Quand j'vîsitais St. Pétersbourg à ches drein, j'allis dînner dans l'palais Stroganoff. Ch'est en tchi nou-s'a bâti un café dans l'bel du vièr rose palais baroque, et nou peut y c'mander d'la viande dé vaque à la stroganoff. Lé café est, coumme nou dit, eune manniéthe dé happe-horsain, et ma pliatelée d'stroganoff 'tait pustôt d'la tchèrouongne, mais chenna m'fît pliaîsi d'mangi chutte spécialité-là exactément où'est qu'oulle avait 'té înventée par lé Comte Stroganoff.
Y'a des gens tchi viagent en mangeant des bourgailles et des frites à touos les bords, mais ch'est pus întérêssant, m'est avis, d'gouôter les spécialités sus pliaiche: du café Viennouais auve eune tranchie d'gâche dé chocolat en Autriche; des r'pas à la broche en Turtchie; des domplinnes dans la République Tchèque; et du goulache en Hongrie.
Nou peut fricoter à Caën auve lus tripes et en Brétangne auve des crêpes et du far. Lé pâté Lorrain et la choucroute au nord-êt d'la France et la soupe ès paîssons au sud, lé boudîn Êcossais et l'êtchuivée Irlandaise èrprésentent ches pays-là, mais jé n'sis pon seux si l'vrai est l'pliat tchi donne la pus haute èrnommée à la tchuîsinne Gallouaise.
Mais auve les produits du monde sus l's ais dé touos les supèrmarchièrs, des pays ont c'menchi à copyrighter ou protégi lus r'chettes, tout coumme lé nom d'nos Rouoyales est achteu rêsèrvé à Jèrri par la louai Ûropéenne. Il en est d'même, par exempl'ye, pouor la breune biéthe dé Neuchâté, lé cidre Nouormand, lé camembèrt dé Nouormandie, lé gorgonzola et un tas d'aut's produits traditionnels.
Les Cornouaillais veulent ajouôter lus pâtchieaux à la liste protégie. Faudrait-i' étout ajouôter nos pais au fou et nos mèrvelles? En tout cas, j'n'éthais pon ajouôté, mé, la viande dé vaque à la Stroganoff du palais Stroganoff à St. Pétersbourg. Bouôn appétit!
Geraint Jennings
Viyiz étout: