|
Tch'est qui n'admith'thait pas chu p'tit port de Bouanne-Nièt; Viy'ous s'i pathait bein quand i' r'lis au solei', La mé, tréjous rêmouée, en s'êgdachant dans l'Hâvre Fait un bri qui vos berche ou parfais qui vos navre. Ou' grimpe a mont la grève en rouollant des galots, Et r'descend aussi vite et pis ramonte pus haut, La louaime est toute en breuse et quand j'entends s'n'ôrage, Je crai' tout fliablyément que la mathèe enrage, Mais s'ou pathait mârrie ichin, parmi l'rotchi, Nou s'en aperche mains au large. A perte d'yi' Jusqu'es blians sabl'ions d'France, ou s'êtend blue et belle, Emportant nos batcheaux, ov' du vent plien lus velles, Les viy'ous qu'i' s'en vont pour l'andghulle et l'maq'thé, Sauticottant sus l'ieau du bord des Pierres-de-Lecq? Le “G'va Guilleaume” ichin, ordghilleux qu'nou le r'garde Au bieau mitan d'la Baie est a monter sa garde. L'Hâvre, l'Giffard, la Crête, et le p'tit Fort du Guet, Sont à l'est d'la Baie un parfait p'tit portrait. Av'ous r'mertchi coumment que tout auto' d'la côte, En forme d'fé àg'va, la falaise est bein haute? La route, en descendant, pathaît coumme un ruban, Qui veint de l'Est et d'l'Ouest pour se nouer au mitan, Et s'perdre à la cauchie après la grand' chanolle - Qui faut touanner douch'ment - ou verser sa tchéthiolle, Frémon, ichin, à l'Ouest êlève en l'ai san nez, Nou' grimpthait pas là-haut! Le r'garder est assez... La falaise alentou' est pourpre ov' sa bruyèthe, Grise avec sa grapue, et verte ov' sa feûgièthe, Bord-chin, bord-là, nou' vait un brun êcliet - l'rotchi; Ou bein un cliapet d'jaun y'où qu'i' y'a du gravi, Ch'est là qu'les cormothans, les corbins et les mauves, Vont vaie a lus nichie et pis, ov' un brai, s'sauvent, Nou' les vait voltigi là y'où qu'le paisson s'meut, Et pis pitchi dans l'ieau - tout d'un coup; liont yeu. Bouanne-Nièt, ov' tes batcheaux, tes ouaisieaux, ta bruyèthe, Dis-mé des baies d'Jerry, n'es-tu pon la prumièthe? |
Viyiz étout: