Trenton,
Michigan, U.S.A.
Lé 23 d'mai, 1981.
Moussieu l'Rédacteu,
J'tions justément en train d'nouos assiéthe au pid du feu, Manman et Papa êt mé, eune séthée aupres l'thée, quand j'ouînmes taper à la porte.
Bon! s'fît Manman en ouvrant la porte, ch'est vous, Maît' Pièrre. Entrez, don.
Ch'tait Maît' Pièrre Carré, lé prieux d'entèrrements.
J'sis v'nu, i' nouos dît, vouos avèrti d'la mort dé Maît' Âmice Viel tch'eut lieu dé vièrs sept heuthes hièr au sé, et vouos prier d'l'entèrrement sanm'di, l'treize du mais, à onze heuthes et d'mie à san domicile dans la Tchilliette dé Iouville. Lé sèrvice funèbre et l'entèrrement es'sa à l'Églyise Parouaîssiale à eune heuthe.
Bon!, s'fît Papa, eune heuthe et d'mie entre l'assembliément à la maîson et l'sèrvice à l'églyise?
Véthe, Maît Pièrre nouos dît, ch'est viyant qué l'dêfunt dît, d'vant san trépas, tch'i' n'voulait pon êt' porté au chînm'tchiéthe par des j'vaux. Il a don falle arrangi pour lé porter à bras tout l'long du c'mîn d'siez li à l'églyise, et l'Sieur Ph'lippe Le Feuvre, dé La Fontaine, tch'est l'entrépranneux, est d'avis tch'i' prendra la grand' partie d'chu temps-là à marchi au pas d'entèrrement et arrêter maintes fais pour pôser l'côffre sus les scabelles et changi d'porteurs. Ch'est Moussieu Bichery tchi s'en va condithe lé sèrvice, car Moussieu Pépin a attrapé eune mauvaise suée d'fraid et est hardi opprêssi, et Moussieu Barascud est hors en Suisse vaie ses pathents.
Ch'est seux qu' Moussieu Bichery s'en va aver à sé l'ver d'bouanne heuthe sanm'di matîn pour êt' à Iouville en temps pour l'entèrrement, s'fît Manman, car i' marche partout.
Mais i' n'a pon qu' faithe d'aller à la maîson, s'fît Papa.
Nan, nouos dît Maît' Pièrre, mais il însiste tréjous d'êt' à la tête des procêssions d'entèrrement tchi sont à pid. Et l'préchain jour étant dînmanche ch'est li tchi s'en va êt' à St. Georges. Et l'Douoyen s'en va env'yer san Vitchaithe dé la ville à condithe les sèrvices à la Grande Églyise, et i' s'en va mangi siez Moussieu L'Brun à La Caroline.
Eh bein, s'fît Manman, ch'est seux qu' nouot' couôsinne Vîne Hamon s'en va înviter Moussieu Bichery à couochi à la fèrme à Portinfer sanm'di la niet. L'couôsin Ph'lippe est-i' prié pour l'entèrrement?
Oui dgia, nouos dît Maît' Pièrre, j'sis v'nu tout drait ichîn d'Portinfer.
Eh bein, nouos y v'là, s'fît Manman, ch'est seux tch'i' r'veindra d'l'églyise auve Ph'lippe Hamon. Et les mousses dé l'Êcole du Dînmanche s'en vont êt' contents d'aver Moussieu Bichery à St. Georges Dînmanche, car i' fait tréjous des courts sèrmons.
Lé Sieur Viel a-t-i' 'té malade longtemps?, Manman d'mandit à Maît' Pièrre.
Jé n'sai pon trop bein, i' nouos dît, mais i' pathait tch'i' savait bein tch'i' n'en avait pon pour longtemps car il avait ieu un avèrti. Un nièr ouaisé avait tapé dans la f'nêtre justément comme i' n'sé trouvait pon bein deux jours dévant rendre lé drein soupi.
Il 'tait acouo d'charme y'a siex s'maines, Papa nouos dît. I' vînt à la forge aver san vièr bidet féthé. I' m'dît tch'il allait l'mett' à paître dans san p'tit pré pour lé reste d'ses jours quand i' tchit'ta à fèrmer. Il en criyait hardi, d'san vièr chéva. Ch'tait un homme tch'aimait hardi l's annimaux et i' n'avait janmais montré un fouet au vièr bidet, sans pâler dé l'fouetter.
I' m'sembl'ye aver ouï qu' ou-s-êtes pathents, s'fît Maît' Pièrre.
La pathenté est d'liain, Papa lî dît. Nou peut même dithe qu' oulle est si liain qué j'sommes à peine accouôthinnés. Ieune dé nouos couôsinnes, Marie L'Feuvre, fille dé Jean, mathyit un Jean Viel dé St. Brélade en mil huit chent seize, et nouos v'là dêjà en mil huit chent nénante-huit. I' faudrait aller au r'gistre en ville pour tracer la pathenté si nou peut dithe tch'i' y'en a, ouaithe qué y'en a tchi disent qué touos les vrais Jèrriais sont accouôthinnés. Mais l'heuthe avanche et il est tard pour vous d'êt' par les c'mîns, Maît' Pièrre. Vouos pliaît-i' prendre tchiquechose dévant vouos en aller?
Eh bein, s'fît Maît' Pièrre, un p'tit lèrmin né f'tha pon d'ma. V'là tchi s'en va m'huiler les jointes un mio. Jé c'menche à souffri d'rhonmatisses dans les gambes, et j'ai ieu à marchi quâsi par toute la pâraisse aniet.
George d'La Forge
Viyiz étout: