Quouaiqu' j'eûsse siêx ans et d'mi au mais de mai mille neu chents quarante chînq, jé n'm'rappelle rein entouor le jour dé not' Libéthâtion li-même, mais tchi dêchèrge qu'il éthait deu être pouor ma grand'méthe tch'avait la responsabilité d'souongni mé et mes deux fréthes duthant l'absence de nos pathents, et pouor les autres gens tchi 'taient sépathés dé près pathents et anmîns.
À chu temps là, j'd'meuthions amont l'Mont Couochon, et plusieurs jours pus tard, j'm'rappelle allant à pid, l'long d'la Ruelle Vaucliuse jusqu'à la carre d'éyou qu'j'eûmes eune veue dé toute la Baie d'St Aubîn, dévant qu'les maîsons dans la ruelle du Pid du Côti fûssent bâties. J'viyêmes les longues lîngnes dé soudards Allemands, marchant à travèrs la grève, à bâsse mathée, envèrs les pliats-fonds tchi lus remportéthaient ès grands batchieaux ancrés en la baie, et pis en prison en Angliétèrre.
Ma tante Betty 'tait fianchie à un janne docteu tchi travaillait à l'Hôpita duthant l'Otchupâtion. Plusieurs jours auprès l'jour d'la Libéthâtion, il' allîtent à eune danse à la maîson des nosses. Ilà, i' rencontrîtent plusieurs officièrs d'la Marinne tch'étaient învités par les nosses. Quand iun d'ieux dêcouvrit qu' la soeu d'ma Tante 'tait eune officiéthe dans la Marinne des femmes, i' dit, "Oh, j'la connais, et j'connais étout éyou qu'i' sont ses bèrrexes et l'neunmétho d'téléphone." Tout d'suite i' fît un co d'téléphone et ma Tante pâlit auve sa soeu, Nancy, pouor la preunmié fais d'pis chînq ans.
Jé m'rappelle bein la preunmiéthe annivèrsaithe d'la Libéthâtion. J'fus êcoliéthe à eune p'tite êcole, dirigie par Missis Le Bas dans la Rue Bellozanne. Les mousses dé toutes les êcoles dans l'Île allîtent au People's Park pouor un Sèrvice en pliein air. J'chantînmes les cantiques, "Terre d'Espé et dé la Glouaithe", "Èrmèrcions tous l'Bouôn Dgieu" et "Y'étha Tréjous eune Angliétèrre". I sembl'ye qué ch't' occâsion fît eune grande împression sus mé, pa'ce qu' châque fais j'ouai autchun d'ches cantiques, j'peux vaie mé-même, coumme eune janne fil'ye auve des blondes tresses, chantant à haute vouaix, auve touos l's autres mousses, et jé d'veins tout à fait êmouée.
Anne Herrod
Viyiz étout: