Le Ménage ès Feuvres,
St. Ouën.
Lé 2 d'août, 1980.
Moussieu l'Rédacteu,
Tch'est qu' tu'aim'thais mus, un anmîn m'dit eune fais quand j'tais mousse, n'être pas si bête comme tu pathais, où n'pathaître pas si bête comme tu'es? À c'menchi, v'là tchi m'sembliait êt' eune dévinnâle, mais i' n'mé prîns pon longtemps à vaie l'travèrs et j'lî donnis la rêponse, qué j'aim'thais mus pathaître pus bête qué jé n'sis, et ch'est acouo d'même au jour d'aniet.
Viyant l'run qué l'mot bête otchupe dans l'Dictionnaithe Jersiais-Français du Docteu Fraînque Le Maistre, i' m'est v'nu à l'idée qu' ch'est un mot, comme y'en a bein d'aut', sans doute, tch'est preuve qué nouot' vielle langue est ieune des pus expressives au monde. Par exempl'ye, nou dit d'un homme tch'est întelligent mais tch'a l'air pûtôt binnasse: I' n'est pon si bête comme i' pathaît. D'un homme tch'a 'té întelligent mais tch'est en chiques viyant tch'i' s'est appaûvri par baithe ou tchique aut' avârie, nou dit: I' n'est pon si bête comme il est mal habilyi.
D'un homme tchi n'est pon rustique dé caractéthe mais tch'i' s'trouve en embarras, nou dit: Il est pus bête qué mauvais, ch'tî-là. Mais d'eune pèrsonne tch'est rêllement bête, nou dit: Oulle est pus bête qué poule, car oulle a pus d'pé qué d'plieunmes! ou Oulle est bête comme eune ouaie tchi coue sus des pièrres!
Nou pâle, étout, d'êt' bête comme eune âne, mais quant à mé j'n'en sis pon seux, qu' eune âne est bête. J'ai tréjous ouï qu' eune âne èrfuse dé bouogi s'oulle est trop chèrgie, et ch'la né m'pathaît pon êt' bête. Et l's anciens pâlaient d'êt' bête comme l'âne à Jean Vènement tchi riait d'ses sottises, mais ch'tait-i' des sottises à san maître qu' ou riait, ou des siennes?
Un bouan vièr diton nouos dit qué L'homme lé pus bête pâle à tue-tête! Mais l's anciens en avaient d'drôles étout, comme ch'tî-chîn: Bête comme Jean Badgi, du Di, tchi faîsait des crêpes au Dgiâbl'ye.
Quand un homme fait d'tchi à la frouque out chi n'fait pon san travas comme i' faut, nou dit: I' fait d'tchi en bête. Et pour eune pèrsonne tch'est êtonnée d'ouï tchique chose sensâtionnel et tchi n'en r'veint pon, nou dit: Oulle en a resté bête. D'un homme tch'est malîn ou rusé, j'ai ouï l's anciens dithe: Ch'est eune malinne bête, tu vai, qué ch'tî-là. Dé iun tchi fait des sifèches et tch'i' s'crait pus aufait tch'i' n'l'est, nou dit: Lé v'là à faithe de san bête.
L's anciens disaient à un êfant: Tu n'as pon couo veu la bête tchi t'mang'gea! Ch'tait pour lî faithe comprendre tch'il avait d's êprouves à lî v'nîn et bein des choses à apprendre dans la vie, car ou n'est pon tout roses. D'un homme tch'est tréjous d'bouan heunmeu, et tch'est farceux et êtibotcheux, nou dit tch'il est La bête au Dgiâbl'ye.
Sans doute, nou n'ouait pus ches expressions et vièrs ditons en convèrsâtion ordinnaithe dé nouos jours. Ch'est même à peine si les gens ont l'temps d'arrêter à pâler et s'entre dithe bonjour à cause du tîntamarre et d'la prêsse dé la vie. Les jours et les s'maines lus en vont si vite qué nou-s-est à la fîn du mais sans s'en apèrchéver. I' sembliait qué l'Thée des Trais Pâraisses, lé Dînmanche des prix à l'Êcole du Dînmanche et Noué n'veindraient janmais quand j'tions mousses. À ch't heu Noué nouos tchait sus l'co si vite qué la bouannefemme n'avait pon rêalisé tch'il 'tait temps d'faithe san podîn d'Noué!
Lé grand malheu tchi nouos pend sus la tête est la vitesse dans tchi nouot' langue Jèrriaise s'en va dispathaître. Ch'est dans ma pâraisse qu' ou s'en va mouothi. Heutheusement qu' à m'n âge jé n'vèrrai pon s'en entèrrement. Mais ou s'en va survivre dans l'fanmeux Dictionnaithe du Docteu L'Maistre tchi s'trouve sus l's ais des biblyiothèques des unnivèrsités d'La Nouormandie et d'bein d'aut' pays du monde.
George d'La Forge
Viyiz étout: