L'aut' jour, quand j'avaîmes ieu tellement d'plyie que n'y'avait autcheun moyen de travailli la terre le Ph'lip Desclios ne savait pas tchi faithe de sé-même et, pour passer l'temps i' ragagnyit siez me bavarder et, sans doute, espéthant que j'li dounn'rais eun p'tit lèrmin. 'Tu m'pâlais y'a tchiques semaines,' i's'fit, 'de ton temps au Japoun dévant qu'i' nos fîtent la dgèrre. Racounte me chein tchi s'passit.'
'Eh bein, vai-tu,' j'lis dis, 'eun an d'vant qu'j'arrivis là les militaithes avaient assassiné le gouvernément du jour, qu'avait 'té êlu par le peuplye, et prînt pouvé. L'peuplye, les gens ordinaithes, ne'taient pas du tout en peine de ch'na, car la puspart de ieux dêtestaient les militaithes. Mais tchi faithe? S'il' avaient dit même eune parole countre les militaithes i' sé s'r'aient trouvés au mains en boête et pus probablyément éthaient 'té fusillies. I' fallait s'counformer - ch'est à dithe quand les militaithes ou lus agents, le police idéologique, 'taient par les c'mîns.'
'Après qu'j'avais 'té au Japoun eune an j'prîns eune maisoun Japounnaise dans eun quartchi d'Tokyo tout à fait japounnais. I' s'adounnit que justément dans chu temps là les militaithes, viyant que l'peuplye 'tait trop pro-britannique pour lus goût, décidîtent de faithe la propagande countre nous et il' ordounnîtent que l'radio au c'menchement d'chaque programme et les gazettes touas les jours publiyîssent la d'vîse: "A bas la Grande Bretangne, lé cancer de l'Orient".
'Et en effet, pas seulement sus l'radio et dans les gazettes, il' affichîtent même chutte d'vîse sus touas les pôles de téléphone le loung des routes partout l'pays.' Et ch'tait dans chutte sit'uation-là que j'fus m'mett' à vivre parmi les Japounnais.
Et j'm'en vais t'dithe, mon Ph'lip, j'n'éthais pas peu aver d'miyeurs vâsîns. I'm saluaient cordialement, me s'soua'ttaient tréjous l'bonjour, voulaient saver si y'avait autcheune chose qu'i' pûssent faithe pour mé et, en effet, 'taient aussi bouans amîns et vaîsîns qu'autcheun Trin'tais.'
'Ah dame,' s'fit l'Ph'lip, 'ch'là, je n'lé crai pas. N'ya persounne au mounde, et surtout pas d'Japounnais, tchi puîsse etre ten amîn et ton vaîsîn coumme eune Trin'tais.'
'Boun, boun,' j'lis dis, 'j'sis d'accord qué mes miyeurs amîns sount Trin'tais, Mais, quant ès Japounnais, arrête que t'aies entendu la fin dé m'n'histouaithe.
'Eun bouan jour, quand j'sortis d'ma maisoun pour aller à l'office, touas mes vaîsîns 'taient là et, aussi tôt que j'dêhallis i' s'mîntent tous à heurler: A bas la Grande Brétangne, lé cancèr de l'Orient". I'n m'attatchîtent pas et n'mé fîtent autcheun ma, mais quand-même j'trouvis-s ch'là assez drôle que mes vaîsîn, tchi jusqué chu matin là avaient 'té si av'nants, s'saient si subitement dév'nus mes enn'mîns.
'Mais chu sé là, quand j'érvins à ma maisoun, i'taient touas là à m'attendre. Bein d'ieux 'taient en lèrmes et lus chef vînt à mé et m'dit: "J'soummes v'nus vos d'mander pardoun pour à matin, mais viy ous, la police militaithe 'tait v'nue parmi nous nos ordounner d'dêmounstrer countre vous, car ous êtes britannique, et d'même not' enn'mîn. Je n'soummes pas dutout de ch't'idée là, mais ou savez bein chein tchi nos s'rait arrivé si j'avaimes érfusé. Je n'pouvaimes rein y faithe, et j'espéthouns tous qu'ous allez coumprendre. J'voulouns tous qu'ou sachez que chein qu'j'avouns fait à matin 'tait tout a fait countre not' volanté".
'J'lis d'mandis dabord si 'tait seux qué n'y'avait pas d'police ou d'lus agents parmi ieux, et quand i'm'dit qu'y'en avait pas j'lus dis à tous: "Mes bouans vaîsîns, chein tchi s'est passé à matin, j'n'y pense pus et ous êtes tous coumme ous avez tréjours 'té, mes parchounniers et mes comarades".
'Ah, mon Ph'lip, les vu v'là tchi s'ermettent'à heurler, mais chutte fais pas countre mé, comme il' avaient 'té oblyigies d'faithe chu matin là, mais pour mé. "Banzai, banzai" i's'fitent (Banzai veurt dithe: 'Que tu vives mille ans) et d'jà qué j'taîmes déjà bouans amîns, dès chu moment là j'd'vînmes raide bouans parchounnièrs'.
'Eh bein, bounsens d'la dgèrre,' s'fit l'Ph'lip. 'J'n'éthais jamais creu qu'les Japounnais éthaient 'té sis à av'nants, viyant coumment qu'i' s'coumportîtent dans la dgèrre.'
'Lé v'là,' j'lis dis. 'La dgèrre est faite par les militaithes, et n'ya pas à r'dithe, les militaithes Japounnais dans chu temps là, ch'tait d'vrais salauds. mais les gens ordinaithes én 'taient pas dutout d'même.'
Le Ph'lip sé l'vit pour s'en aller. 'Drôle dé chose,' i's'fit, 'que chutte vie. Le pus qu'nous y pense, le mains qu'nou' y coumprend.'
Et vi-yous, buoannes gens, lé Ph'lip a raisoun.
Le vièr Trin'tais
JEP 23/12/1992
Viyiz étout: