San Antonio, Texas, U.S.A.
Lé 31 dézembre, 1966.
Moussieu l'Rédacteu,
Il est temps d'penser à souhaiter eune bouanne année ès anmîns partout l'monde!, j'pensais en mé l'vant à matîn, et v'la tchi m'fait penser, étout, qu'un tas d'gens s'mettent dans l'idée tch'i' s'en vont faithe des mithacl'yes dans la nouvelle année! Eh bein, y'a toutes sortes d'choses qué tout l'monde pouorraient faithe pour apporter pus d'bonheu dans la vie, et ch'est sans doute vrai qué l'c'menchement d'eune nouvelle année est l'temps propice pour lé faithe. Mais, comme nouos l'dit l'vièr diton : Les résolutions du sé né sont pon les cheinnes du matîn! La grand' partie des bouannes résolutions d'nouvel an sont oubliyées par lé temps qué l'mais d'janvyi est passé, si pas d'vant! Et ch'n'est pon êtonnant, quand nou veint à y penser, car les b'souegnes du jour sont telles qué les cheins tch'ont à gangni lus vie ont assez à faithe pour né penser pon fort à aut' chose qu'à la gângne de Dgi!
I' m'sembl'ye qué l's anciens trouvaient d'la paix et du contentement dans la vie d'touos les jours pus aîsiement quand j'tais mousse y'a septante ans, qué les gens n'lé font à ch't heu. Et pourtant, i' n'avaient pon les c'modités d'nouos jours. Il est bein dit qué d'nouos jours j'avons toutes les c'modités et ieune pardessus! Mais i' n'avaient pon l'tîntamarre tch'i' faut supporter dans la vie modèrne ni n'tout! S'il' avaient la chance dé faithe deux-s'trais sou, i' n'avaient pon à en rendre compte à un moussieu en ville tchi les f'thait li donner quat' chélîns sus touos les louis. Et i' n'avaient pon à griffouoilli lus nom (un tas n'savaient mème pon liéthe ni êcrithe!) sus des mios d'papi pour pouver craître des patates dans lus clios! Quand il' allaient en ville, i' pouvaient prendre l'air sus l'banc en d'vant d'la vainne quandi qué l'vièr bidet trottait trantchil'ment en c'mîn. À ch't heu, i' faut cachi un moto à quarante milles à l'heuthe et prandre sa pliaiche dans eune procêssion d'aut' motos allant en vitesse ou bein nou-s est à la vaie s'nou-s êprouve à cachi à eune vitesse pus raisonnabl'ye! Et pis, i' faut heunmer l'air empouaisonné par l'êcappe dé gaz malsain des motos en d'vant d'sé tout l'temps qu'nou-s est là-d'dans ou à marchi par les c'mîns, à la pliaiche du bouan air sain et frais du temps jadis!
J'en sommes-t-i' d'mus, d'toute chutte vie êcrasante-là? J'pense bein qu'ch'est eune affaithe d'opinion. Pour les jannes, ch'est la vie naturelle vivyant tch'i' n'ont pon connu rein d'aut', et lus preunmièthe ambition est d'cachi l'moto à p'pée. Eune fais qu'la fièvre d'vitesse les engaument, i' veulent dêpenser les preunmié sou tch'il' ont mînt d'côté à en acater iun ieux-mèmes. Et pis i' sont houors dédans touos les sièrs et à la maîntchi d'lus nyits, et lus bouanhomme dé péthe a d'la peine à les faithe léver au matîn!
Jé n'm'attends pon, sans doute, qué la nouvelle année s'en va changi l's affaithes et nouos ram'ner à la vie paîsibl'ye des vièrs temps. Il est mème possibl'ye qué l'affaithe s'en va empiéthi - à mains qu'les membres d's Êtats piêssent y porter r'miède en prannant l'avis et les conseils dé l'Avocat L'Bro! Quand ès jannes - i' sont si gâtés à ch't heu qu'la miyeu chose qué nou peut s'attendre est tch'il' amendent en grandissant, malgré la vie d'laîsi et d'opulence tchi lus apprand à fainianter pûtôt qu'à travailli!
Ieune des choses qué j'allons p't êt' vaie ichîn en Amèthique dans la nouvelle année est d's astronautes aller à la Leune - et i' faut espéther tch'il' en r'veindront sains et saufs. Y'a tchiques années, v'la tch'éthait 'té jugi împossibl'ye, ouaithe qué dans m'n articl'ye êcrite en 1961, souos l'întitulement L'Année Cosmique, et publiyeé dans l'bulletîn nunmétho 39 et 40 dé l'Assembliée d'Jèrriais en 1962, j'fis la prédiction qué l'temps viendrait - p't êt' dans tchiques dgiexaines d'années - qu'un viage à la Leune né s'sa p't êt' pon aussi rare comme l'était un viage des Landes dé St. Ouën à la ville dé St. Hélyi quand j'tais mousse!
Et en Jèrri? Tch'est tchi sait? P't êt' eune tonnelle souos l'Mont d'la Ville et d's avions à réaction tchi né f'thont pas d'brit! Mais nou n'peut pon s'attendre à un mithacl'ye d'nouos jours! Dans touos les cas j'vouos souhaite, Moussieu l'Rédacteu, à vous et à touos vos lecteurs, eune raide bouanne année! Et mains d'travas, pus d'temps propice, miyeu récoltes et pus d'prospéthité ès pouorres dgiâtres d'fermièrs tchi nègrent lus vie pour si p'tit d'èrvénu! Et j'espethe vaie pus d'noms Jèrriais parmi les naissances dans l's annonces d'êtat civil, et mains d'dêpenses dans l's Etats!
Et piêsse le Bouan Dgieu béni les délibéthations du Concile Oeucuménique et aboli la discorde entre les gens d'difféthentes réligions et les rêuni tous dans San sèrvice. Et espéthons qu'à la fîn du compte, les travaux du Conseil des Nations-Unies êthont pour bénédiction l'abolissement des dgèrres à seule fîn d'êtablyi la paix sus toute la tèrre!
George d'La Forge
Viyiz étout: