Les Pages Jèrriaises

Galînmatchias

Par un Gris Ventre

Si ch'est qu'ou n'y viyiz pon bein cliai dans ch'tchi siet, vouos pliaîtha-t-i' touonner à la dreine page? Car ch'est seux qu'y'en a d'vous tchi dithont qué hardi d'ches mots et expressions sont, comme éthaient dit les vièrs, èrlévés en bosses! Y'en étha, sans doute, qu'ou n'avez janmais ouï d'vant. Mais j'vouos asseûthe qué ch'est tout d'bouon vièr Jèrriais - hélas, tout d'tchi tchi s'en va à grands pas
pouor janmais n'èrvénîn!

TCHESTCHIONNAITHE


1. Tch'est qu'ch'est qu'du crachet?

2. Tch'est qu'est la vielle expression Jèrriaise pouor “couôtre”?

3. Tchi s'sent morveux s'mouoche, tchi s'sent galeux s'gratte! Tch'est qu'ch'la, veurt dithe?

4. Quand est-che qué nou dit : Lé chein tchi vend sa graisse mange sans pain?

5. Tch'est-che qué “faithe la livre tchînze”?

6. Tu'es pus bête qué poule! Tch'est qui veint auprès pouor finni l'diton?

7. R'penti. Tch'est qu'est la sîngnification d'chu mot-chîn entouor d'la pâtich'chie?

8. Grèves, magot! Ta fosse n'est pas liain! Quand tchi qu'nou fait sèrvi ch't' expression?

9. Quand nou-s-est tréjous scêllant, dé tch'est qu'nou souffre?

10. Tch'est qu'nou dit quand du nouvieau cidre est finni d'bouoilli, qu'il est --- ? .

11. Tch'est qu'est: Du temps pointu? Du gravyi saussé? Un célérîn? Un co journieau? Un cat d'âtre? Un gliussé? Des god'nivelles? Un poupot? Du margouôlin? Eune mazette? Un foncet?

12. Connaiss'ous chu diton? L'heûsi n'a janmais ieu à emprunter du tardi !

13. Et ch'tî-chîn? D'la bliâse la s'maine dé Noué - d'la g'lée la s'maine dé Pâques!

14. Nou dit d'eune femme tchi s'est bein prêsèrvée, tchi pathaît acouo bein ouaithe qu'ou s'vieillit, qu'oulle est "fraîche comme eune laitue à la rôsée". Ch'est pittoresque, n'est-che pon?

15. Finnissiz l'expression, quand nou crie pouor dîner, --- A la soupe! ---

16. Tch'est qu'est l'êtchivalent pouor “faithe acraithe qué la leune est faite dé fronmage”?

17. Tch'est qu' “èrre-t-alle?” veurt dithe?

18. Les heuthes sont faites pouor les machons. Tch'est qu'est l'explyication d'ch'la?

19. A propos dé tchi qu'nou dit - Quand nou fait un nœud auve sa langue nou n'l'èrdêfait pon atout ses dents -?

20. Tch'est qu'nou dit d'un homme assez ancien tchi s'èrmathyit?

.
.
.
.
.
.
.
.
.
.
.
.
.
.
.
.
.
.
.
.
.
.
.
.
Galînmatchias Explyitchi


(S'i' vouos pliaît èrbrousser c'mîn deux'trais pages).

1. Du crachet ch'est du hardi court vrai craîssant sur les rotchièrs au pid des falaises tch'est l'pus souvent à se et qu'nou ramassait pouor brûler dans l'âtre.

2. Passer l'point.

3. Si l'bonnet vouos fait-m'ttez-lé!

4. D'un fèrmyi tchi vend san feunmyi.

5. Faithe banqueroute.

6. Car tu'as pus d'pé qué d'plieunmes!

7. Comme exempl'ye - quand nou-s-est à faithe des mèrvelles. Les vièrs laîssaient la pâte èrpenti - s'assiéthe.

8. Quand tchitch'un créheûle.

9. D'la sé!

10. Lé cidre est tchuit.

11. Du temps sé et fraid. Du gravyi d'mé. Un célérin est un paîsson et un co journieau étout. Eune personne frilieuse tch'est tréjous au coin du feu. Eune balle, dé fi ou d'laine. Des contes. Un p'tit êfant, et nou dit ch'la en moqu'sie d'eune grand' pèrsonne étout. D'la mangeaille mal apprêtée. Eune olîmpe ou femme sans ênèrgie. Lé restant crôteux d'un pain.

15. Lé dgiàbl'ye est tchuit!

16. Faithe acraithe qué la leune est faite d'eune pé d'vieau. Ch'est 'chîn l'pus vièr diton des deux.

17. Erdote-t-alle?

18. V'là tchi singnifie qu'les machons prennent lus temps!

19. Du mathiage.

20. Quand un vieil homme sé met l'amour en tête,
Dé touos les vièrs fos ch'est acouo li l'pus bête! Mais don, n'y'a pon tréjous d'mèr, n'est-che pon?


 

Lé Bulletîn d'Quart d'An dé L'Assembliée d'Jèrriais  

Viyiz étout:

 

Les Pages Jèrriaises