A Moussieu C. L. F. - Burô d'la Nouvel Cronique de Jêrri.
Maze de Sainte-Catelinne,
20 d-Octembre 1880
ième 85
Moussieu et vièr Anmin, - Je vai par tan papi que tu-as r'tè faize tan p'tit viage annuèl. Tu-as don anvie do vais touos les coins et racoins du monde:- unne fais ch'est ichin, unne aoûte fais ch'est là. - Bravo, man vièr fistaoûd! - pâlez-mé d'un mâtin tchi viage! chenna li-êlargît la huette. I' vai coume le monde se d'mènne dans l's-aoûtes paiïs, et s'il est Jèrriais, i' n'est pon unne âne, et i' s'apercheu diâtrement bein vite tchi' n'y-a pon unne aoûtre pièche coume san p'tit Jêrri, pour la biaoûtè, la propretè, l'hounêtetè. - Dis, est-che que j'mens? - Nannin, ma fé!
J'te r'mercie par la m'zuze (de caboté), man vièr garsçon pour tout chein qu'tu nos brétonnes dans ta bouonne fièlle, entouôr les pièches que tu-as veûzes dans la Brétanne; mais diâtre-m'en-vert, i' faoût tout d'maîmme que j'te bàle unne fièrre morniflle sus la varvette. Tu m'estchûzezas, mais tu vais un p'tit tro liain. Bigre, ch'n'est pon à morte-main! Tu voudrais nos fèze accraize que l'port de Breste est l'pus biaoûx port du monde, je cré! mais arrête là, dia, si t'plliais! - et Porchémue don, - tch'est qu'tu-en dis, haîn? et l'bréque-ouâteur de l'èrmitage? et l'chein d'ilo, d'la Maze? et pis la caoûchie d'la Collètte, don? et la siènne de la Grève-de-Lé;, et la siènne de Bouonne-Nièt! - N'en v'là assèz, j'espèze, de chu cou-là, pour te faize pendre l'z-hueûles. - Les cheins tchi sont pitchis lus grattes! ha, ha! tchest qu'tu-en dis, haîn? En veur-tu ocouo d'aoûtre?
Tu nos di ettou qu'tu-as passè par Morlais. Et tu n'nos di rein des poules de chutte contrèe-là tchi ponnent de si fanmours oeux. - N'ou-z-en a là, i' dîzent, unne bouonne câssèe pour rein. - Pour tch'est qu'tu n'en di mot?
Tu t'en r'veins par Dinan, et pis tu veins nos chanté que ses envizons sont de toute biaoûté. - Ah s'sa! es-tu dêgénézè, es-tu Jèrriais, pour v'nin nos êlourdé l'z-ouozèlles d'unne tèlle mangniéze? - I faoût, ma fé, avai la brélue, pour voulé nos faize accraize ditet. - Tu-en pazais êprins, de chu Dinan, coume si tu n'avais janmais veu rein d'si bé. Est-che-que n'on peut vais de pus belles vallèes, de pus belles campannes, que les siennes que nou vé en Jêrri, et partitchulièzement dans ches cartièrs-ichin d'la Maze? - J't'en fiche! Va sûfllié chenna à d'aoûtres, s'tu veur, mais pardingue! pas à mé. - S'tu t'enduèrchis ocouo dans ta têtouognîse, et-qu'tu dises oui, eh bein, me, j'di nan! - pas Dinan, dia. - Un Jèrriais v'nin nos conté de tchi si abominablle - ch'est unne bitche de néze honte, là! - J'n'ai pon d'pâcienche ov' di-tè monde, mé. - I' mézitetaient - je n'dizé pas tchi: tu m'comprends bein, laiduze que tu-es!
Tu n'nos di pas si ta damme a 'té ov' té chutte drainne fais. S'oul' y-a tè, j'sis boustrement bein saeûx qu'ou n'crai pon tout chu gniolin-là qu'tu nos conte sur les biaoûtès d'Breste, d'Morlais, des Brétons, et de toute la Brétonnenie, et de je n'sai' pus tchi d'aoûtre.
Tu lî bâlelas bein mes compllîments, (j'entends à ta damme - pas à la Brétonnerie). Et coume je sis bein certain' qu'oul' est d'man bord, qu'ou n's'êfrite pon si tchique biaoûx matin, pour la r'mèrcié, i' lî vein - par la poste - le pus biaoûx houmar quo l'vièr grounaeûx ait ocouo janmais prins dans ses clliavaoûx. - Et s'tu veur bein c'mândé l'imprimage de chonnechin dans ta préchainne fièlle, tu pouôrras, pour tan lot, avai les pattes du houmar!
Tan vièr anmin, tchi te r'mercie tout d'maîmme.
A tantôt.
COUOSIN JAN,
( tchi ne r'dote pon ocouo, va!)
Viyiz étout: