|
Eune caûque-souothis s'avisit un jour d'sé sîlyi dans eune tâniéthe de b'lette sans aver r'mèrtchi l'dro La b'lette, affrontée d'même tréjous contre les souothis, fut quédaine la mangi d'un co. "Qué tchi! Ôs'-ous," qu'ou dit, "vouos mouontrer ichîn, véthe, auprès qué vot' lîngnage a êprouvé dé m'niéthe! N'êt'-ous pon eune souothis? Lé vrai ch'est d'ravêtchi: ous êtes ieune dé ches'-là - ou jé n'sis pon eune b'lette." "Nou-fait-dgia!" la rêponse fut nette. "Mé, j'n'en sis pon ieune d'chu mêtchi. Mé, eune souothis? Nou ment à dithe eune chose itelle. Faut r'mèrcier l'Griyeux d'l'Unnivèrs: j'sis un ouaîsé - èrgardez m's ailes. Hèque toutes les bêtes tchi volent dans l'air!" Ou pèrsuadit auve chutte raison et gângnit sa libéthâtion épis san drouait dé prendre la paque. Deux jours pus tard, chutte pouôrre niaûminne s'drotchit siez eune aut' b'lette - êcliaque! - tchi n'aimait pon l'ouaîth'lîn et en 'tait eune enn'minne. Nou craithait qu'chette-là 'tait ès grand dangièrs enclyinne! Madanme la B'lette, mouontrant ses dents épis ses grîns, fut d'avis d'la d'vouother par cause qu'ou 'tait d'l'ouaîth'lîn. Tout coumme la caûque-souothis fit san protêt d'couôteunme: "Mé, un ouaîsé? Quément! J'sis d'aut' chose qué chenna. Tch'est qu'il a, un ouaîsé? Des plieunmes. J'sis eune souothis! Couôsinne des rats! Qué l'Bouôn Dgieu maûdiche touos les cats!" Oulle avait deux fais ardgui et deux fais d'même sauvé sa vie. Y'en a tchi lus adonnent prêts à touônner câsaque; et, coumme chutte caûque-souothis, traitent autchun risque dé tru. L'avisé dit à Paul ou Jacques: sait "Hèque les Rouoges!" sait "Hèque les Blius!" Jean de la Fontaine Vèrsion Jèrriaise dé Geraint Jennings |
Viyiz étout: