fé bain, i'l avait la gorge comme un piéton d'caûche, faut-i s'en ravi d'la fré c'hit faisait. Quand l'Gouvernement l'us donnà des cravattes, i'l suz f'zont allé.C'hit consulte la loi d'la Milice s'ou l'us d'fend d'mettre des cravattes quand i' f'za fré. Si un soudar t'tait prins des maux d'gorge et qui portezait san compte de Docteu à san Captaine, l'y bâdrait-i un maigre 10 shellins pour fini d'peyi san compte. Eh-ben Moussieu l'Editeu criyous que ch't'offici là avait d'la conscience.
Enfin, j'arrêtîmes pour vais le march past, et j'voues dizai Moussieu l'Editeu, qui marchaient bain, et qui l'avaient la mîne bain contents. Principalement No. 3, il avaient la mîne d'aimer bain l'us Captaine. Eh-ben tant-mûs, tant pus qui l'aimezont tant pus il z'aimza.
Je voues salue Moussieu l'Editeu, et j'sis
Maîte Jan,
L'Couôzin au vaisin Joe.
Nouvelle Chronique de Jersey 1886
Viyiz étout: