La rêunion mensuelle eut lieu vendrédi, l'28 dé févri, dans la Salle Parouaîssiale dé St. Jean, et bieau qué ch'feusse un temps embarrassant pour les fermièrs, au mains 130 membres lus y assemblyitent.
L's affaithes
Parmi l's affaithes pour la séthée, lé rapport dé la rêunion du mais d'décembre passé, et l'sien du diner annuel fûdrent lius et approuvés. Siez nouvieaux membres futent êlus, et la correspondance fut liue.
Annonces
Lé Président donnit l's arrang'ments pour la préchaine rêunion comme un jeu d'cartes, lé 20 d'mars, dans la Salle Parouissiale dé St. Pierre.
Ch'est l'intention que L'Assembliée accepte eune invitation d'visiter la vielle Abbaye d'la Lucerne pour l'excursion ch't êté, et d'l'information bein intérêssante entouor fut donnée par lé Président et, auprès, par Mme. P. Green, qu'a dêjà 'té vaie chutte belle pliaiche et en est si enchantée.
I'y avait eune invitation étout par lé Rév. L. F. M. Helleur à un service Français pour la S'maine Sainte, lundi, l'23 d'mars, à l'Eglyise dé St. Pierre.
L'divèrtiss'ment
Lé Député Quérée annoncit l'restant d'la séthée dans les mains dé Moussieu et Madanme Garnet Pallot, qu'avaient arrangi eune bordée dé “Tchi Mêtchi?” Ch'tait sus l'prîncipe du programme “What's my Line?”, bein connu sus la télévision, mais sans doute les membres s'entré-connaissent tous, et fallit faithe tchiques chang'ments.
Les danmes K. Le Maistre, F. Perrier et P. Robert et les Dlles. L. Picot, C. de Gruchy et R. Amy et l'Senateu P. J. Romeril, l'Connétablye W. P. Le Marquand, l'Député C. P. Billot et les Mêssieux G. Perchard et J. Gibaut avaient 'té d'mandés dé r'préthenter eune variêté d'mêtchièrs. Parmi les danmes i'y avait eune nosse, maitrêsse d'êcole, vendrêsse dé pétrole, tondrêsse dé tchans, couotuthiéthe, eune servirêsse dans la poste, etc., et parmi les mêssieux un pêtcheux, cap'taine d'un baté, laitchi, machon, ramasseux dé r'but, entréprenneux, docteu, etc.
Les deux dgaingues, preunmiéth'ment la sienne du Ouest (la Dlle. K. Le Boutillier, Mme. D. Le Téxier et les Mêssieux H. J. Maillard et N. Pallot) et auprès la sienne dé l'Est (Mesdanmes A. L. Perchard et E. Le Sueur, lé Trésôryi Richard et l'Chentnyi G. R. Le Masurier), fidrent divèrsément bein à dêcouvri ch't assortiment d'vocations et auprès les deux “célébrités” (du Ouest, l'Sieur J. A. Le Maistre, et d'l'Est, Mme. L. Copp). En tout, i'y eut six certificaux d'présentés.
Les “callengièrs”, aussi bein comme les dgaingues, 'taient novices, mais touos ieux, sans exception, fitent un grand succès d'lus preunmié entréprinse, et réussîtent à entrét'nîn et amuser touos les membres présents, qui ch'est seux attendent à en aver eune aut' bordée pus tard. Lé Sieur Pallot étout, à garder tout en allant et à introduithe les candidats, y pathaîssaít tout-à-fait à s'n aise.
Ermerciêments
À la fin, l'Député Quérée ermercyit touos les siens qu'avaient print part, les deux dgaingues et les contestants, Moussieu et Mme. Pallot pour toute la peine qu'ils avaient prints à arrangi ches mêtchièrs, touos les membres qui 'taient v'nus à la rêunion, et l'Connétablye Le Vesconte pour aver prêtèr la salle acouo eune fais.
Lé Sieur Pallot, un Vice-Président, dit que ch'avait 'té un pliaisi d'arrangi la séthée et à san tou' r'mercyit les siens qu'avaient aidgi sus autchun sens pour faithe la séthée.
Note à part: Ch'est important d'saver qué nus des contestants avaient autechunne idée tchi mêtchi qu'i' s'n allaient erpréthanter quand ils entritent dans la salle lé sé.
1964
Viyiz étout: