Moussieu l'Editeu,
La Merrienne est bein triste agniet, car ou vit dans la gâzette hier que chu bouon Saint-Ouennais-là, Edwin Le Mâsuthi, avait passé.
“Nou n'avait pas ou, tch'y 'tait malade,” ou s'fit, “mais ch'est d'même de nos jours. Nou n'sait pas qu'nos viers amins sont malades, sinon quand la Post vos dit tch'y sont morts.”
“Ch'est vrai assez, Merrienne,” j'l'y dit, “et quant a mé j'ai prèsque peux d'liéthe la gâzette. Sans doute, yun d'chais jours, nou liétha que l'pouôre Ph'lip du Portinfé n'est pûs.”
“Epis sa Merrienne,” ou s'fit.
“Oh, nouffé, pas l'yi ocquo,” j'l'y dit, “car je n'vais pas pourtchi qu'ou n'vivrait pas jusqu'à chent ans. Yunne de tes grand'mèthes vêtchu jusqu'à nonante-neuf, et s'ou n's'était pas rompu l'co en d'vallant les d'grèts au gallop pour se faithe une tasse d'tais, oulle éthait, sans autchune doute, fait ses chent. Mais pâslant d'Edwin Le Mâsuthi, ch'tait au fond au raide bouon corps, et un vrai Saint-Ouennais.”
“Sans autchune doute,” ou s'fit. “R'garde comme y v'nait nos vais touos l's'ans dans les temps d'Nouë, pour nos souhaité les compliements d'la saison. Il a mangi hardi d'mérveilles et bein des tâsses de tais assis ichin dans notre tchuisine.”
“Vèthe,” j'l'y dit, “mais avec chonna, y y'avait tchiquechose tch'i mantchait. Y n'tait pas aussi av'nant comme san pèthe, et y'en avait hardi tch'y l'trouvait un mio hautain. Ch'tait pour chonna que quand y print pour Sénateur y n'y vint pas.”
“Chonna, ch'tait une disgrace,” ou dit, “et l's'êlecteurs éthaient deu avé yeu grand'honte. Mais enfin il est hors, le pouôre corps, et nou n'peut pas l'ram'né. Si n'y'a pas pièthe que l'y d'l'autre bord, y n'dév'thait pas avé hardi à craindre. Mais ach'teu, Ph'lip, quantchi qu'nou vêrra un mio pûs d'bouon sens dans l's'Etats? As-tu liut pour le projet tch'éthait rapporté par êcrit ou par l'aide d'une machine chaque mot de tout tch'éthait tait dit chaque fais qu'la Chambre siégeait.”
“Damme, nânin, Merrienne,” j'l'y dit, “ch'est à dithe j'ai liut une partie du rapport, épis j'me s'y endormi. J'n'ai pas yeu là patience de lièthe tout chu gniolin-là. Ch'est têrriblye, absolûment, d'vais combain d'lunatiques que j'avons dans l's'Etats d'nos jours. Avec chonna, j'comprends que notre Député était parmi la p'tite dgaingue tchi voti pour.”
“Vèthe,” ou dit, “et y'avait p't'être un mio d'raison dans s'n action, car y s'est tréjous pliaint tch'y tait mal rapporté dans la gazétte, mais y n'tait pas l'seul tch'y votit avec la minorité. Y' avait, par exemplye, le Sénateur Troy et l'Député Gaudin et tchiques autres.”
“Oh, chais-là,” j'l'y dit, “la seule idée tch'ils avaient ch'tait d'pouvé prouvé à tchique membre tch'y n'aimaient pas que y'avait trais ans il avait dit également l'contraithe de chein tch'y v'nait de dithe ach'teu. Mais enfin l'projét a tait envié au royaume des taupes, et nou n'en r'entendra pas pâslé. La seule chose est que hardi d'temps fut pérdu inutilement, mais ch'n'est rain d'êtrange dans l's'Etats d'nos jours, et y faut y souméttre. Si une demié-douzaine de membres que nou pouôrrait nommé 'taient attrapés par la paralysie d'la langue, nos compagnards r'veindraient siez-yeux d'pûs bouonne heuthe, ayant fait bein pûs d'travas, et l'Baillyi n'souffrithait pas tant d'la mal-à-tête.”
“Je l'pliains bein, l'pouôre homme,” ou dit, “mais chein tchi m'êtonne ch'est tch'y n'garde pas sûs la tablye tchique articlye pour fliantchit à la tête de chais membres tch'y prennent si longtemps à n'dithe rain. Sans doute y pouôrrait mantchi s'n'homme et en capuchi un autre, et p't'etre que ch'est pour chonna tch'y n'le fait pas. Mais, d'vant fini, Ph'lip, as-tu tait vais tes patates à-matin?”
“Mais sans doute j'tait tait les vais.”
“Et lèvent-y?”
“Nanin, les balloques, mais j'ai ouï que pour les faithe poussé n'y'a rain miyeu que d'la bièthe, et j'ai dans l'idée d'en qu'mandé un bathi d'la Mary Ann, pour bein que n'y'aie autchune tchéstchon d'argent comptant.”
La Merrienne me r'gardit. “Et chu bathi; une pinte pour les patates et trais pour té, che s'sa d'même, sans doute?”
“Oh bein,” j'l'y dit, “y faudra que j'la goûote pour m'asseuthé qu'oulle est bouonne. Et quand au paiement, si les patates poussent, nou vêrra, mais si je n'vais pas tch'ils ont r'chu autchun bénifice, la Ann Street pouôrra sufflyié pour ses sous.”
La bouonnefemme se l'vit pour prépathé un mio d'soupé. “Té et tan bathi!” ou s'fit. “Le moment tch'il arrive dans l'bel, me v'la d'hors avec la hache et un gros marté, et tu vêrras ta bièthe coulé dans la citérne à êpu.”
Et don, Moussieu, ne v'là ouèsque j'en s'y.
Ph'lip
1959
Viyiz étout: