Av-ous pâssé par les p'tites ruettes au Nord à La Trinn'té à ches drein, et av-ous veu la belle maîson en granit à man couôsîn Hedley? Ah, ch'n'est pas pa'ce qué j'sommes pathents, mais ch'est qu' Hedley et Hilda ont du goût. Les bieaux gardîns, lé meubl'ye, et des tapis comme chennechîn...... Lé bouonhomme dé siez nous dit qu'il éthait du goût étout si, comme Hedley, il avait ieu eune bouonne pinnetchinne dé sa tante! Jé crai qu'il en est jaloux.
Quand il eut pèrmission d'bâti, Hedley d'mandit au janne Barry L'Beuvant dé faithe les plians et tout s'en allait êt' mangnifique sinon qu'i' n'y' avait pas d'ieau des “Waterworks” par là. Barry fit v'nîn l'bouonhomme Fraînque Lé Mèrquand qu'arrivit avec sa badgette dé codriyi et dans mains d'chent vèrgues, malgré qué l'vyi t'nait bouon, lé but d'bouais pointit en bas et il avait trouvé assez d'ieau pouor touos les Vautchièrs, lé bouonhomme dit à Hedley.
Lé pits fut creusé avec d'la machinn'nie modèrne. Les machons, pitcheurs, tchèrpentchièrs et touos l's ouvrièrs arrivîtent et dans trais mais, la maîson et les gardîns 'taient prêts. Hedley, Hilda et les deux mousses èrmuîtent mais i' 'taient bein surprîns qué l'pits 'tait cou'èrt rein qu'auvec eune vielle fielle dé zinc. Hedley, mârri, donnit un coup d'téléphone au bouonhomme, qu'arrivit lé lundi matîn.
“Man garçon”, i' s'fît, "j'tais à arrêter pouor la plieine leune. Ch'est là l'seul temps qué j'peux mettre la cocangne dans l'pits!”
“Eh bein, en v'là d's extchuses pouor né pas aver finni l's travaux!" dit Hedley. "Ous allez mettre eune cocangne dans l'pits! Ou d'vez penser qué j'sis bête!”
Lé bouonhomme dévînt tout séthieux. “I' y'a chînquante ans qué j'sis à creuser des pits et j'n'ai janmais mantchi d'y mettre eune cocangne. Puisqué ch'est la plieine leune à ces sé, j'veindrai à huit heuthes et j'pouôrrons couvri l'pits d'main au matîn”.
Comme il avait promîns i' 'tait là à huit heuthes; i' s'en fut au pits avec san boutchet et deux minnutes après, nou l'ouït s'n aller. Hedley mînt ses “wellingtons” et s'en fut envèrs lé pits. I' halit la fielle dé zinc et r'gardit ava. Tout ch'qu'i' viyait ch'tait la réflection d'la leune! Mais, oui, i' viyait tchiquechose à ch't heu. Nouffait... Si.... I' s'mînt à ventrillons et baîssit sa tête ava l'pits. I' viyait eune forme là-bas. Comme eune crabe-à-co, i' criyait! I' viyait ses yeux et deux longues cornes qui pointaient envèrs li. I' mînt sa tête pus bas et la bête lî sautit sus la fripe, li' êclyichant eune goulée d'ieau en même temps Hedley fit un brai, couvrit l'pits et s'en fut couorrant à la maîson.
Hilda 'tait dans l'parleux. “Tes j'veux sont mouoillis!”, ou lî dit.
Hedley rêponnit qué i' y'avait eune forte rôsée et i' fut s'assiéthe tout près d'lyi.
“Man chièr”, ou s'fît, “crai-tu qué j'iraîmes bein jusqu'au pits èrgarder pouor la cocangne?”
“Hilda, ma p'tite femme,” rêponnit Hedley qui trembliait acouo; “ch'est pas qu' tu crai à la cocangne! Ch'n'est qu'eune vielle scène à chu vièr fripon-là, Fraînque Lé Mèrquand!”
J.T.
Viyiz étout: