San Antonio, Texas,
U.S.A.
Lé 29 dézembre, 1973.
Moussieu l'Rédacteu,
Ieune des choses les pus précieuses dans la vie est l'privilège d'aver d'bouans anmîns, et v'la tchi fait grand pliaîsi d'vaie tchiquechose întérêssant à lus êgard dans la gâzette, prîncipalment quand nou-s-est s'pathés d'ieux par des grand' distances.
J'veins d'èrchéver des “coupures” (“newspaper clippings” en Angliais) d'la gâzette dé Jèrri, et des gâzettes dé Nouormandie, tchi donnent eune description dé la cérémonie d' “investiture” du Docteu Frank Le Maistre auve l's însingnes et appartenances dé san Doctorat, à l'Univèrsité d'Caën. Quand j'tchittis Jèrri pour m'en r'vénîn en Améthique, j'avais grand r'gret dé n'pouver pon rester en Europe assez longtemps pour êt' présent à chutte cérémonie, car rein n'ma janmais fait pus d'pliaîsi qué d'ouï qu' un anmîn du calibre dé Frank Le Maistre avait ieu ch't honneu-là.
J'lus s'sai r'connaîssant, au Docteu et Madanme Le Maistre, jusqu'à la fîn d'mes jours, pour lus bouanté et hospitalité envèrs mé-mème et les membres d'ma fanmile tch'ont visité Jèrri. Mais ch'n'est pon seulement à cause dé ch'là qué j'sis content d'vaie l'travas littéthaithe du Docteu êt' rêcompensé par l'Univèrsité d'Caën - l'univèrsité tchi dait nouos pâsser l'pus près du tchoeu viyant qué j'sommes Nouormands d'race - mais étout viyant qué j'sai p't-êt' mus qu' autchun, à part de sa fanmile, combein tchi l'méthite, et combein d'nyits tch'i' n'a pon dormi fort car il en pâssait la maîntchi à faithe lé dictionnaithe tch'était l'ambition d'sa vie. Il est vraînment l'grand maitre dé la langue Jèrriaise, et d'vant li “Je m'arrête et m'incline!” comme disait m'n anmîn Edwin John (“Jock”) Luce, dé mémouaithe respectée, et j'lé félicite acouo eune fais.
En pâlant d' “Jock” Luce, jé r'chus eune carte d'Noué d'sa soeu Eva, et ou m'dit qu'oulle est dans sa nénantchième année. Sa main d'êcrituthe est acouo fèrme. Eune dîngne soeu d'deux célebres fréthes. J'm'èrsouveins si bein quand ou s'en fut à Vancouver y'a un d'mié siècl'ye auve san fréthe Ph'lippe, tch'était dans chu temps-là à travailli pour la “New Westminster Gazette” en Colombie Britannique et tch'était v'nu en Jèrri en vîsite. J'allis auve li et “Jock” à Paris chutte fais-là. Jé n'm'èrsouveins pon dans tch'il' année qué ch'tait, mais i' dait y'aver pus d'souoxante ans!
J'sis tréjous en r'tard à rêpondre à toutes mes lettres. Y'en a qué jé n'peux pon rêpondre manque du mention d'eune adresse. Eune charmante lettre, êcrite par eune danme tchi s'appelle “Eune vielle Jèrriaise” mais tchi donne rein qu' Jèrri comme adresse, mé dit qu' oulle a 89 ans et qu' ou fut née dans eune fèrme et qu' ou mathyit un fèrmyi, mais qu'ou n'avait janmais ouï pâler d'donner du lait d'beurre, ès vieaux. Ou n'en donnait qu' ès couochons! Êvidemment ou v'nait d'liéthe mén articl'ye au sujet dé “Comme tchi faithe lé beurre” lé temps pâssé. V'la tchi prouve qué tout l'monde n'est pon d'la mème idée. Quant à mé, j'donn'nais tchiquechose pour aver eune bouanne tâssée d'lait d'beurre du temps pâssé à baithe à ch't heu, auve des p'tits mios d'beurre à fliotter sus l'haut. Lé lait d'beurre qué nou-s-acate dans les boutiques en Améthique n'y r'sembl'ye pon du tout et n'a pon l'même fanmeux gout d'èrva-s-y.
Ouaithe que les gâzettes dé Jèrri prannent si longtemps à v'nîn ichîn, j'ouai tchiquefais des nouvelles dé l'Île par l'entré-mînse dé lettres d'anmîns. J'veins d'èrchéver, par exempl'ye, eune lettre dé Hamilton, Ontario, au Cannada, dé Madanme Albert Williamson, née Tchéthée (ses pathents, décédés, 'taient John Tchéthée et Louise d'Aubert, tch'était d'St. Brélade), mé disant qué l'Sieur Charles Vibert, ex-Chent'nyi d'St. Brélade, n'est pus, et j'prends la triste occâsion pour faithe mes condoléances à sa veuve. Charles Vibert 'tait un charmant corps, un bouan homme et un bouan citouoyen. I' fit un magnifique Chent'nyi, courtouais mais fèrme et fidèle à sa chèrge. J'connaissais san p'pèe dès mes p'tits jours à St. Ouën. Né v'la acouo un bouan Jèrriais au r'pos êtèrnel.
Ichin, l'solé lit. Quand j'tchittis l'Michigan y'a eune tchînzaine ch'tait d'la né partout, mais à m'suthe qué l'avion allait sud la né dispathaîssait. J'avais ieu l'intention d'acater un neu moto et d'cachi les tchînze chents milles, mais y'a tchestchion d'râtionner la pétrole et j'pensis tch'i' valait mus attendre et vaie tch'est qu' l'av'nîn nouos amène. Lé Président Nixon nouos d'mande dé réduithe vitesse volontaithement à chînquante milles à l'heuthe. Les gens tchi l'font sont êtonnés d'vaie combein d'pétrole qué v'la tchi sauve. Malheutheusement, y'en a un tas tchi continnuent à cachi à la linmite pèrmînse par la louai, et y'a des chances tch'i' faudra pâsser eune nouvelle louai pour forchi tout l'monde à obéi. Y'a tréjous eune minnorité tchi s'fait un pliaîsi d'êt' contrariante et tchi fait la majorité aver à s'soumettre à l'înconvénient par sa têtouangnise!
George d'La Forge
Viyiz étout: