Lé Rédacteu fut privilégié d'aver 'té mandé par les autorités quand i' fut tchestchion d'èrvîther les cartes géographiques dé l'Île, et pouor èrproduithe les nouvelles cartes par lé "Ordnance Survey” dé Southampton, en 1981, en 45 grand's sections pouor toute l'Île. J'eûnmes à faithe les corrections des noms dé lieu, - des rues et des c'mîns, dé bein des endraits dans l'Île, et étout des noms lé tou des côtes, dé rotchièrs, et cétéra. V'là tchi nouos prînt pus d'un an, car ch' fut eune grand' tâche. Et acouo, nou n'put dgéthe mett' tout bas. Il éthait fallu bein pus d'temps, et pis sans doute les autorités responsabl'yes nouos donnîdrent des'th înstructions dé n'pon s'gêner sinon pouor les pus importants. Ch'est bein damage car, auve lé temps, nou-th-éthait peu en donner acouo des chents et des chents aut's. Malheûtheûthement étout, en dépit du grand soin qu' nou'th'y prînt pouor aver tout ch'la correct, les'th înmprînmeurs fîdrent acouothe eune chentaine d'èrreurs, qué nou-th-espéthe es'sont èrcorrigies un jour en temps et lieu.

Y'avait tréjous ieu tant d'noms faux, mal êpelés, et pis d'pis tchique temps d'aut's donnés en Angliais, qué eune mâsse dé gens les'th ont acceptés comme étant d'même. Car, nou-th-est p'tit à p'tit à pèrdre eune mâsse dé nouos bouons vièrs noms à tout janmais. Enfin, des chents corrections sé trouvent à ch't heu enregistrées sus ches grand's nouvelles cartes.

Eh bein, i' nouos veint à l'idée qué nouos lecteurs es'saient ofûche întérêssis (et j' l'espéthons, du mains!) si j'donnions, par exthempl'ye, les noms d'eune bouonne partie d'côte tchi n'ont janmais 'té r'cordées, gentiment même pas sus chutte nouvelle "Ordnance Survey". Car, à part les'th înstructions qué j'avons mentionné pus haut, i' n' y'éthait pon ieu d'run assez!

J'avons chouaîthi la côte dé St. Brélade pouor quémenchi, en donnant eune bouonne quantité dé touos ches vièrs noms (mais, comme-ej dithons, y'en a acouo tout pliein d'aut's) qué les pêtcheurs et autres éthont connu pouor des chents'th ans. J'espéthons d'en faithe autant à l'av'nîn pouor d'aut's parties d'falaîthes, et cétéra, lé tou d'l'Île.

A part dé chein qu'j'avions r'tchilyi des vièrs avaû l'th années, y'a assez longtemps, j'eûnmes lé privilège étout à un moment donné dé connaître hardi bein lé Seigneu du Fieu et du Mangni d'Nièr Mont - Guy Fortescue Burrell de Gruchy, Écr. - un temps fut, Connêtabl'ye d'St. Brélade et pus tard Juré-Justicier ou Juge. Sans en dithe pus, i' fut iun dé nouos grands savants et historiens. Ah ça, don, sachant et viyant bein qué, comme janne homme, j'étchions hardi êprîns dé toutes chôthes entouor nouot' vièr Jèrri, des noms dé lieu, des falaîthes, rotchièrs et dé tout, jé fînmes bein des fais eune touônnée ensembl'ye, Moussieu d'Gruchy et nous, tout à l'entou d'san tèrrain d'Nièr Mont, et j'faîthions note, auve l'aîgue étout tchiquefais du Sieur J. Steel, défunt à ch't heu étout, et un coupl'ye d'autres, dé touos les noms entendus dé ches bouonnes gens, par li, Moussieu d'Gruchy, ou par nous, et pis étout des noms dé tchi il avait des r'cords sans saver tréjous iou les pliaichi. Enfin, pouor dithe, il en' 'tait tout aussi haitchi comme nous, comme i' s'adonnait, et i' prannait san pliaîthi à noter tout ch'la aussi bein comme nous étout. Eh bein, j'avons ieu chutte collection dé noms pouor pus d'quarante ans à attendre qué l'jour vînsse pouor pouver les publier. Enfîn étout, lé jour vînt, auprès qu' Moussieu d'Gruchy eut pâssé l'pas, qué Madanme dé Gruchy, sa veuve, nouos'th app'lit au mangni à prendre eune tâssée d'thée auve lyi et pouor nouos donner eune pacotile dé bein précieûthes notes qué chu grand savant avait laîssi à nouot' nom. Entr'aut's chôthes, il avait lé "tracé" dé ches noms (qué j'avions étout), mais pus compliet qué nous. Né v'chîn don les noms des parties, en c'menchant au mangni (à la maiethon), en allant nord, sustout des noms tchi n'ont ofûche janmais 'té enregistrés autchun bord, en autchun temps:

La Vallette dé Belcroute (driéthe lé mangni); La Vallette dé Robill(i)ard, la preunmiéthe dans L'Av'nue; La Vallette du Vaû ès Fontaines, la deûthième dans L'Av'nue; La Grand' Vallette, la traîthième dans L'Av'nue; et lé lîthon dé tèrrain entre l'bas d'chutte vallette et la mé, Les Fôss'tchiéthes (écrit Les Fossetières en Français). Pis la préchaine, La Vallette du Vaû Vathîn, la quatrième dans L'Av'nue; et La Vallette ès Tours, la chîntchième dans L'Av'nue. Auprès ch'la, y'a Lé Val Êssart (dans tchi s'trouve "Rochebois"). Et pis Lé Grand Rondy est la grand' tête en d'ssus d'La Tête du Vaû Vathîn (entre La Grand' Vallette et La Vallette du Vaû Vathîn), et Lé P'tit Rondy est la tête entre La Vallette du Vaû Vathîn et La Vallette ès Tours. Chutte Vallette ès Tours est s'pathée du Val Êssart par Lé Côti ès/des Tours.

A ch't heu, sus la côte, allant nord étout, y'a bein Belcroute, pis en d'ssus, La Tête du Dget et La Crochelle. Et un cré tchi s'appelle Lé Bachîn Robill(i)ard (au fond d'La Vallette dé Robill(i)ard), eune toute pétite grève à sablion auve La Vallette en d'ssus, pis Lé Vaû ès Fontaines et Lé Galet du Vaû ès Fontaines. Mais y'a lé rotchi tchi s'appelle La Housse, entre Belcroute et L'Vaû Vathîn.

Nouos r'véchîn à La Tête du Vaû Vathîn et Lé Vaû Vathîn même (Le Vaû Varin, en Français), la grève et baie driéthe Lé Boulevard dé St. Aubîn.

Comme iun ou deux d'estra, j'pouvons donner Lé Val Sèrvy, tch'est lé vallon souos La Cônueûthie (La Cornuerie, en Français) tchi r'joint un aut' vallon (dé tchi lé nom est oublié), ch'ti-chîn dêbouchant au bas sus L'Mont du Ouaisné. Y'a L'Vaû Tocque étout, pus liain, mais j'avons ch'la înditchi sus la nouvelle carte "Ordnance Survey". Lé Fouothêt (écrit Le Forêt, en Français) est la tête dé bouaîth'thie entre Lé Val Sèrvy et l'aut' vallon (comme j'avons dit), et Lé Pendant du Fouothêt est l'pendant gentiment d'à pic du côté en allant pouor la route.

En r'quémenchant au mangni, j'avons La Dgéthande (ou Dgéthanne) (Guérande en Vièr Français) tout au long La Dgéthande dé Nièr Mont, en d'ssus (eune grand' étendue), pis, filant sud, La Tête du But (ou Lé But), et eune londgeu d'falaîthes, Les Rouoges Banques, jusqu'ès Trais Creux à bas sus la côte. Pis La Dgèrde dé Donne (La Garde de Don, en Français), un pliat rotchi à haut nommé dé d'pis l'temps du Général Don (Gouvèrneux d'Jèrri), et pus liain Les Jaunes Banques. Jé pensons qu' j'avions mèrtchi ches'-chîn sus la "Ordnance Survey". En d'ssus des Trais Creux y'a La Vallette ès Fresnes. (Dé d'ssus La Dgèrde dé Donne, en r'gardant sud, nou s'avithe dé La Tour dé Vînde). En d'houors y'a les rotchièrs qué nou nomme Les Cracheurs. Eh bein, dé ches'-là allant acouo sud est Vînde (ou La Baie d'Vinde). "La Tour dé Vînde" est chein tch'il' ont mîns sus les cartes dé d'pis y'a déjà longtemps “Noirmont Tower"! Entre La Dgèrde dé Donne, acouothe eune fais, et Lé Bé d'Nièr Mont (Le Bec de Noir Mont, en Français) est La Vallette dé Vînde (ou La Vallette dé La Vînde) et Les Banques dé Vînde. Les crés (en Angliais "creeks") - mot d'originne nordique - entre La Tour dé Vinde et L'Île Pèrchie sont Lé P'tit Port et pis L'Êlibet (ou L'Eslibet). Entre ches deux crés sont les rotchièrs tchi lanchent dans la mé, nommés Les Bèrs. Entre l'Île Pèrchie et la falaîthe dé chu but-là du Portélet est Lé Port d'Île Pérchie, et la falaîthe même est La Touothaille (La Touraille, en Français). Entre L'Île Pèrchie et La Touothaille y'a les criques (en allant pouor Lé Portélet) La Vallette d'Île Perchie, La Vallette au Vivyi (Vivier, en Français) et La Vallette à La Nouôrriche. Au nord dé La Touothaille est La Vallette au Va (Val, en Français). Eh bein, nouos v'là dans L'Portélet. (Hé, dé nouos jours, sans doute, les bêtes dé gens né peuvent pon prendre la peine dé dithe Le Portélet mais, comme il' angliaîchent tant d'aut's noms, nou n'ouait en Angliais qué "Port-lett"!)

Chein tch'i' faudrait sans doute, ché s'sait d'aver eune carte géographique sus tchi mett' tout ch'la en pliaiche, pouor la r'produithe ichîn. Mais, pon mouoyen.

Enfin, n'en r'véchîn eune suée dé noms, qué j'avions ieu des vièrs, avaû l'th années. Et lé Sieur "Jack" Steel (défunt y'a dans les quat' ou chînq ans), iun d'nouos bouons anmîns, nouos aîdgit gentiment car il en avait eune bouonne connaîssance, ayant ieu ch'la d'ses anciens. (Tchuthieux assez, la fanmil'ye Steel est assez vielle dans l'Île. Oulle a 'té à St. Brélade tchiques généthâtions, comme pêtcheurs sustout, mais d'vant il' 'taient sortis d'St. Martîn, où'est qu'nou les trouve dans les r'gîstres comme Stille, dans les vièrs temps.)

Erquémenchons don à la vielle églyîthe dé St. Brélade, en allant sud. Y'a Lé Col'ron (Le Coleron sus les cartes), Lé Cart'ret (qué cèrtains dîthent Lé "Catrain"), tch'est eune tête tchi dêhale dévant v'nîn dans L'Bouoilly (Le Bouilly sus cèrtaines des cartes, tchiquefais même "Bouilly Port", ch'la étant tout à fait faux). Et pis y'a La Salinne (La Saline), tch'est eune partie du Bouoilly, pis la partie d'falaîthe, et des rotchièrs, Les J'teûthes (Les Jeteuses), mais étant étout où'est tch'est la vielle bat'tie d'aut'fais. Pis nouos v'là dans L'Bieau Port. Ichîn, dans L'Bieau Port, en mé, sont Les Mions, des rotchièrs tchi couvrent à mé haute. La partie ouêst en d'ssus du Bieau Port est La Fortérêsse - toute l'êtendue. Pis à ch't heu nouos v'là sus L'Mont Fitchet (Ficquet). En d'ssous, en mé, ch'est L's Ieaux d'Fitchet (qué cèrtaines cartes donnent acouo comme "Ficquet Bay"!) À l'êst, en d'houors du Mont Fitchet, est La Grosse Tête (et mèrtchie sus les cartes), ou La Grôsse Rousse. Mais tout près est un pus p'tit rotchi (à l'êst) tchi s'appelle Rossîngno (Rossignol). Dans L's Ieaux d'Fitchet, à eune chînquantaine dé vèrgues d'La Grôsse Tête, est L'Pot' au Beurre, p'tit hâvre et rotchi. La partie à l'ést des Ieaux d'Fitchet, falaîthe et rotchièrs, est Rousse. Au ouêst des Falaîthes dé Fitchet est un p'tit hâvre appelé Houlisse. Lé Mouonne (Moine, en Français) est lé grand rotchi souos Les Sîngnaux d'aut'fais. Pis en continnuant ouêst, les falaîthes (et rotchièrs) sont Les Pendantes, et pis La Tête, ou La Tête dé La Mouaie, qué les fichues cartes donnent comme "La Moye Point", sâpresti! Il y r'a Les Trais Creux (un aut' lot), en d'ssous, pus liain, et La Néthe Fontaine (p'tit hâvre), et pis Les Huthieaux - tèrrain, et falaîthes à rotchièrs. Et La Fôsse Vouothîn (Vourin, tch'i' donnent en Français) et La Rôsiéthe (La Rosière). Ichîn y'a Les Caves ès Fraudeurs. Dé l'aut' côté du grand rotchi La Jeunment (Jument) y'a un p'tit hâvre souos la tête dévant v'nîn à La Baie à Sablion tch'est nommé Lé Tchu du Navithe (auprès un naufrage dé y'a bein lontemps, et dé tchi qué l'arriéthe dé chu navithe sé viyait à bâsse-ieau n' y'a pon 'couo bein d'th années). Et pis La Baie à Sablion, tchi va quâthi jusqu'à La Corbiéthe. Lé nom est donné appathemment viyant tch'i' n' y'a pon grand profondeu dg'ieau là tout du long.

Pouor en r'donner acouo d'aut's qué j'avons mantchi, en r'vénant à La Baie (d'St. Brélade) y'a, du Hâvre à Batchieaux, un assez grand rotchi, en d'houors et un mio à gauche, La Rotchaîthe (La Rocquaise, comme il' ont tréjous dit sus les cartes). En allant pouor lé mitan d'La Baie, lé grand pliat rotchi est Lé Pliat Hommet, et à côté tout près est La Greune l'Églyîthe (La Grune l'Église). Et pis à l'êst du Pliat Hommet est La Greune dé l'Êst. Pus liain acouo qu' chette-chîn sont Les Greunes du Fouônné. (Dé tchi cèrtains éthont nommé eune racachie d'maiethons en d'ssus sus La Mouaie, "Les Fourneaux Estate"!). Les Fouônnés mêmes sont à mié-baie et, du tèrme, ont 'te mèrtchis d'pis longtemps, "Les Fourneaux". Y'a acouo La Froutchie tchi s'trouve bein en d'houors du Pliat Hommet. Y'a Lé Grouîn, entre La Baie et Lé Ouaisné, et La Greune du Grouîn, pas bein liain mais souos l'ieau. Et pis y'a Rocque Ôzanne (Ozanne), sus la grève, souos La Tour.

Dans L'Ouaisné, y'a Lé Huthé du Ouaisné, rotchi à la gauche dé La Montée du Ouaisné. A mié-c'mîn, sus La C'meune dé Haut, entre Lé Fret et La Cotte (dé St. Brélade), y'a La Vallette a Bêtes (ou Lé Val ès Bêtes), où'est qu' nou-th-env'yait ava aut'fais les bêtes mortes tchi n'pouvaient sèrvi comme viande. Y'en a gentiment tellement nommées lé tou d'nouos côtes. En d'houors dé La Cotte, en mé, y'a lé grand rotchi, Lé Hommet du Ouaisné, et bein en d'houors dé chu Hommet y'a les quat' greunes appelées Les Greunes Dâvi (ou Dâvy). Lé Braye est l'grand pâssage entre Lé Hommet et l'restant d'rotchi. La Cheunm'nee Maillard (La Cheminée Maillard) est un grand rotchi pointu, pas bein liain en mé, tchi sèrt dé mèr, drait en d'ssous du Val ès Bêtes. La Vaillantîthon (Vaillantison) étout est un grand rotchi pâssé L'Hommet - raide bouon aut'fais pouor y prendre des'th ormèrs.

En d'houors dé La Vaillantîthon sont Les P'tits Coulais (deux rotchièrs). Entre La Cheunm'née Maillard et Lé Fret (mèrtchi sus la carte) est Rousse - falaîthe et en d'ssous. En d'houors du Fret (ou La Tête du Fret) sont Les Mêles - hauts rotchièrs en d'houors. Auprès ch'la, en allant êst, est Rouôthé, Rouôsé ou Rôsé (Rosel) et lé ch'na ou pâssage entre Les Mêles et la côte est Lé Canné d'Rouôthé. Lé Creux des Mêles est eune cave souos L'Fret, pûtôt à l'êst. La Pôtroune (ou Pôtronne) est lé haut rotchi en d'houors du Fret, partie en mé et au ouêst. Les Vielles Corbiéthes (ou Les P'tites Corbiéthes) sont les hauts rotchièrs entre Lé Fret et La Cotte, et nou-th-appelle chutte pétite baie-là en d'ssous, entre Lé Hommet du Ouaisné et La Pôtroune, Les Vielles Corbiéthes étout. Ah, j'en avons mantchi un important comme vièr nom. Ch'est au Cart'ret, d'vant v'nîn dans L'Bouoilly - y'a Les Creux Fantômes.

Y'en a acouo deux'trais à mentionner étout. Les Hautes Gardes sont des hauts rotchièrs au sud du P'tit Port. À La Rocqu-Ho, lé côté tchi fache lé nord (souos La Tour) s'appelle La Joue. En allant pouor La Pulente, du Nièr Côti, j'avons La Cârriéthe (Pièrre du Feu), et pis La C'meune (La Commune), où'est qu' nou stâtionne les vouaituthes à ch't heu. À La Pulente y'a La Montée du Nord et La Montée du Sud. Dans la grève, et allant sud en mé, en lîngne dé La Cârriéthe, y'a Lé Pas, bein long pâssage (ou longue tchithiéthe). Y'a La Tchithiéthe du Vèrmeux et La Rocque-Ho. Lé Vèrmeux est aînchîn nommé car nou-th-y prannait tout pliein d'vèr dé rocque (ou du vèrme). Y'a Les Cap'sons (rotchièrs bein connus) en d'houors en mé, et Lé Pas des Cap'sons, tch'est un pâssage tout près. Au sud d'La Pulente, la tête a nom L'Iliéthe et entre chette-chîn et Lé P'tit Port j'avons, à bas, Les Portélets. Dans Lé P'tit Port, i' y'a Lé Hâvre, au sud d'La Montée, pis nou veint au Grouët et, dans L'Grouët, y'a La Mathe du Grouët. Pis y'a acouo L'Iaîselinne (ou L'Iaîthelinne), tch'est eune bein longue tchithiéthe allant en mé, dans Lé P'tit Port mais du côté du Grouët.

Allons, n'en v'là p't-êt' assez pouor eune fais. Dans La Pulente i' y'a acouo bein des noms, comme bein ailleurs, qué nou connaît mais tchi s'en vont s'pèrdre dévant long. Y'a un rotchi tout seu tchi s'appelle Michard (mèrtchi sus la nouvelle carte) et, tout près, Les Bunions - grand' êtendue d'rotchi - et pis L'Êgouviliéthe, assez grand' ouvèrtuthe sablionneûthe à bein près dans l'mitan. Et cétéra, et cétéra.

Mais, eune chôthe, dgia, tch'i' n'faut pon oublier. Hardi d'ches pliaiches, rotchièrs, et cétéra, ont souvent pus d'un nom, un tout aussi vyi comme l'aut', ofûche.

Chutte articl'ye dévthait donner au mains eune idée ès lecteurs combein dé mille noms, et touos vièrs, qué j'sommes à pèrdre à tout janmais. Si ch'est tch'i' y'avait pus d'gens întérêssis, au mains, mais, nânnîn - pouor la grand' partie d'ieux, chein tch'est du temps pâssé n'est pon du tout dé conséquenche. Et né v'là l'fichu malheu. Ah oui, si ch'tait en Angliais!

 

F.L.M

Viyiz étout:

• St Brélade

• La Corbiéthe

• Les cô's d'la Mouaie

• Les Rotchièrs dé Jèrri

• L'Île au Dgèrdain

• Rêunion à Nièrmont

• Les Creux Fantômes

• L'Avathîthon

• Bouanne-Nièt

• Les Pièrres Dé Lé

• L's Êcréhos

• Les Rocques dg'Hieaux

• L'Phénix à Pliémont