I'y a du heurchin siez Laiesse Ernon.
Dépis qu'i' c'menchi à dêfoui i'y a huit ou djaix jours sa femme ne li a pas baîlli un moment de r'pos.
Oulle a 'té à l'tintamârrer tout l'temps qu'il aithait deu avé mins deux frouques et cliergi sa récolte tandis qu'les patates étaient dans l's envithons de trente chelins.
Ses patates 'taient à peines finies d'houetter qu'ou c'menchi à l'êtibotchi.
Oulle eu l'malheur d'entendre tchiqu'un dithe, dans la bus qu'i' s'en allaient dêfoui à l'Etacq la s'maine en r'venant, et ch'en fut assez. Dès qu'ou r'vint à la maison ou dit à Laïsse, “I' s'en vont dêfoui à l'Etacq la s'maine tchi vaint!”
Eh bain, tant mus pour ieux! s'fit Laïsse.
Mais tu n'peux pas faithe la même chose don, té? Tu es tréjous drièthe les autres, i' n'y a don pas moyen de faithe de sous sus rain, ichin! Tu c'menches quand l's autres sont finis, quand les marchands angliais sont sus l'point de lus en raller! Tch'est qui m'a jamais fait mathier un pouore traîneux comme chenna?
Laïesse, li qu'à tréjous 'té un homme pus ou mains raisonnablye et qui n'a jamais voulu appouorter des patates à la maintchi v'nues, êprouvi à la faithe vaie que la terre dans lus canton ne pouvait pas être compathée avec la sienne de l'Etacq, en fait d'heûthiveté mais i' n'y gâgni rain.
L'ardgûment à sa missice était qui si d'autre monde pouvaient dêfoui i' d'vaient pouver l'faithe ettou ieux. Et un fermi nouos dit hier à la boutique, que presque toutes les femmes sont d'même et que ch'est là la raison qu'i' y a tant d'salopethie d'enviée sus les marchiers en c'menchement d'la saison.
Enfin tréjous, Laïesse fit v'nin ses Bretons quand i' pensi qu' s'en prumié betchèt 'tait prêt et il a continué à dêfoui tout l'temps d'pis malgré que selon li, ses patates étaient à peine bouannes.
Touos les jours quand il arrivait du Weighbridge avec sa vainne, sa femme était à l'attendre dans l'bel pour saver tchi prix qu'il avait fait, et à m'suthe que l'prix mollissait ou vos l'insultait comme si ch'tait li qu'en était la cause.
Si les patates étaient pus chiéthes le matin qu'i' n'étaient l'arlevée, il aithait deu y aver té l'matin, et si au contraithe qu'i' hauchissaient contre l'sé, ou vos l'endgueulait parce qu'i' n'avait pas attendu pus tard à porter sa cherge.
Le pouore Laïesse a enduthé chenna aussi longtemps comme il a peu mais chutte semaine il est v'nu à s'mârri à la fin.
Quand i' r'vint d'la ville Jeudi et qu'sa femme ouï que les marchands n'en voulaient pus, ou r'quémenchi san traîn comme de pus bé et li dit comme chenna:
Là tch'est que j't'avais dit? Si tu m'avait êcoutée je pouvions aver tè finis quand illes 'taient oquo chinq vrégies à ôter, et la maladie d'dans!
Mais quand je t'dis qu'i n'n'sont pas oquo bouanne à foui!
Si, i' li sont! Et pis quand même i's'raient hortes tréjous, et nous aithions les sous!
Laïesse avait biau êprouver à li explichi que deustrai marachands li avaient dit qu'il 'tait à pousser trop ses patates et avaient r'fusé de l's y acater, ou n'vouli pas en ouï pâler. Et une chose meni à l'autre si bain, que les v'là sus l'point de lus s'pather, et tout par sus les maudites patates!
Caouain
1924
Viyiz étout: