Les Pages Jèrriaises

En Corée

Countes d'un Èrv'nu 'Y'a tchique temps,' sé fit l'Ph'lip Desclios qui r'venait de mett' ses vaques à l'herbe, 'j'taimes à pâler d'l'expérience tchi fallait pour suivre eun mêtchi coumme le tchein, et tu m'dis que le mains d'expérience qué nous a lé mus qu'nou's'dêpliauque. V'là tchi m'semblye drôle, expliqué mé pourtchi.'

'Eh bein, par exemplye,' j'lis dis, en dgiêz'neu' chent trentehuite, quand j'n'avais 'té au Japoun qué mains qu'deux ans, et que j'n'avais qué justément vingtquatre ans, mén Ambassadeur m'envyit à Seoul en Corée, tchi dans chu temps-la faisait partie d'l'empire du Japoun, coumme Consul-Général agissant.'

'Mais,' jé m'fis à m'n Ambassadeu, 'j'n'y counnais rein, du travas counsulaithe'!

'Bah, bah,' i'm' rêpounnit, ' né t'gênes pas, tu pourras t'desbrouailli. Y'a là-bas à Seoul eun sécrétaithe du noum d'Donaldson qui sait tout ch'ya à saver au sujet des affaithes counsulaithes, et ches li qui f'ra l'travas. Tu n'éthas rein à faithe dans l'office qué d'mett' ton noum ès documents qué Donaldson té prépar'rat, et tu pourras continuer ta vraie tâche, d'apprendre lé Japounnais.'

'Et d'même, mé v'la hors en Corée. A la gare à Seoul Donaldson 'té là à m'attendre. I'paraissait raide bouan gâs. Mais dans la vétuthe en nos allant au Counsulat-Général i'm'dit que j'tais v'nu juste en temps pour aller ès partis et réuniouns qué tout l'monde 'taient à li' dounner, car i's'n'allait rentrer en Angliéterre dans trais jours.

'Ah bein, tu penses, mon Ph'lip, l'êffet que v'là tchi fit sus mé! Persounne à Tokyo, pas même l'Ambassadeu', ne m'avait dit qué Donaldson s'n'allait tchitter si vite et que v'là tchi s'n'aller m'laissi tout seu' à coundithe l's'affaithes du Consulat-Général. Dabord, v'la tchi m'fit hardi mârri, mais après tchiqu' temps jé m'mins à rithe et je m'dis: 'Boun, si chest d'même qu'i' veullent s'y prendre, et bein mé, j'sis prêt'.

'Eh lé v'là, mon Ph'lip, trais jours après m'n'arrivée, là-bas je m'trouvis tout tout seu'. J'n'avais qu'eun espèce dé sécrétaithe japounnais, mias j'savais bein qu'i' tait espioun et qu'il allait racounter ès militaithes japounnais tout ch'tchi s'passait dans m'n'office. L'office 'tait dans eun vièr bâtisse et entre ma chambre et la sienne au sécrétaithe y'avait eun manièthe de vitchet. J'm'apérchus tout d'suite qué l'sécrétaithe gardait tréjous chu vitchet ou'ert, pour vaie et entendre, chein tchi s'passait dans m'n office, mais je n'dis rein et ne freumais l'vitchet que quand j'avais eun client.

Mais eun buoan jour quand j'arrivis dans m'n office lé vitchet 'tait ou'ert et y'avait, assis avec le sécrétaithe, eun gendarme militaithe japounnais. Le mêtchi d'ches gendarmes-là, ch'tait l'même qué du Gestapo en Allemagne. Bein seux, i'n'avait autcheun drouait de v'ner s'installer dans m'n office, mais j'crai bein qué l'gestapo japounnais pensaient qu'eun janne gamin coumme mé éthait ieu peux d'trouver à r'dithe. Mais i'n' sé n'taient pas rendus coumpte que j'tais Jèrriais! J'érgardis chu pérrot à travers le vitchet et j'li dis d'aver à sorti et de n'jamais rentrer, ni li ni autcheun aut' membre éd police, dans mon Consulat-Général sans ma permissioun. I'tait furieux, mais quand i'vit que j'n'allais pas m'laissi êffriter i' sorti et jé n'r'vis pas.'

Le client qué j'avais avec mè quand v'là tchi s'arrivit 'tait membre du club des étrangièrs. I'n'aimait pas du tout les militaithes japounnias et i' racounti avec pliaisi à touas ses parchounièrs à la barre du club comment qu'chu janne gâs en chèrge du Consulat-Gènèral avait mînt à la porte eun membre d'la Gestapo japounnaise, chein qu'ses supérieurs, qu'avaient d'l'exérience, n'éthaient jamais ôsé faithe. Et quand i'l'entenditent, touas les membres du corps counsulaithe, que passaient pus d'temps au club qu'i' n'faisaient dans lus offices, sé d'mandîtent coumment qué j'allais m'en dêhaller.

Après tout s'nou'savait s'y prendre, nou'm' mettait pas eun membre d'la police militaithe japounnaise a la porte! Si j'avais ieu pus d'exérience, i' s'disaient, j'm s'rais prînt autrément, et j'n'éthais pas fait eun enn'mîn du Gouverneu' d'la Corée, qui tait général et l'chef de' la police militaithe. 'Mais lé-v'la, i's'faissaient, 'chu d'la Mare là est tout janne, et i' manque d'expérience'. Le Counsul-Général de l'Amérique, qui tait Doyen du Corps Counsulaithe, mé d'mandit d'aller l'vaie, et i'm'dit qué j'n'avais pas agi coumme i'faut, et qué j'avais fait grand tort ès rapports entre él Corps Consulaithe et l'Gouverneu d'la Corée.

'Mais, vai-tu, mon Ph'lip, dans chu mounde tout n's'arrange pas tréjous au gré des gens q'ount d'l'expérience. I's'adounnit qué tchînze jours pus tard ch'tait l'jour de naissance dé l'empéreur du Japoun. Le Gouverneu avait tréjous chu jour-là eune réunioun du Corps Counsulaithe pour féliciter et payi respé à l'empéreu'. Puisqu' dans le Corps Counsulaithe j'tais l'seul qui pâlait l'japounnais assez bein, ch'tait mé qu'eus à faithe lé discours dé félicitatioun. Quand j'fus fini, lé Gouverneu' qui n'tait vraîment pas mauvais gâs s'appréchit d'mé et m'dit: 'Jusqu'aniet jé n't'aimais pas trop, car j'savais bein chein qu't'avais fait à ieun d'mes agents, mais après aver entendu ton discours aniet, j'sai bein qu't'es bouan réprésentant de ton gouvérnement mais étout buoan amîn du Japoun. J't'asseuthe que jé n'm'envais pas envier d'autres de mes agents espiounner sus té dans t'n office'.

'Moussieu l'Gouverneu" j'lis rêpounnis, 'ou pouvez en envier autant qu'ou' voudrez, mais mé j'vous asseuthe que si ous en enviez d'autres, i' s'rouent mints à la porte étout'.

Le General s'êbouffit d'rithe. 'Tchi bouanne chose', i's'fit, 'dé n'aver, coumme té, autcheune expérience. Si t'avais té coumme tes collèges counsulaithes ichein bein pus vièrs et avec bein pus d'expérience qué té, tu n'éthais jamais ôsé m'dithe d'ité. Té et mé, j'allouns bein accorder'. Et en effet, dès chu jour là, j'nos accordîmes coumme deux clioches.

Le Vièr Trin'tais
23/4/1992
 

Viyiz étout:

 

Les Pages Jèrriaises