|
Eune tortue et un lièvre fîtent un accord un jour, pouor vaie létché dg'ieux pouôrrait couôrre lé pus quédaine et arriver l'preunmyi à la fîn d'lus course et en gângni l'prix. Lé lièvre, pouôrri d'ordgi, rit à ha-has d'penser combein qu'la tortue r'tèrgétha. "Mêfie-té! Tant pus d'prêsse, tant pus d'abus," qu'ou lî dit înnouothamment, la tortue. "À vos mèrques... prêts... allez!" - I' prîntent la paque. Lé lièvre s'en fut, bétôt pon pus qu'eune taque au liain. La tortue gabathait acouo (les tortues, criyiz-lé, n'ont dgéthe d'avo). Lé lièvre, s'viyant un vièr but avanchi, crut pouver bein prendre eune pause pouor dormi. Mais la tortue atout châque pas s'fit v'nîn un brîn pus êlouongnie avaû lé c'mîn. Ou pâssit douochement l'lièvre, tchi ronfliait fort, et p'tit pas auprès p'tit pas, s'traûlit hors d'la vaie. Pus tard l'lièvre s'rêvilyit d'un co: "Où'est qu'est chutte tortue? A-t-alle ieu tchique dro?" Ah, lièvre pièrcheux et ordgilleux: nânnîn, la course dé la tortue v'nait à sa fîn! Lé lièvre s'arroutit d'un embront, adèrt à rattraper la bête à cruque d'eune ièrre. Mais las! Il avait bieau couôrre coumme... un lièvre, i' 'tait driéthe. Et ouaithe qu'il eûsse la fièvre pouor faithe des grôsses engambées et laies grîngnes, i' n'pâssit pon l'aut' d'vant d'crouaîsi la lîngne. "La gângnante est la cheinne tchi fait d'san mus... même s'ou porte sa d'meuthe!" qu'ou s'fit, la tortue. Geraint Jennings |
Viyiz étout: