Le Ménage ès Feuvres,
St. Ouën.

Lé 7 septembre, 1974.

Moussieu l'Rédacteu,

Tchi triste jour qué j'eûnmes jeudi pâssé. D'la plyie avèrse la grand' partie du jour, et un vent êpouvantabl'ye tout l'jour. Et ch'tait un jour d'entèrrement. Mes pensées r'tchulaient pus d'souoxante ans comme j'èrgardais l'côffre dé man vièr anmîn George Charles Holmes Le Cocq sus ses scabelles dévant l'grand autel dé l'églyise dé St. Simon en ville, et j'pensais au temps tch'il 'tait janne et pliein d'vie à dirigi les Boy Scouts dé l'églyise, et qué j'tais sèrvant à l'autel, et dans l'chant. La vie était si belle dans chu temps-là! Mais un tas dg'ieau a pâssé par La Corbièthe dépis, et les temps ont changi. Mème l'églyise a veu des changements. Sustout ch't' églyise dé St. Simon. Ou n'a pon pèrdu sa bieauté. Oulle est pus belle qué janmais, mais ou pathaît viède. Nou vait qu' oulle a pèrdu la nombreuse congrégâtion tchi soulait l'emplyi y'a eune souoxantaine quand i' fallait un calendriyi ecclésiastique. Aniet, les cierges sus l'grand autel n'illeunminnaient pon l'Crucifix, et l'temps, si sombre, donnait un air dé tristesse dans l'sanctuaithe comme s'il 'tait en deu viyant qué George Le Cocq, iun d'ses anciens sèrviteurs, 'tait au suaithe.

Dans ch't' églyise, au temps jadis, eune procêssion auve lé Thuriféraire en tête, sieut par la crouaix d'la pâraisse auve un cierge dé châque côté, et les mînnistres en néthes chapes, éthaient rencontré l'côffre à l'entrée pour lé condithe au sanctuaithe pour lé sèrvice funèbre et l' Absoute des morts dévant r'prendre c'mîn pour lé chînm'tchiéthe, mais i' n'y avait rein d'ité jeudi pâssé. Deux cantiques, lectuthe d'eune êpitre et tchiques priéthes, auve eune êloge du dêfunt, prononcé dé d'dans la tchaîse, est tout ch'tch'a honoré l'drein sèrvice dé l'églyise pour George Le Cocq. Pourtant, il a 'té d'grand sèrvice à touos ses anmîns et tout l'monde dans san vivant. Mais des choses dé mème sont bein vite oubliées d'nouos jours. I' s'pouorrait, sans doute, qué l'mauvais temps avait empêchi un tas d'monde, prîncipalement l's anciens, d'êt' présents à s'n entèrrement, car l'églyise 'tait bein liain d'êt' plieine.

En attendant l'entrée du corps dé man vièr anmîn, j'pensais ès illustres tchi hantaient ch't' églyise dé St. Simon dans l'temps du Révérend C. M. Godfray et pus tard. Lé Général Neville Godfray Hind en 'tait iun. Sans doute i' n'tait pon Général dans chu temps-là, mais i' fut louoya, à l'eglyise, car jé l'viyais dans la congrégâtion quand i' r'vînt d'la deuxième grand' dgèrre et qu' j'èrvîns en Jèrri y'a 28 ans chu mais. Un aut' janne homme tch'était là quand j'tais janne 'tait Charles Walter Duret Aubin, pus tard Avocat et Protchuleux Général. Un moussieu charmant et d'belle présence.

Lé Révérend C. M. Godfray 'tait un homme êrmèquabl'ye étout. Si ma mémouaithe né m'trompe pon, san deuxième nom d'bâptème, 'tait Moses, et il 'tait généralement connu comme Holy Moses par les membres dé sa congrégâtion. Il avait eune assez grosse moustache, et quand i' montait dans la tchaîse pour faithe san sèrmon, habilyi dans les vêtements eucharistiques, les gens tchi n'taient pon accouoteunmés à vaie des chasubles et des chapes sus lus minnistres disaient tch'i' pathaîssait à un Mandarin Chinnouais. Quant à nous, acolytes sèrvants et membres du chant, j'lé criyionmes iun des saints sus la tèrre, et i' n'y a pon d'doute tch'i' fut responsabl'ye pour garder l' Mouvement Oxford en vie dans l'Églyise Anglyicanne en Jèrri duthant san vivant. Pus tard, Moussieu Athelstan Riley, Seigneur dé La Trinn'té et auteur dé plusieurs cantiques dans l' English Hymnal, donnit san support au mouvement. Moussieu Riley et Lord Halifax 'taient célebres Anglyicans laïques dé lus temps. Et l'défunt Canon Matchi L'Mathinné fit d'san mus pour lé ravigoter quand i' d'vînt Douoyen d'l'Île en 1937, mais j'n'en vai pon grand sîngne par les c'mîns à ch't heu, du mouvement, et l'églyise dé St. Simon mé pathait êt' pûtôt dév'nue un monument à sa mémouaithe.

Ch'tait-i' l'temps sombre et l'manque dé leunmiéthe dans l'sanctuaithe dé l'églyise tchi m'faîsaient penser au pâssage du temps tchi l'avait si cruellement viédgie? Comme j'mé d'mandais la tchestchion, lé cortège d'entèrrement c'menchait san c'mîn dans la grande allée pour la sortie d'l'églyise et san drein viage sus la tèrre, en direction du chînm'tchiéthe, et l'idée m'frappit qué l'âme dé man vièr anmîn n'habitait pus san corps dans les lieux sombres. Ou jouit à ch't heu d'la glorieuse leunmiéthe du Paradis, car les Saintes Êcrituthes (Chapitre XXII d'l'Apocalypse, Verset 5) nouos disent : Il n'y aura pus là la nuit, et ils n'auront point besoin de lampe, ni de la lumière du soleil, parceque le Seigneur Dieu les éclairera, et ils régneront aux siècles des siècles!

George d'La Forge
 

Viyiz étout: