Fort Lauderdale,
Florida, U.S.A.
Lé 14 dé févri, 1981.
Moussieu l'Rédacteu,
L'articl'ye Under the Clock par Meridian dans la gâzette dé Jèrri est supèrbe. Ou nouos rappelle souvent d's êvènements du temps pâssé, et v'là tchi m'întérêsse hardi viyant qué j'sis du temps pâssé mé-même, ayant 'té né y'étha nénante ans ch't' année. Dans la gâzette du treize dé novembre, 1980, Meridian nouos montre un bieau portrait du stînme Le Cygne tchi faîsait l'viage dé Gouôrray à Carteret, en Nouormandie, jusqu'à 1913.
J'm'en r'souveins tout-à-fait bein, d'chu p'tit stînme-là, ayant viagi à bord mé-même. Tchiques années d'vant 1913 - j'crai qué ch'tait probabliément 1909 ou 1910 - l'Avocat Edmund Toulmin Nicolle, dé mémouaithe respectée, m'enm'nit auve li à bord du Cygne à Gouôrray pour faithe un tou en bicyclette en Nouormandie. J'm'èrsouveins qu' nouot' preunmié arrêt pour la niet fut ès Pieux, et qu' j'eunmes eune omelette pour lé r'pas du sé viyant tch'il 'tait trop tard pour lé dîner ordinnaithe. Ch'tait la preunmié omelette qué j'avais janmais mangi, et j'la trouvis délicieuse!
Eune touânnée mémorabl'ye, chette-là en Nouormandie. L'exèrcice en bicyclette valait la peine, point d'veue d'santé. En pédalant ligiéthement nou n'sé lâssait pon trop, et nou-s-arrêtait à toutes les vielles églyises des villages en pâssant. L'Avocat Nicolle, un charmant moussieu, 'tait un fanmeux archéologue, et ch'tait hardi fascinnant dé l'ouï distchuter les traits caractéristiques et historiques dé lus églyises auve les curés des villages en c'mîn.
Lé jour dé nouot' arrivée à Carteret pour lé viage d'èrtou en Jèrri à bord du Cygne, j'rencontrînmes lé Juge Alfred Messervy, grandpéthe du Professeu Messervy d'à ch't heu, et i' nouos învitit à dîner auve li à l'hôtel dévant aller à bord. I' s'adonnait qué l'Juge était d'èrtou en Jèrri en même temps qu' nous. Lé Juge Messervy 'tait un moussieu distîndgi étout. Ch'tait li tch'avait arrangi les tabl'yes dans l's almonas des Chroniques tchi donnaient les cartchuls pour la valeu des siextonnièrs, cabots et quartchièrs des rentes fonciéthes et assîngnabl'yes tch'étaient si c'modes pour aîdgi ès clèrcots dans l's offices d'êcrivains tch'étaient enchèrgis d'êvaluer et d'collecter les rentes pour les clients.
Dans la gâzette du vîngt d'novembre, 1980, tchi veint d'arriver, Meridian a eune articl'ye întérêssante entouôrre lé Sieur Philip Winter Luce, dé mémouaithe respectée étout, tchi mouothit en 1966. Il êcrivait l'Jèrriais souos l'nom d'plieunme dé Ph'lippe d'La Golarde et ou pouvez vaie d'ses êcrituthes dans les Bulletîns d'Quart d'An d'L'Assembliée d'Jèrriais. J'tions grands anmîns san fréthe Edwin John (Jock) et mé. Jock 'tait l'Rédacteu d' La Nouvelle Chronique dans l'Vièr Marchi, quandi qu' Philip Winter 'tait rapporteux (pus tard Rédacteu) dé la New Westminster Gâzette près d'Vancouver en Colombie Britannique au Cannada.
Quand i' vînt en Jèrri tchique temps d'vant la preunmié dgèrre dé 1914, j'allînmes faithe un tou en France les trais d'nous - Jock, Philip et mé. J'm'èrsouveins qué pour l'occâsion, Jock mé fournit eune carte d'visite tchi m'donnait l'identité dé rapporteux pour La Nouvelle Chronique. Comme journalistes d'hors-pays, j'eûnmes des titchets d'entrée gratis dans les grands thiâtres dé Paris. J'eûnmes des pliaiches dans les bancs dé d'vant du thiâtre des Folies Bergères, et l's ièrs mé sortaient quâsi d'la tête en viyant ches belles hardelles, ligiéthement habilyies, sus la strade. Et j'eûnmes des mangnifiques pliaiches à l'Opéra étout. I' m'veint à l'idée qué j'nouos en r'vînmes en Jèrri d'vant Philip, Jock et mé, viyant tch'i' voulait aller vaie les clios d'vîngnes à Saumur.
J'connaîssais les pathents Luce tout-à-fait bein, et Mad'mouaîselle Eva étout tch'a nénante-siex ans et tchi s'en fut à Vancouver en 1920 pour souangni d'Philip, et j'êchangeons des cartes d'Noué touos l's ans. J'espéthe qu' ou s'en va liéthe chutte lettre dans lé Jersey Weekly Post.
La vie 'tait rêellement pliaîsante dans chu temps-là. Tch'est qu' jé n'donn'nais pon pour pouver r'vivre ches belles années d'man janne temps? À ch't heu qué l'pâssage du temps en a fait eune êpoque dé pliaîsantes mémouaithes, j'y pense souvent ouaithe tch'i' nouos est dit qué nou n'dév'thait pon vivre dans l'temps pâssé. Mais j'sis partitchuliéthement r'connaîssant d'aver joui d'eune pacotille dé bouans anmîns avau l's années, un trésor tch'a contribué - et tchi continnue à contribuer touos les jours - à la jouaie d'vivre tch'est la bénédiction d'eune longue vie!
George d'La Forge
Viyiz étout: