Les Pages Jèrriaises

Des Mêtchièrs Bêtchuits

Lé bantchi prêtit un cahouain;
Lé soudard tithit eune tchulyi;
Lé couque bouoillit eune salle dé bain;
L'auteu êcrivit eune souothis;

Lê pêtcheux happit lé ouadinne;
Lé boulandgi fouangnit la soeu;
Lé barbyi copit la tchuîsinne;
Lé journaliste publyit lé tchoeu;

Lé tchèrbonnyi d'livrit les frâses;
Lé dentiste êrachit un fa;
L'avocat atchûsit des drâses;
Lé bâtisseux bâtit un cat;

Lé sonneux jouit lé c'mîn dé fé;
La chant'rêsse chantit la câsaque;
Lé juge atchittit l'marmoûset;
Lé porteux d'lettres portit eune vaque;

Lé poète rînmit lé chînment;
Lé tchèrpentchi fit lé coucou;
Lé plionmi r'griyit lé héthan;
Lé sèrveux sèrvit lé gris loup;

Lé cacheux cachit l'encriyi;
Lé minnistre baptîsit l'êcale;
Lé stchulpteux stchulptit la rithie;
Lé voleux volit la muthâle;

Lé couôtuthyi couôthit d'la né;
La nosse souongnit la taupinniéthe;
Lé bracheux brachit la fîsée;
Lé nettisseux nettit la priéthe;

Lé pliâtreux pliâtrit lé chuchot;
Lé gardîngni pliantit lé lion;
Lé minneux dêfouit lé pithot;
Lé docteu dgéthit lé lampion;

Lé Sénateu votit l'bouôlias;
Lé policemainne arrêtit la fliambe;
Lé gardgien gardit l'pataflias;
Et l'encanteux vendit la gambe.

 

Geraint Jennings
Novembre 2002

 

Viyiz étout:

 

Les Pages Jèrriaises