Je pense bain, garçons qu'ous êtes tous bain tchuthieux d'saver pourtchi que l'Chef a 'té veu deux jours de siette à rôder attouo du Weighbridge comme si ch'est qu'i cherchait tchiquechose.
Eh bain, je m'en vais vos l'dithe.
Il 'tait à cherchi pour vaie Maît'e Cliément d'Cæn pour li bailli un message pour mé. Ou viyiz, v'la tchinze jours que j'sis siez l'bouonhomme à li baîlli un coup d'main alentou d'ses patates et l'Chef avait envié Marie Hibou à m'dithe que malgré que je n'tais pas au bureau, i' fallait que j'êcrivîsse m'n articlye comme d'habitude.
Ah ça, ous allez avouer que che n'tait pas raisonnablye chenna !
Coumment qu'ou vouley qu'un pouore djâblye qu'est à ramasser des patates dépis chinq heuthes du matin jusqu'à huit heuthes du sé, peut trouver l'temps d'êcrithe des articlyes dignes de pathaître dans chute colonne ichin ? Ch'est pourtchi j'envyi Marie Hibou à s'faithe quatorze, et l'Chef ettou, li disant que l'affaithe 'tait impossiblye et oquo d'pus je n'possédais pas les matéthiaux, car Maît'e Cliém n'avait pas une fielle de papi dans la maison sans pâler d'une boutillyie d'encre et une pliume. Ch'est en tchi, le Chef, qu'est têtouogne comme une mule, se décidi de vaie l'bouonhomme li-même quand i' vaindrait sus l'Weighbridge et de tâchi d'arrangi avec li de m'faithe fourni ma contribution à sa maudite gâzette comme l'ordinaithe.
I' r'pathi de l'vaie à la fin et li donni un ballot d'papi avec une pliume et d'l'encre et sus tchique sens le fit li promettre qu'i' m'don'nait l'temps d'êcrithe un paragraphe ou deux pour la gâzette de Samedi.
Mais l'vier de Caen n'est pas l'sorte d'homme pour permettre ditèt sus san temps, et ch'tait raique à saîssé quand j'avons 'té finis d'souper, qu'i' m'a dit ; "Là Caouain v'chin un patchèt pour té, de la part du chef avec les ordres qu'i' li faut d'la copie pour demain au matin. Tu peux t'y mettre dès acheteu tandis que j'sis à soigni les bêtes et si en cas je n'té criethai pas d'sis bouanne heuthe demain au matin.
Alors garçons, me v'chin don à griffouollyi pour votre bénéfice, à onze heuthes du sé, et je vos asseûthe que j'sis bain lassé et qu' j'ai bain d'la peine à m'garder rêvillyi. Et tout ch'que j'ai à vos raconter est une petite scène qui s'est arrivée ches jours, une farce qu'a 'té jouée sus Cliément d'Caen li-même.
Lundi, quand i'fut en ville porter sa cherge d'patates, tchiqu'un li firent accraithe qu'i' pouvait gagni tchinze louis en mettant un êtchu dans le "sweep" pour le "Derby".
Ch'tait assez pour tenter l'bouonhomme, qui dêhalli un êtchu tout-d'suite et l'donni à l'autre individu qui li promins de faithe touos l's arrangements nécessaithes.
Le Mardi nou li dit qu'il avait tithé un bouan numétho et qu'il avait hallé une jument du nom de "Cocotte" et qu'oulle 'tait seuthe de gâgni, qu'y avait déjà deustrais marchands d'patates qui connaissaient la jument et qu'ils 'taient prêts à li donner siaix louis pour sa chance.
Mais l'bouonhomme n'entendait pas de ch'tte ouotheille là, li !
"J'aime mus en r'chever tchinze," qu'i' dit.
Et i' s'en r'vint à la maison, heutheux comme un pinchon, et en me montrant un p'tit carton avec le nom "Cocotte", êcrit d'sus, i' m'dit comme chenna :
"La Caouain, v'la un p'tit billet qui vaut tchinze louis !"
Je l'feliciti, mé, mais j'li dis qu'i' n'fallait pas tréjous s'fier là d'sus, que bain souvent les siens qui hallaient d'bouans ch'vaux dans ches affaithes-là étaient bain déchus quand l'rêsultat d'la course était publié."
"Bah ! ch'est la favorite, sapresti !" se fit Maît'e Cliém.
Mais par examplye, quand i' r'vint d'la ville Mécredi au sé, je vis bain par sa mine que y avait tchiquechose qui n'allait pas bain.
"Eh bain," j'li d'mandi, "est-che la "Cocotte"qu'a gagni l'Derby ?"
"Nennin," qu'i' m'raîponni, "la fichue rosse n'a pas couothu, et un aubergiste siez tchi qu' j'ai entré à baithe une feis m'a dit qu'i' n'criyait pas qu'y eusse une jument d'chu nom-la dans la course ! Si ch'est vrai, j'en verrai pus long gasdéouelle ! Je compte que j'ai 'te attrapé et je m'en vais pliaindre au Secrètaithe de l'Union pour qu'il en faiche dévé !"
"Mais Mess de Cæn," j'li dis, "je n'crai pas que l'Union peut s'mêler dans des affaithes de chute natuthe-là !"
"Oh mais, j'verrons don ! tch'est qu'chonna sert d'aver une Union, si ch'n'est pas pour protegi ses membres ? Au mains ou peut forchi chu peûle-là à me r'bailli m'n êtchu, ou bain gâsdémmin, je m'en vais rêsigni !"
"Avous ouï l'nom du ch'va qu'a gâgni," je li d'mandi.
"Oh oui, ch'tait une quédole du nom de "Spion Kop" ou tchiquechose comme chenna et ch'tait un maudit marchand qu'avait l'bouon billet !"
Quand j'liu la "Poste" Jeudi au sé, j'vis bain que ch'tait comme Mess de Cæn avait dit et je fus bain content d'vaie que ch'tait iun d's amins du Caouain qu'avait gâgni les tchinze louis.
Fraînque, man garçon, je t'en félicite et j'espèthe que, la prechaine feis que j'ithai en ville, j'aithai l'honneur et l'pliaisi de baithe à ta santé !
Caouain
5/6/1920
Viyiz étout: