|
Les fliamants à la Mênag'gie décidîtent d'aver un parti. Il' învitîtent l's orang-utans tch'èrmèrcyîtent, ieux, les fliamants. Les gorilles, mais, 'taient-i' envieurs! I' fîtent des grîngnes et fîtent des teurs. Mais ch'tait tout iun pouor les fliamants: “Qu'i' faichent d'lus mus! Qu'i' faichent d'san tchian! Les gorilles n'sont pon învités. Jé n'voulons pon d'ches marmoûsets!” 'Taient-i' bein mârris, les gorilles! Nou les ouïyait hueûler en Ville! Las! coumme i' maûdîtent les fliamants. Lus înjuthes vos touônn'nait les sangs! Mais ches ouaîsieaux 'taient dueurs assez: “Jé n'voulons pon d'ches marmoûsets! L's orang-utans sont d'nos anmîns. Aimer les gorilles? Tchi niolîn!” Les gorilles rouogîtent dé coléthe. Des rouoges gorilles? Ah, tchi mînséthe! I' touônnîtent rouoge, pis pourpre, pis bliu. Mais les fliamants maintîntent lus r'fus. Tant pus d'coléthe, tant pus d'couleurs, Les gorilles, 'taient-i' bein futhieurs! I' d'vîntent rîlyis, i' d'vîntent tartan En maûdissant ches peûles d'fliamants. Mais les ouaîsieaux 'tait touos têtouôngnes. “I' faut, à la fîn, qué nou souongne Nos anmîns, les orang-utans!” qu'i' dîtent d'eune vouaix fèrme, les fliamants. Les gorilles (ayant touônné vèrt) juthîtent (mouôn Doue!) coumme des tchéthtchièrs. I' touônnîtent jaune, i' touônnîtent blianc mais rein n'pèrsuadait les fliamants. “Nânnîn, jé n'sommes pon pèrsuadés, Jé n'voulons pon d'ches marmoûsets!” Les gorilles touônnîtent, en futhie, orange (véthe, orange coumme lé frit!) “Des oranges gorilles? Ch'est bein cliai qu'il' ont changi, ches marmoûsets. I' sont achteu,” dîtent les fliamants, “à tchiquechose près, d's orang-utans!” Les gorilles, ayant orangi, fûtent don învités au parti. Et oranges coumme i' taient, et bieaux, il' eûtent du fanne siez les ouaîsieaux. Moral: Nou pouôrrait, si l'idée nos veint, comprendre qué l'changement fait du bein.
Geraint Jennings |
Viyiz étout: