|
MARY.
Tu n' y vins pon, ma fille, et quest donc que tu avée,
Qui t'empêchi de venin super unne tasse de thée
Et mangi d'chut'e gâche dans la Faire à Béta?
JENNIN.
N'men pâle poun m'néfant, n'mé bardre pon comme ch'la.
Je devais y aller ossi ben que les autres.
Et si je ny fus pon, che ne fut pon d'ma faute.
MARY.
Mais dis mé donc, ma fille, quest donc qui t'empêchi
De t'en venin ov nous pour t'y ben diverti
Comme les autres hardelles, à qui tu avais promins
De venin tu sais bèn.
JENNIN.
Ne me pâles pon d'amins
N'avais-je poun demandé à la Judith Hamon
De me prêter pour une fais le tou neu cotillon.
Que George li bailli quand i revint d'la mê
Après le premi viage qui fit à Gaspé:
Et quand je fus li dire de me le donner
Ou v'nait del bailli à Suson à laver!
MARY.
Et mais fallait mettre le tien d'dimitti;
Et ben qui ne sait poun neu, et qu'tu las r'habilli,
Un cottillon, tu sais, ne s'vait poun souos un froc,
Et quest qu'erait té vaie si l'iavait quiques pieches de trop?
JENNIN.
Tu éras biau dire, m'néfant j'ne pouvais zy aller,
Mes cauches étaient perchies, iérait fallu les dairner;
Car, la drinière fais que je fus o sonneûe,
J'y fis, ma pouore fille, de horribles creue,
Nou zerait mins le poing à chacun des deux buts,
Et je pis t'aseurer qui n'en pouvaient pus.
MARY.
Ahn! ahn! pardingue, j't'y prends; tu ne m'avais poun dit,
Que tu avais té galvaoudé ov la belle Miss Judith;
Ne faut pon s'étonner qu'chute Judith Hammon
Ait refusé de te prêter son biau neu cotillon;
Lié qui fait tant la fière, qu'iest tréjours si pinchie,
Quand ou se landre au marchi, ou ben à la cauchie;
Ou cré, j'compte, qu'chu George, qui n'est que Contre-maître,
Quand i sa Captaine, la mariéra p'têtre!
Mais, j'en sais la dessus...Nia poun d'soin - ou verra.
JENNIN.
Assah! te v'la marie, ne pâles poun comme chun'na,
Tu sais ben qu'chest ta faute si George ta laissie,
Et que....,.
MARY.
Et que qui? - Li - Tu dis que - De ma vie!
Ah, mais mon doux, Jennin! Il est ben aisi de vée
Que tu as grand dépiét d'nêtre poun vnue au thée.
JENNIN.
Si j'n'y ai poun té omains, j'ai p'têtre autant gagni
Que chez là qui vont pour montrer lu zorgui,
Et qui font minne, ou voudraient faire à craire,
Qui z'y vont seulement pour aller ov lu frère;
MARY.
Assa! mais qui ocouore, ov toutes tes picagnes,
Tu es pieres à matin, que des terrains san hagnes;
Nou ne sait par ouè te prendre; crais-tu qu'en y allant,
J'y érais tet comme té, pour chercher un galant?
Tu ne sais donc pas, ma fille, que la Judith Hammon,
Qui était écourchie, ov son biau cotillon,
Pour lequé, par ma fé, je ne bârais pas unne figue,
Ne peut pas seulement danser unne pouore d'gigue,
Tandis que Me, Jane, Charlotte et Betsi,
J'en dansimmes, m'néfant, quasi très et demi;
Ainchi, penses donc un p'tit, si j'neus pon unne chance,
De choisi, tu m'entends, dans chés contredanse;
Il l'ien eu iun qui; - mais je ne le dirai pas, -
Mais, à quest donc que tu penses, tu n'mécoutes seulement pas.
JENNIN.
A qu'est que j'pense, et a qui serait - che donc,
Si j'pensais a autr'chose qu'a mon neu cotillon,
Et au fun que tu-as leu, en dansant, m'néfant,
Ov quiqu'un - p'têtre quique nouviau galant.
Mais n'y a pon soin. Toute triste que jen sie,
Je ne t'en veur pon, ma Mary, et ne sis pon mârie.
MARY.
Ecoute et crais mé, mais n'en dis pas mot,
N'y a pas un homme que j'aime pus qu'un matelot,
Et la Judith Hammon qui crait faire une belle happe,
En comptant sur George n'a qu'à s'liqui la patte;
Car, ma pouore éfant, je n'té l'avais pon ocuore dit
Que le cousin George y a longtemps qui m'écrit,
Et qui s'en revint chez jôurs, et qu'une fais à Géri,
Je nos mârirons......Te l'avais-je pon ben dit
Que chute Judith si fière, et qui fait tant d'ses teurs,
A pêqui dans la vase. et ben qu'ou cherche ailleurs,
Consoles-té, ma hardelle, ta tristesse offeuche,
Se changera en joie en venant à mes neuches.
Et si George a des sous, tu éras un cotillon
Qui vaudra ocuore mus que le chein de la Hammon;
Car je ten baillerai iun tout neu et tout fringant,
A tou assez de lachette pour amarrer par devant,
Et pour li faire dépiet, j'érons un violonnêux,
Un ben milieu que chez-là des faillis sonneux,
Iun qui sait vos jouer menuet, valse et rigodon,
Qui fait tout c'he qui veurt en maniant son violon.
Et che qu'est acouore mus, qui fait danser chette-là
Que les grands gens savent, c'est-à-dire la polka.
Ainsi, ma chière Jennin, attend-té touos les jours.
A me vais mettre unne fin à mes longues amours,
|
