Les siens qui connaissent le vier Cliément d'Caen comme un avare endueurchi, qui n'pense qu'à ses rentes et ses obligations et dont la seule ambition est d'atchumuler des richesses qu'i' s'sa obligi de laissi drièthe li; essont p't-être êtonnés d'apprendre qu'i y a ocqu un autre côté à san caractèthe et que l'bouonhomme se garde au couothant de tout ch'qui s'passe alentou d'li et s'interêsse ès changements dans les moeurs et les habitudes des habitants de s'n île natale et prend san pliaîsi à crititchi autchun nouviau dêvelopement.
Et Maît'e Cliém peut tchiquefais être bain comique et bain amusant quand i' cherche à s'motchi d'autchune chose avec tchi qu'i' n'est pas en sympathie.
Comme par exemplye, l'aut'e jour, quand i' nos payi iune de ses visites periodiques, i' dit comme chenna au Chef, “Je trouve que vot'e gâzette est bain en arrièthe de votre confrère du soir!”
Si y a tchiquechose qui peut faithe enragi l'Chef ch'est une ermerque de chu genre-là.
Je vis bain que l'bouanhomme l'avait pitchi, et l'Chef li d'mandi tout rupèement, “Et d'tchi manièthe, j'voudrais bain saver? Ch'n'est pas dans les rapports des Séances des Etats tréjous, ni dans les articlyes d'fond, car j'ai 'té félicité bain des feis sus ches deux rayons-là.”
“Nan, nan,” s'fit Maît'e Cliém “quant à ch'la j'ai tréjous apprécié votre travas dans chute direction-là, mais i' faut aut'e chose que ch'la pour qu'une gazette es'sait compliète et i' y a tchiquechose qui manque dans la vôtre!”
Et en disant ch'la, bouonhomme me fît un clyin et je comprins bain par s'n expression qu'il 'tait à êprouver à s'fichi du Chef, ou bain qu'i' s'en allait, avec son sarcasme humoristique, faithe une riselée de tchiquechose qu'il avait veu dans l'Evening Post.
“Eh bain, Maît'e Cliém,” se fit l'Chef, “je sis agréablyement surprins de vaie qu'ous avez une connaissance si approfondie dans l'journalisme et je vos s'sais infiniment erconnaissant d'aver la bonté de m'êcliaithi quant au point sus tchi que “Les Chroniques” est inférieure à ses confrères, et s'il est nullement possiblye, je m'empres'sait d'y r'mièdgi.”
Le vier de Caen ne fît pas la mîne de s'aperchever que l'Chef était frouaîssi, et i' li dit bain trantchillement, “Chein qui manque est une colonne pour les remerciements.”
“Les r'merciements?” s'fit l'Chef, “et tchi au monde qu'ou voulez dithe par ch'la?”
“Eh bain, quand une personne tchelconque vaint à mouothi! Une longue liste de r'merciements à touos les siens qu'ont participé à l'êvenement.”
“Explitchous don, Maît'e Cliém!”
“V'chin chein que j'veur dithe,” continui l'bouonhomme, “Supposons que iun d'ches jours je vaindrais à patchi mes telles - et j'vos asseuthe qu'i' y aithait de pus grands mithaclyes, je n'sis pas bain du acheteu - nos gens, au but d'une semaine pouorraient publier dans vot'e gazette, tchiquechose comme chennechin, - ”
Viyiz étout: