Dévant l'année 1851, dans la carre dé iun des clios d'l'aut' côté d'la route et pas liain d'la maison tchi s'appelle dé nouos jours "Preston House", à La Rocque, y'avait un gros pèrron tch'était connu souos l'nom dé La Rocque Godesme (ou La Rogodaine). Il est probabl'ye qué lé vaîsinné d'La Rocque prînt san nom dé chu gros rotchi. Quand l'églyise dé St. Pièrre la Rocque fut bâtie en 1851, la pièrre du pèrron fut cârriée pouor sa construction. En passant, disons tch'i' y'eut des difféthents entre l'aûgni du clios et l'Minnistre entouor lé tchithiage dé la pièrre.
Y'a deux légendes qué les gens d'l'Est ont ouï par lé passé. Y'a d'autres histouaithes étout entouor La Rogodaine, partitchuliéthement concèrnant lé saint Maglouaithe, mais jé crai qué toutes et châtcheune dé ches'-là ont été fabritchies, dépis l'année 1835 jusqu'à quâsi la fîn du siècl'ye, par difféthents auteurs, et les faîtchieaux n'sont janmais mentionnées dans ches'-là. Tout porte à craithe qué y'a chance qué des contes entouor les faîtchieaux saient hardi pus vièrs, ayant 'té racontés dé généthâtion en généthâtion, et r'cordés en êcrit (mais pas tous) à ches drein comparativement.
La preunmiéthe, don, des deux vielles histouaithes dit qué, y'a bein d's années quand les p'tites gens d'meuthaient dans l'Ile, iun d'ches faîtchieaux s'êmancipit (pouor tchi raison pèrsonne n'ont janmais seu) d'aller, à mié-mathée, qu'si un gros perron dans la grève ; i' chouaîsit lé chein tchi lî fallait et l'emportit au vol à tèrre dans san d'vanté. Un co par dessus La Rocque les amathes dé san d'vanté dêfîdrent et l'pèrron tchit dans la carre du clios où'est tch'i' restit jusqu'à temps qué v'là tchi fusse cârrié en l'année susdite.
La deuxième histouaithe concèrne deux giants tch'eûdrent séthieux grabuge et tchi s'entre-dgettaient sans cêsse, châtchun ayant l'idée d'achouêmi l'autre au pus tôt. Un jour iun d'ieux s'trouvait sus l'haut du Vèrcliut (à Grouville) et il avisit s'n ennemîn engambant l'travèrs dé La Rocque. I' gaffit un gros pèrron tch'était d'à main et l'fliantchit sus li. Lé pèrron adèrchi tchit dans la carre d'un clios et d'vînt connu comme La Rocque Godesme. I'n'est pon dit si l'coup tuit l'giant ou tchi.
Ah ça, quant à l'originne du nom La Rogodaine y'a raison à craithe qué l'mot veint dé "Rocque" et "Godesme" - raccourchi dé " Nicodème ". Dans un contrat dé 1607 il est tchestchion d'la maison d'un Jean Pithouet (Pirouët), fis Jacques, auprès d'La Rocque Godesme, à Grouville, et dans un Acte dé 1541 les deux mêmes mots sont donnés. V'là tchi sîngnifiêthait, don-la rocque d'un cèrtain Godesme (ou Nicodème). Dans un aut' dotchument d'circa 1218, il est fait mention dé la "Rocque Godeine".
(Auve les r'mèrcyîments d'l'auteur dé ch't articl'ye au Sieur G. W. Bertram pouor sén aîgue au sujet).
Viyiz étout: