À ches drein, les Chinnouais lanchîtent lus preunmié astronaute en orbite. La tchestchion qu'nou lî d'mandait quand i' 'tait d'èrtou d'l'espace 'tait chette-chîn: “Ch'est-i' vrai qu'nou peut vaie la Grand' Muthâle dé Chinne d'là haut?” L'astronaute avait à d'sappointer les gens en rêponnant qu'ch'est un mythe qu'la Grand' Muthâle est la seule construction humaine visibl'ye d'l'espace.
À chein qu'nou dit, y'a souo-dithant des “muthâles Chinnouaises” dans des banques et des compangnies d'finnance, mais j'dithais qu'autcheune muthâle Chinnouaise né vaut pon la maîntchi d'eune bouonne muthâle Jèrriaise en grannit. Eune p'tite muthâle en pièrre secque, i' m'est avis, est pus belle étout qu'eune grand' muthâle bâtie par des dgaîngues d'ouvrièrs.
Mais y'a des muthâles - par exempl'ye, les muthâles tchi divîsent les commeunautés - qu'nou-s'aime bein vaie dêmolies. Mé, j'tais à Moscou au mais d'Novembre mille neu chents huiptante neuf quand la Muthâle dé Bèrlîn tchit, et j'eus à viagi par la ville fraîchement rêunnie justément tchiques jours auprès la tchête d'la Muthâle.
Nou peut înmaginner la tchête d'aut's muthâles avaû les siècl'yes. Quand les chent'nièrs et légionnaithes Romains tchittîtent la Grande Brétangne, y'avait-i' des Picts à danser sus la Muthâle à Hadrien dé même qu'les Bèrlinniens fîtent y'a quatorze ans? Et ch'est seux qu'nou n'vait pon les muthâles dé Jérico d'l'espace d'pis qu'Josué et ses trompettes les fîtent êcrouôler.
Viyant qu'nos muthâles dé gardîn sont l'siez-sé d'pliantes et d'annimaux, i' sont bouannes pouor not' envithonnement. Tch'est qu'il en s'sait d'not' vèrte lêzarde et nos cratchillons sans nos vielles muthâles?
L's astronautes né vaient pon les muthâles, mais i' méthitent d'êt' veues d'pus près!
Geraint Jennings
Viyiz étout: